當首爾仍是叫漢城的那些年（廿壹）
人生猶如一齣戲，呢齣戲究竟係喜劇、悲劇、Cult 片、名著定爛片都係未知之數，唯一相同嘅係，無論你呢齣係好戲定爛片，每個人自己嗰齣戲，都會有一場至數場好難演嘅分手戲。唔一定要牽涉男女感情，任何倫理關係都有機會上演分手戲。
1997年8月30日，星期六，金浦空港。廿四歲嘅男主角我，同廿四歲嘅女主角 Colette 又再演繹一場分手戲。唔係我哋嘅第一場，亦唔會係我哋嘅最後一場。
人有悲歡離合，月有陰晴圓缺，此事古難全。
「究竟我同你仲會有幾多次離離合合呢？」Colette 苦笑，佢好似睇通我諗緊乜。
「次數我唔計較，我只係希望一個大團圓結局。」我喺嗰種睇戲會 make sure 結局完美先入場嘅人。
「我哋一齊努力。」喺我嘅薰陶下，Colette 睇過《東京愛的故事》、《星の金貨》同《悠長假期》之類嘅日劇；估唔到佢仲記得呢類對白。
由於時辰尚早，我哋去咗機場 coffee shop 坐低食少少嘢。
「呢度仲有冇好食嘅嘢我未食㗎？」為食鬼妹唔會放過任何食嘅機會。
「我，你仲未食埋我。」我作勢遞隻手俾佢咬，其實係諗唔到嘢。
「呢個星期食咗好多餐喇喎！」佢古古惑惑咁笑，呢類二級半對話係其中一樣我最掛住嘅嘢。
「係呢，返到去有乜打算？」掛還掛，喺街唔好講呢啲，唔知點收科；我決定轉台。
「下星期有兩個 interview，都係 NGO。睇見你 internship 嗰陣咁辛苦，我唔係好想喺 Capitol Hill 返工；見步行步啦。」Colette 一邊落緊糖落杯咖啡度一邊講。我同佢，一個民主黨人，一個共和黨人，所以我冇乜可能介紹工作俾佢。
「有冇諗過，過嚟同我一齊教書？」其實我想同佢講好耐，如果佢過埋嚟，我哋又可以繼續朝夕相對。
「我過咗嚟，咁你啲妹妹仔、姐姐仔點算？我驚好多韓妹會憎死我！」講呢啲，即係佢想搵位閃。果然：「我唔太喜歡呢個城市，太多人，好唔自在。I am a Gwai-mui after all.」
「都啱嘅，」雖然預咗答案會係咁，但總不免有一絲失望。「咁祝你下星期見工順利啦！」
「好吖，我如果搵唔到工的話，我過嚟食你嘅住你嘅，你養我！」佢笑得好燦爛。
「好！一言為定！」其實我真係唔介意。
無論我介唔介意、佢當唔當真都好，呢場分手戲，係無論如何都要演埋落去。作為有職業道德嘅演員，導演一日唔嗌 cut，都要繼續演落去。況且我完全感覺唔到，我哋嘅「導演」有任何嗌 cut 嘅蛛絲馬跡。
送女千里，終須一別；就算我哋行得再慢，閘口始終都會出現。呢個時候，我個腦響起呢首歌嘅音樂：
Baby won’t you tell me why there is sadness in your eyes I don’t wanna say goodbye to you
「Voilà!」Colette 個樣有啲無奈。「我哋又要分開喇……」
呢個時候，我心頭一熱，我知我再唔講的話會後悔：
「其實，如果你想的話，我哋可以 —」
Colette 用手掩住我個口，然後俾咗我一個深吻，佢話：「唔好一時衝動，有啲嘢講咗收唔返㗎。」
「Fillette，我……」我想再講落去，佢又再錫多我一次，然後喺我耳邊講：
Je t’aime pour toujours. You are mine!
熱淚盈眶嘅佢講完呢句之後，轉頭就走，冇再望我。行到閘口，Colette 突然回頭，向我揮手，然後大聲講咗句：
「我哋分咗手㗎喇！」
佢講嗰陣滿面笑容，但係眼淚已經緩緩流下。兩秒後，佢已經入咗閘。
就係咁，我又再次自己一個人。
現在去北京遠了，去龍兒更遠了，自家只一個人，只是孤零丁的一個人。在這裏繼續此生中大約是完不了的飄泊。
我唔知點解會喺呢個時候諗起郁達夫，攞景定贈興呢我個死人腦。
返到宿舍，打開行李喼，準備將 Colette 帶俾我嘅嘢一一歸位。
執到最後，我喺暗格發現咗一張卡，同一個包得好靚嘅小盒。我打開卡封，裡面除咗張卡，仲有三百蚊美金。個盒仔裡面，有一條 Tiffany 仿軍用狗牌嘅頸鍊，狗牌嘅背面刻住「Tu es à moi」，英文即係「 You are mine」。喺卡上面，Colette 寫住：
A heartless little shit needs more money, just in case. I love you!
呢個時候，我個心好暖。
我希望當 Colette 返到屋企執行李、見到我偷偷收喺佢個大背囊暗格嗰三百蚊美金嗰陣，都有同樣感覺。
就算分開仍然能相愛 你願永遠等待 要等一天要誤了一生 還是愛你未更改 誰為我今天流離所愛 愛願放置於心內 為了學業為了不羈理想 迫於丟低這份愛 明知不可以再分開 分開不想接受新愛 愛令我彷似置身於死海 離不開 你是你是我的將來 誰都不可以再分開 不想擔心這是否錯愛 你話過任何時候需要你(我) 從新開始這熱愛
（待續）
預告：隨住 Colette 嘅離開，《漢城》將會有更多新人物登場；請繼續留意。
分享至
成為作者繼續創作的動力吧！
作者的相關文章
IF的沙龍 的其他內容
你可能也想看
- 「天天秋嗨嗨」：vocus 秋季徵文，五大主題 & 獎品登場！
- 美國大選『終局之戰』（Endgame）即將展開， 美股將迎來新世紀？（上篇：模型推導寶座花落誰家？）
- 如果這個世界有神，那祂一定姓李名相赫｜矮袋鼠律師
- 【電影首映】假殺手愛上真兇手 #當殺手戀愛時，《捍衛戰士：獨行俠》格蘭鮑威爾和《水行俠》女友卓亞霍娜的黑色喜劇！電影推薦
- 2024韓國明洞住宿精選｜5間首爾明洞飯店推薦，多人房型、單人旅行必看的超值旅館，24小時服務櫃台超貼心！
- 《可憐的東西》由雙腿到雙耳之間、由肉體到心智——經驗主義式的地球人操作守則
- 我眼中的首爾 | 當地人帶著跑的首爾 Hot Place 龍山區 (1) 梨泰院解放村 이태원 해방촌
- 首爾🇰🇷有超夯人氣的三清洞摩西年糕鍋
- 【0905米勒財經早報】歐股收黑 德出口、歐投資人信心不振；記憶體族群 外資按讚；戴爾捎春訊 2檔台鏈急單
發表回應
成為會員 後即可發表留言
© 2024 vocus All rights reserved.