方格精選
當首爾仍是叫漢城的那些年（肆拾壹）
更新於 2024/12/17閱讀時間約 11 分鐘
戀戰 • 서울 (合)
仍然係平安夜，凌晨時份。
Chloe 幽幽轉醒，望一望我，然後揭開小小被頭，檢視自己是否衣冠整齊。
「唔使睇喇，」我開佢玩笑。「今次真係衣冠不整喇。應該係話，乜衣冠都冇，喺晒地下。」
佢好怕醜咁笑起上嚟，然後掹個枕頭掟我。
「我要著衫呀，」佢半帶嬌羞咁講。「快啲擰轉面！」
「怕乜啫？」我繼續玩。「頭先乜都見晒啦！」
「애 ~~」佢嬌嗔、一邊搵被遮住自己、一邊企圖捉住我嚟打；結果打又打唔到，被又跌埋；唔知顧得打定顧得遮住自己。「你好衰㗎！佔完人便宜仲要蝦人！」
係咪每個女仔同男朋友第一次親熱之後，都會變得咁嗲嘅呢？
「唔同你玩呀，」Chloe 捲住張被、企咗起身、向衣櫃方向半行半跳過緊去。
「借件衫俾我著吖！」佢行行跳跳、突然間一聲慘叫，連人帶被仆咗落地。
「아이구~~ 嗚……痛痛……我要抱抱！」佢扁晒嘴遞起雙手，我埋去抱起佢。還好張被包住佢，應該冇受傷。
「咁你想要咩衫呀？」我問佢。「我攞俾你啦。」
「喺東大門第一次見面，同你一齊買嗰件。」佢笑得好嬌嗲。
聖誕日早上。
Chloe 著住我件淺藍色恤衫周屋走。梳洗完畢，佢喺我書檯前面搽緊 cream；望住佢恤衫加長腿，我連眼都唔敢眨，驚會睇少咗啲嘢咁。
究竟，女人同男裝恤衫之間，有乜嘢秘密呢？點解 Chloe 著住我件恤衫，會性感咗咁多嘅呢？
Boyfriend Jeans 唔係唔好睇，但係有得揀的話，我 prefer Boyfriend Shirt。
食完早餐，Chloe 突然好專心咁望住我；一如以往嘅小習慣，佢側側哋頭、略帶笑意咁望。
「點解你咁鍾意側住頭望人嘅？」其實唔難解，扮 cute 囉。
「因為要配合我活潑可愛嘅個性。」See?! 我都話㗎啦。
東西方女仔最大嘅唔同之處，就係西方女仔長大後，就想自己性感啲；當年Colette 日日對住 Lauren Christy 張海報，都係望自己可以性感啲。亞洲女仔，特別係中日韓台港澳，就一味鍾意扮 cute 扮 kawaii。
「活潑可愛嘅金銀美小姐，請問你而家望緊乜呢？」我都開始習慣叫佢韓文名。
「望緊我男朋友，我嘅男朋友，我個男人，嘻嘻！我好想周圍同人講，你係我男朋友。」佢邊講邊傻笑。
「其實你鍾意我啲乜？」我問佢。
Chloe 皺一皺眉、扁一扁嘴、行埋嚟、坐咗喺我大脾上，然後好認真咁打量咗我一陣。
「唔知。」佢笑得好開心。
「唔知你又鍾意？」我覺得奇怪。
「仲記唔記得，我哋係點識㗎？」我點一點頭。「當日撞到你嗰陣，你個反應好得意，講一啲我唔明嘅嘢（即係廣東粗口）；然後你望住我嗰陣，個樣好呆，好傻好可愛。」我而家先知，原來我屌鳩人個樣好可愛。
「你知唔知自己好靚女㗎？」其實過去嗰三個幾月，我經常都有想讚佢靚嘅衝動。
「我知呀，嘻嘻！其實嗰陣我見到你個傻樣，我心諗：有個傻更更嘅朋友陪我玩吓都好！但我又唔知道，你究竟係嚟旅行定係嚟呢度做嘢。所以搏一搏，陪你去買衫，睇吓有冇辦法同你交換 contact。」佢一邊講，一邊把玩件恤衫嘅袖口。
「係囉，你整污糟我件衫，仲惡人先告狀講明唔賠！」我抗議。
「你著緊嗰件係 Ralph Lauren Polo 嚟㗎！我邊有咁多錢賠俾你呀！」佢縮一縮膊。
「咁你點樣咁快手就寫到電話俾我？你接住我袋衫嘅時間好短咋喎。」佢仲快手過《至尊無上》嘅劉華囉。
「哈哈哈！蠢蛋嚟㗎！你攞返張單出嚟睇吓！」佢企咗起身，我去書檯搵返張單出嚟，再坐返埋位，佢又再坐返喺我大脾上。
我檢視張單，因為學咗啲韓文，我可以約略咁知張單寫乜。係喎，張單都唔係買衫嘅單嚟嘅，銀碼日期貨品都唔啱。
