當首爾仍是叫漢城的那些年（肆拾柒）

不經不覺，由學堂重遇到而家，我同 Chloe 已經認識咗四個幾月。喺呢漫長嘅四個幾月裏面，無論我哋嘅關係，係朋友定係情侶，我哋都花咗好多時間喺對方身上。

從中秋節開始，我哋平均每星期見面三四次，往後嘅日子繼續增加；直到開始拍拖後呢個零月，我哋已經差唔多日日見面。按照呢個進展，我同 Chloe 同居，只不過係時間問題。

當年我同 Colette 都係咁。

只不過，對於韓國呢個國家，我仍然非常陌生；只係知道佢比香港保守。我實在唔清楚，我同 Chloe 喺呢個咁嘅社會環境之下，究竟同居係咪一個可行嘅方案。

更何況，我其實唔係 100% 肯定，我有足夠心理準備，開展另一段同居關係。（留意返：係唔夠心理準備，唔係冇。）

一二月天時去濟州，其實係個唔錯嘅時間。喺漢城，呢啲月份通常都係凍到唔想出街嘅月份；濟州就唔同，睇天氣預測，日間起碼有十度八度。對香港人嚟講，十度八度都仲係好凍；但對於漢城居民（即係我呢個漢城居民），十度八度係好舒適嘅氣溫。

一月尾，農曆新年。濟州島，西歸浦（서귀포 / Seogwipo）。

農曆年，成個星期假，我同 Chloe 決定去濟州旅行。其實最初我哋嘅選擇係釜山，但係去咗一日之後，發覺釜山過年悶到發慌，所以臨時決定轉地頭；改去濟州玩。

其實去邊度玩，我哋都冇乜所謂，只係想行開吓。成日喱埋喺高陽，煲劇、煮飯仔、做愛做嘅事 etc；都係時候搵啲新意。

咁當然，如果悶到好似釜山咁，行成個鐘都幾乎冇一間鋪係開的話，又另計。

由於臨時改變旅行地點，我哋喺金海機場嘅韓國觀光公社 book 酒店，搵到間喺濟州市嘅小酒店。落腳後，我哋決定先去西歸浦，即係濟州島嘅南端。

Chloe 話要帶我去熱帶雨林，於是我哋去咗如美地植物園（ 여미지 식물원 ）。

「蠢蛋哥哥，」Chloe 望住植物園陰陰嘴笑。「你諗緊啲乜嘢呀？」

「我唔知，」我答佢。「我淨係知你諗緊咸濕嘢。」

「咁係似吖嘛！」Chloe 抗辯。「好地地起個植物園，點解要起到咁嘅樣喎……」

「弗洛伊德話呢啲叫陽具崇拜喎……」我仍然皺住眉望緊嗰座嘢。

「個比例好似唔啱咁嘅……」Chloe 仍然未放棄。「應該長啲喎……」佢睄一睄我身體某部份。

「好喇金銀美，」我覺得係時候制止佢胡思亂想。「Over 咗喇；我哋都係去睇植物啦。」

「咩喎，咁係吖嘛……」Chloe 伸一伸脷，跟住我行入去公園。「我讚緊你喎！」

同 Chloe 一齊，好多時都會有呢種「吹佢唔漲」嘅感覺。

我應該點樣去形容，呢個「如美地植物園」呢？簡單啲講，就係一個暖氣開得好勁嘅室內公園。喺陽具建築物入面，有好幾個模仿熱帶雨林嘅室內展館，裏面嘅氣溫同濕度，都同真正嘅熱帶雨林相近，即係有廿七八度起碼。

即係咁，如果你係濟州嘅居民，又突然間好掛住熱帶氣候的話，咁比少少錢，入嚟呢個公園坐返幾個鐘，其實都係一個唔錯嘅選擇。

「好暖呀！」Chloe 好似《仙樂飄飄處處聞》嘅女主角 Julie Andrews 咁，一路行一路彈吓彈吓轉晒身咁跳舞。「我好掛住可以曬太陽游水嘅日子呀！」

「點解無端端要整個室內熱帶雨林呢？」我真係覺得好奇怪囉。

「咁我哋冇熱帶雨林吖嘛，」Chloe 皺一皺眉望住我。「乜你咁鍾意問埋啲咁嘅嘢㗎。」

人類真係好奇怪嘅動物，好地地喺赤道附近，周圍都係熱帶雨林，我哋就走去斬晒啲樹嚟整埋晒啲無乜謂謂嘅嘢；然後就喺啲冇熱帶雨林嘅地方，夾硬開大暖氣，整個熱帶雨林出嚟；除褲放屁，都唔知為乜。

「行啦思想家，」Chloe 彈返埋嚟拖住我隻手。「我哋不如去睇雀仔吖！」

或者 Chloe 講得啱， 諗咁多做乜吖，玩得開心咪算囉。

另外一日，濟州市郊某果園。

今日，我哋決定試吓，聞名嘅濟州柑（Tangerine）。呢度啲果園幾好㗎，俾一個入場費，你就可以喺果園裏邊任剪任食；拎走另計。喺啲柑樹旁邊，佢哋擺咗好多細嘅竹籮，同埋園藝較剪，俾我哋用嚟摘柑。

