放暑假喇！係，我知道呢個所謂嘅「暑假」，其實只係得一個星期咁大把。我亦都知道，我呢個暑假其實戇吓戇吓冇乜嘢做。
我啲同事們全部鳥獸散，Michael 返美國、Kirsty 去濟州玩、George 同朋友去爬山、Ricky 同女朋友去日本、惠晶唔知去咗邊、Esther 同 Sophie 兩姊妹返咗家鄉議政府探親，就連我嘅 Colette 都返咗 LA 探阿媽；得返我一個戇鳩鳩。
星期六，假期嘅第一日，我已經頹到成十二點幾先起身。喺我個腦海中其實有好多 plan，我想去板門店 JSA 行吓，睇簡介先知道原來要預約仲要報團；我想去行龍山電子市場，但係諗起啲地鐵路程就縮沙；我仲想去 shopping，但係唔知有咩想買。結果都係喺廳坐到肚餓走咗去食 pizza。
食完嘢，百無聊賴行咗去網吧，上 ICQ 同 AIM 都見唔到 Colette，佢應該喺佢阿媽屋企陪阿媽傾偈。兩日冇見佢 online，有啲唔慣。
我求其開咗個 Sim City 2000 嚟玩，喺一個不知名嘅地方上面左 click 右 click 企圖起路起樓。呢個時候我嘅手機響起。
「Surprise! 你係咪好悶呢？喺度做緊乜呀？」係 Colette，佢終於記得我呢個孤兒仔。
「喺網吧打緊機。你呢？唔使陪阿媽咩？」
「第二個 surprise! 我喺漢城機場呀！」吓？！佢呢下嘢就真係 caught me off guard喇！
「你講真㗎？」我有啲唔係好相信我隻耳。
「係呀！金浦機場，我啱啱落機，仲未過海關。你快啲嚟接我吖！不過唔使趕㗎，我可以坐低飲住嘢等你。」喂佢嚟真㗎喎！
當你正準備好似一個頹廢老人咁摺埋過呢個假期，而家話俾你聽唔使頹之餘，仲有女攬，呢種驚喜真係非筆墨所能形容。
我即刻埋單，落到街先知道，原來我唔識點由高陽去金浦機場……
不過呢個時候，莫講話金浦機場，南澳以南汕尾以南我都同你飛過去呀！
我衝返上去網吧，叫睇檔個哥仔幫我寫低「我要去金浦機場」嘅韓文，然後落街截的士出機場。
其實金浦機場同高陽市距離唔遠，過條河就係，但係搭地鐵的話，要先出漢城再轉車，無啦啦兜個大圈，搭巴士又要等餐懵。呢個時候如果有得租直升機我都租呀！
去到機場，我行咗去入境大堂嘅閘口，但係唔見 Colette，唔通佢仲未出到嚟？
我嘅視線隨住人群掃過去，喺一個等候區入面，我望穿人群，見到有隻手向我呢邊揮手。我行近幾步睇真啲，一個親切嘅笑容、一個著住背心牛仔褲嘅嬌小身影、紮起馬尾嘅深啡色頭髮，係佢喇。
Colette 得五呎一左右，鬼妹嚟講佢算係 Toy Poodle 嗰隻 miniature 品種，我高佢足足一呎；大庭廣眾之下好難會認錯人。
喺美國，要識個五呎一嘅鬼妹，難過識個五呎七嘅鬼妹好多。
佢見到我，連架行李車都放低唔理，好大聲咁「Babe!」咗一聲就衝過嚟攬住我 — 係成個人跳咗上我上身、對腳鉗住我條腰嗰種「攬」。
「有冇掛住我呀？」我話冇你信唔信吖？
「做乜咁突然飛過嚟？」係囉，真係心理生理準備都冇喎。
「你叫我寄衫俾你嘛，而家咪連衫帶速遞員咁俾你囉！」佢跳返落地，指吓架行李車。車上面有一個同佢差唔多高嘅大背囊，同埋一隻市面上買得到最大嘅喼。
「隻喼係你㗎，個背囊係我嘅。」Colette一面解釋一面喺個斜揹袋度搵緊啲嘢。
「你肚唔肚餓？我帶你返屋企擺低啲行李，然後我哋去食嘢好唔好？」
「我 book 咗酒店呀。」佢原來係想搵張 confirmation 俾我睇，我望一望，佢 book 咗 Swiss Grand!
Swissotel Swiss Grand Hotel，即係今時今日嘅 Grand Hilton Seoul，當年係漢城最頂級嘅酒店。而我同 Colette 去旅行咁多年，除咗住 hostel 之外，連 B&B 都唔係好捨得住。
「你中咗 lotto 呀？Swiss Grand 好貴㗎！」我暗地肉赤緊。
「唔係呀！買機票嗰陣個 agent 介紹，book 一星期除返開都係百零蚊美金一晚咋！」仲 book 咗成個星期！如果佢喺電話同我講的話，我會以為佢發緊燒。不過百零蚊一晚又真係好抵住，walk-in 的話可能要三四百一晚。
我哋坐的士去到酒店，車停定就即刻有人拉開車門。落車後，我望一望個大門口，個 bellboy 已經開定門迎接我哋，另外一個已經幫我哋喺車尾箱攞緊啲行李出嚟。
話晒當年我哋都仲係後生仔女，見識少，俾呢個排場拋到有啲窒。
上到房，兩個鄉下仔鄉下妹非常好奇咁檢視間豪華客房；除咗同老豆老母去旅行之外，我係從未住過咁有規模嘅酒店，Colette 都係。
Settle down之後，我問 Colette：「喺咪去食啲嘢？」
「我 book 咗間咁靚嘅酒店，又冇見你成兩個月，你真係淨係想同我去食嘢？」佢俾咗個曖昧加挑逗嘅眼神，好古惑咁望住我笑，然後撲咗過嚟……
（待續；係，我知道咁Netflix式嘅待續會俾人屌）