「張單係我之前食飯嘅單嚟㗎，蠢蛋！你真係當我魔術手咩？你買衫間鋪根本就冇開單俾你！我喺落電梯嗰陣，已經寫緊電話，你企喺我後面所以睇唔到之嘛！點知你個蠢蛋返到屋企睇都唔睇就丟埋一邊唧！嘥晒我啲心機，等我真係以為你係遊客，玩完走咗。」佢用隻過長嘅衫袖當水袖咁輕輕打我。
「不過講個秘密你知吖，其實喺學堂撞返你之前，我已經撞過你一次。」佢好頑皮咁笑咗一笑。
「吓？有咩？」我有啲詫異。
「唔。」佢點頭。「記唔記得八月尾有一晚，你同個外國女仔，去過鍾路嗰間 disco？」嘩！唔係咁橋呀？！
「個女仔係咪 Colette？」Chloe 問，我點頭。
「嗰晚我朋友同我慶祝生日，落咗去玩，睇住你同 Colette 跳舞。我心諗：哼！原來有女朋友，唔怪得之唔睬我啦！後來我再睇多你哋一陣，你哋真係旁若無人、好陶醉咁跳舞，嗰陣我開始有啲羨慕你哋。」佢繼續把玩衫袖，間中用隻袖打我一吓。
「Disco 黑成咁你都睇到？」我好好奇。「By the way，補祝返：生日快樂！」
「嘻嘻！多謝！」佢邊摸住我頭長髮邊講。「韓國邊有男仔好似你咁長頭髮㗎？長髮男我一個月都唔知有冇見到一個呀，仲咁鬼高，唔係你係邊個！同貼住個名喺心口冇分別，哈哈！」佢輕輕手咁摸，我俾佢摸到打冷震……
Since they’d never met before, they’re sure
that there’d been nothing between them.
But what’s the word from the streets, staircases, hallways —
perhaps they’ve passed by each other a million times?
「後來我哋喺學堂撞返，我帶你去仁川買月餅，我咪問咗你好多嘢嘅？記唔記得呀？」我點頭；俾你盤咗成六個鐘，點會唔記得喎。
「如果當日你瞞住我，話你冇女朋友的話，我諗嗰次就會係我哋最後一次見面；我唔鍾意俾人呃。點知你個蠢蛋竟然老實到同我講出真相，我其實好羨慕 Colette；你雖然係蠢蛋，但起碼老實。」佢收起笑容，好認真咁望住我。
好人有好報，好彩我冇呃佢。
「但係，嗰陣我仲未知你對我有冇感覺。於是，第二日我再約你睇戲，睇吓我同你有冇 feel。你隻蠢蛋係怪獸嚟㗎，完全唔表露感情嘅！我成日同你一齊都好開心，但完全感覺唔到你諗緊乜，唔知你對我有咩感覺。」佢嘟嘴。
「於是我把心一橫，夜晚帶你去你同 Colette 去過嗰間 disco！」原來伏嚟嘅！唔怪得之我中得咁應！
「我知你地感情好深，但我亦知你哋有啲感情問題。我帶你去嗰間 disco，目的就係睇吓，你同我去同一個地方，會有咩反應。如果你對我根本冇感覺，或者你同 Colette 冇你講得咁好感情，咁我無論帶你去邊度，你都唔會有任何情緒波動。」佢好有自信咁講。
我對我懷中呢個女人開始改觀，佢係一個心理學高手。
「我故意同你跳慢舞，我感覺到你完全心不在焉；跳完之後，你仲要飲酒；見到你忐忑不安嘅舉止，嗰陣我就知道，你對我唔係完全冇感覺。」佢流露咗啲惡作劇嘅表情。
「到第二日，我想再約你出嚟，但你避開我；我知道，我諗嘅嘢係啱嘅。」「惡作劇」表情變咗「仲唔係你！？」表情。
一個廿二歲嘅女仔，有佛洛伊德嘅思維，睇嚟我日後都係要小心女人。
「你又點知我避開你呢？你唔俾我真係病㗎？」我奇怪。
「你幾時見過有男仔因為喉嚨痛，連女仔約去街都推㗎？」我不置可否；佢繼續。「但係我都有啲擔心，萬一你真係病咗，冇人照顧會好慘。於是第二日，我煮埋嘢拎入嚟俾你食。」
「嗰晚我哋玩燈籠煙花玩得好開心；我同自己講，我無論如何都要諗辦法留喺你身邊，那怕只係做朋友。我仲有個習慣，講出嚟你唔准嬲㗎！」佢星星眼望住我。
「好，我唔嬲。」我答。
「係咪真㗎？」佢仍然星星眼。我都已經係你條仔啦，唔使咁用力電喎。