Chloe 個傻妹知道今日嚟食柑，連早餐都食少咗嘢，留返個肚準備大擦一餐。雖然佢已經廿二歲女，但係有時候，我覺得佢似個十幾歲嘅細路女多啲。

「蠢蛋呀，」Chloe 坐咗係一棵柑樹隔離，一邊食一邊講。「你有冇聽過，濟州開天嘅神話故事呀？」

「乜嘢神話故事呀？」我一邊食一邊問返佢轉頭；講開又講，啲柑真係好甜，濟州柑名不虛傳。

「傳說呢，喺好耐好耐以前，有一個中國人，帶住兩千個童男童女，坐船出海，想去日本 shopping；」Chloe 眼碌碌咁望住個天，講個 Chloe 版「Once upon a time」嘅故仔。

「咁佢哋艘船一路向東行，喺半路中途見到有個島；於是佢哋就決定，係個島上面過夜。嗰個中國人仲係個島嘅一舊大石上面，刻咗『向西歸去』四個大字，後來呢度就叫做西歸浦。」

「咁佢算唔算 vandalism？」我插嘴。

「你聽我講埋個故仔先啦！」Chloe 輕輕打咗我一吓。「然後第二日，佢哋就返咗上船，繼續航行。佢哋唔知道嘅係，原來有三個童男童女唔知醒 check out，留低咗係島上面冇上船。傳說呢三個童男童女，就係濟州人嘅祖先喇。」

我一邊聽 Chloe 講故仔，一邊望住佢講嘢嘅表情。佢講故仔嗰陣表情多多，其實幾可愛。

「咁即係話，濟州人唔係朝鮮人？」我有啲好奇。

「應該唔係啩，」Chloe 指一指遠處嗰幾個果農。「可能係混血啦。濟州人嘅習俗同生活習慣，同我哋都有啲唔同，連講嘢嘅口音都唔同。佢哋去到大城市，成日俾人笑，好慘㗎。」

「咁究竟係兩男一女，定兩女一男？」我問佢。

「好似係兩女一男。」佢諗咗一陣。

「咁個男仔都幾好艷福吖，有得玩 3P。」唔知點解，我好直接就諗到呢樣。

「咁你係咪好羨慕吖？」佢啤住我。

「唔係呀。」死人都話唔係啦。

「你試吓羨慕吖，我閹咗你！」Chloe 揮一揮手上嗰把園藝剪。

「你閹咗我，對你都冇好處。」大家一齊食齋囉咁。

「咁又係，」Chloe 眼碌碌咁望住我。「咁閹一半啦。」

先唔好去諗佢點樣閹一半同埋閹邊一半；韓妹，果然唔係善類。

我哋一路食、一路傾，都食咗幾耐下。最後食到捧住個肚，好飽。臨走前， Chloe 買咗一箱濟州柑，話同我一人一半；佢話要拎啲返去俾爸爸媽媽做手信。

梗係啦，新年流流又走咗去陪男朋友，佢父母唔鎖佢喺屋企都算係咁喇；果然係女生外向。

濟州之行最後一日，回程嘅航班上面。

眨吓眼，個農曆年假期又就完喇。喺返漢城嘅航班上面， Chloe 照舊伏咗喺我心口，但係冇瞓到，同我傾緊偈。

「隻表都爛咗喇，」佢摸一摸裂咗嘅表面。「你仲戴住嘅？」

「塊玻璃爛咗啫，」我望一望隻表。「仲行緊㗎。」

佢抬頭望住我，然後同我講：

「蠢蛋呀，」Chloe 耳根有少少紅。「不如我搬出嚟同你一齊住好唔好呀？」

「你爸爸媽媽肯咩？」我有少少疑惑。

「我大個女喇，」Chloe 望住我講。「同埋都畢咗業咁耐啦，係時候搬出嚟過獨立生活。」

獨立生活？定係獨立咁攬住條仔生活？不過就算係後者，對我而言冇壞吖！

「咁你諗住搬入嚟高陽同我住？」其實我唔係好肯定，搬入嚟高陽係唔係好嘅選擇。

「唔係；」佢擰一擰頭。「你宿舍有 Ricky 同 George 喺度，雖然佢哋都好好人，但我一個女仔，唔係好方便嘅；姐姐都唔敢搬入去啦。」

咁又係，無端端屋企多咗個女人，就算佢哋幾咁 easy going 都唔會慣。

「你有冇諗過，搬出嚟漢城住？」Chloe 問我。

其實都唔係冇諗過，反正我差唔多日日都要出漢城教學生，索性搬埋出去，都唔係一件壞事。

「嗱，你諗吓，」Chloe 煞有介事咁哄埋我隻耳仔度講。「咁到時我哋兩個一齊住，間屋淨係得我同你，咁就會有好多你最鍾意嘅長腿啦、好多著恤衫唔著褲啦、好多性感小內衣啦、好多鴛鴦戲水啦、係咪好吸引先？」

連「色誘」呢招都出埋；為咗同居，佢可以去幾盡？

「롱다리 롱다리 롱다리 ……」佢繼續落咒。「 롱다리 」（Longdali）係俗語，即係「長腿」。佢覺得我好咸濕之餘，對自己嗰 84 吋都好有信心。

「咁，你識唔識點樣開始搵屋？」我問佢；步驟我梗係識啦，就係唔知韓國人喺租務上面嘅法律同習慣啫。

「識！」Chloe 好雀躍。「咁你即係應承？」

「唔。」我點一點頭。

「好嘢！」佢表現得好興奮，大力攬住我。「以後可以日日見住你喇！」

其實而家都差唔多日日見住啦。

估唔到，獨居啱啱半年。我又準備開始另一段同居生活。

（待續）