「係。」我望住佢講。
「我好鍾意見到你忐忑不安個樣，所以有陣時我會故意拖住你，或者搵機會錫你，因為每次我咁做，都會見到你忐忑不安；可能你係諗起 Colette，可能你係諗緊我同你，我唔知，但我唔理；我只會當你係諗緊我同你嘅關係，我覺得好甜。」其實我有諗過，之前佢啲拖拖攬攬，係迫我表態嘅方式。
「到後來，當我知道你同 Colette 分咗手，我心情其實好矛盾；一方面我有啲內疚，我好驚係我搞到你哋分手；另一方面，我又有啲開心。我諗：如果你哋分咗手，你會唔會同我喺埋一齊呢？點知一諗就出事，我發覺我已經唔可以再呃自己，話只係想同你做朋友，我唔可以再同你講，『我冇要求你為我做啲乜』。」講到呢度，佢個樣有啲低落。
「所以之後每次我講呢句嘢，你就唔開心？」佢點一點頭，我錫咗佢一啖。
「你個冇心肝，仲係咁搵呢句嘢嚟刺激我！」佢邊講，邊輕力𢱕我心口。「我聽一次就心疼一次，好幾次差啲喊咗出嚟呀！我開始有啲擔心，如果你唔鍾意我咁點算……」
「咁你 feel 唔到究竟我鍾唔鍾意你嘅咩？」我問佢。
「Feel 到還 feel 到，我想證實，我想聽你對我講：I love you。」佢伏咗喺我膊頭。「但係你隻蠢蛋好似完全接收唔到咁，要我一日一日咁等……」
「唔係收唔到，只不過係……」其實我唔知點解釋佢聽。
「因為 Colette 吖嘛，其實我明㗎；」已經唔係第一次，佢睇穿我。「如果你一定要我俾一個愛上你嘅理由的話，我覺得係因為你對佢嘅感情，令我好感動。點解你對佢咁情深嘅？你對我會唔會都係咁情深㗎？」最後嗰句，佢好嬌嗲咁笑住問。
「咁要睇吓，你對我有幾情深先知喎！」我拋返個波俾佢。
「唔知㗎！」佢眼碌碌望住個天花板。「你慢慢咪知囉，傻蠢蛋！」
「又傻又蠢蛋，我喺你口中都冇乜好嘢……」我抗議。
「傻蠢蛋，」佢又變返一派嬌嗲，如果成日都係咁就好喇。「韓國女仔唔係任何人都叫蠢蛋㗎，通常都係意中人先會咁叫㗎……」
「但係你好似第一日見返我就咁叫喇喎……」我仍然有啲不解。
「嗰個蠢蛋同呢個蠢蛋唔同㗎，蠢蛋！」佢嬌笑解釋；我繼續一頭蠢蛋唔知邊隻打邊隻。
「咁如果琴晚我唔去搵你的話，你會點？」我好奇，究竟佛洛伊德再受錯折的話，會點反應。
「我諗我會喊一陣，唔開心幾日，바보바보바보 咁咀咒你幾日；然後收拾心情，過完個假期再搵你。」我又啱咗，佢 pabo-pabo-pabo 個樣真係好可愛。
「點解要對我咁好？」喺呢個位，我心情有啲激動，因為佢個答案感動到我。
「因為我愛上咗個蠢蛋。」佢講完錫咗我一啖。
Chloe 係啱嘅，我的確係唔容易表露感情嘅人，但唔代表我冇感覺。咁大個人，除咗Colette 之外，從來未試過有女仔對我咁好。
就算係 Colette，如果六年前，我好似之前呢三個月對 Chloe 咁、對佢若即若離，我都唔敢肯定，我哋仲有冇機會喺埋一齊。畢竟，呢個世界，無任何人有義務對你好，更加冇任何人有義務愛你。
我也不是大無畏 我也不是不怕死
但是在浪漫熱吻之前 如何險要
懸崖絕嶺 為你亦當是平地
愛你不用合情理 但願用直覺本能去抓住你
一想到心儀的你 從來沒有的力氣
突然注入漸軟的雙臂
旁人從不贊同 而情理也不容
仍全情投入 傷都不覺痛
如窮追一個夢 誰人如何激進
亦不及我為你那麼勇
沿途紅燈再紅 無人可擋我路
望著是萬馬 千軍都直衝
我沒有溫柔 唯獨有這點英勇
（待續）
為什麼會看到廣告
34會員
111內容數
時間係1997年5月中，剛剛完成學業嘅我身在華盛頓，正在考量緊我嘅未來。我可以選擇留喺美國發展，我internship嘅老細（即係美國政府）同我有共識，我畢業後可以留喺政府工作。或者我可以選擇出去闖一闖，見識吓呢個世界。當年仲係年青嘅我選擇咗後者，因為我覺得我仲未需要搵一份工困住自己......
留言0
查看全部
你可能也想看
Google News 追蹤
*合作聲明與警語：
本文係由國泰世華銀行邀稿。
證券服務係由國泰世華銀行辦理共同行銷證券經紀開戶業務，定期定額(股)服務由國泰綜合證券提供。
剛出社會的時候，很常在各種 Podcast 或 YouTube 甚至是在朋友間聊天，都會聽到各種市場動態、理財話題，像是：聯準會降息或是近期哪些科
來韓國旅行最值得住的首爾明洞飯店，一次推薦給你🤩如果你正在猶豫來首爾自由行要住哪，這篇文你一定要看下去！明洞是首爾必去的景點之一，也是交通非常便利的一個城市，周邊還有好多好吃好逛的~在這裡也有許多不同特色的房型，不論你是單人還是多人，都有適合你的首爾住宿選擇，快跟著AsiaYo一起來明洞看看吧！
《可憐的東西》是一部充滿深度的電影，除了帶給觀眾感官享受，還隱含著許多深刻的內涵。從故事中可以看到冒險、實驗、與人類的成長，帶給觀眾不同的啟發和思考。觀眾在觀影後，可以自我審視，檢視自己是否保有冒險之心，以及是否有勇氣持續實驗人生。
這天中午比較熟韓國的朋友說，有個超人氣的起司年糕鍋激推必吃，既然是超夯美食當然不能錯過呀～餐廳從外觀看起來有點像是民房改建而成的，裡面的座位也是一間一間隔開，我們也算幸運，當時也沒排什麼隊就進店入座了。
外資今 (4) 日買超台股 15.4 億元、台指期同步回補空單，現股方面，外資買超緯創 (3231-TW)7939 張最多，而面板雙虎不僅遭外資賣超 3.1 萬張，投信也同步調節。
*合作聲明與警語：
本文係由國泰世華銀行邀稿。
證券服務係由國泰世華銀行辦理共同行銷證券經紀開戶業務，定期定額(股)服務由國泰綜合證券提供。
剛出社會的時候，很常在各種 Podcast 或 YouTube 甚至是在朋友間聊天，都會聽到各種市場動態、理財話題，像是：聯準會降息或是近期哪些科
來韓國旅行最值得住的首爾明洞飯店，一次推薦給你🤩如果你正在猶豫來首爾自由行要住哪，這篇文你一定要看下去！明洞是首爾必去的景點之一，也是交通非常便利的一個城市，周邊還有好多好吃好逛的~在這裡也有許多不同特色的房型，不論你是單人還是多人，都有適合你的首爾住宿選擇，快跟著AsiaYo一起來明洞看看吧！
《可憐的東西》是一部充滿深度的電影，除了帶給觀眾感官享受，還隱含著許多深刻的內涵。從故事中可以看到冒險、實驗、與人類的成長，帶給觀眾不同的啟發和思考。觀眾在觀影後，可以自我審視，檢視自己是否保有冒險之心，以及是否有勇氣持續實驗人生。
這天中午比較熟韓國的朋友說，有個超人氣的起司年糕鍋激推必吃，既然是超夯美食當然不能錯過呀～餐廳從外觀看起來有點像是民房改建而成的，裡面的座位也是一間一間隔開，我們也算幸運，當時也沒排什麼隊就進店入座了。
外資今 (4) 日買超台股 15.4 億元、台指期同步回補空單，現股方面，外資買超緯創 (3231-TW)7939 張最多，而面板雙虎不僅遭外資賣超 3.1 萬張，投信也同步調節。