究竟乜嘢係「緣份」？有人認為，「百世修來同船渡，千世修來共枕眠」呢啲就叫緣份。我同 Colette，一個來自香港，一個來自亞維農，茫茫人海中喺半個地球以外嘅洛杉磯相遇、相愛、相隨，由洛杉磯一直到華盛頓，呢啲算唔算緣份？定係我哋要喺繁忙時間嘅漢城地鐵2號線失散後再重逢，先算係真正嘅緣份？
同埋，當日黃泰來導演拍《緣份》嗰陣，有冇親身試過，喺地鐵玩捉迷藏？地鐵，本身已經係一種非常唔浪漫嘅交通工具；喺地鐵捉迷藏，其實不但唔浪漫，仲係非常之折磨嘅一件事情。
四十分鐘後，江南驛地鐵月台，我終於見返 Colette 嬌小嘅身影，除咗嬌小，仲多咗幾分落寞。成個過程係點大家都想像得到：失散，大家心急想搵返對方，結果都係搵唔到，於是返原地等待對方出現。
Colette 見到我，跑過嚟攬住我，將個頭埋咗喺我心口。我輕撫佢嘅頭髮安慰佢，然後我感覺到件衫嘅心口位置有啲溫暖嘅微濕，係佢嘅眼淚。
據我多年嘅認知，Colette 係個幾硬淨嘅女仔。我唔會話佢係個唔會喊嘅女仔，佢都有喊嘅時候，但係迷路呢類事情並唔係一啲會令佢喊嘅嘢。我正想問吓佢發生咩事，佢已經收起眼淚，回復佢一貫親切嘅笑容。
之後我哋照原定計劃去樂天世界，成個遊玩嘅過程，Colette 都好努力去全情投入咁玩，亦都玩得好開心，但係說話少咗，今朝重逢嗰陣嗰種落寞嘅感覺一直揮之不去。佢全日都拖得我好緊，冇乜嘢都好似唔想放開我隻手，排隊玩機動遊戲嘅時候好多時都攬住我，再冇在意其他人嘅目光。
正如我之前所講，我好享受一個咁嗲嘅 Colette，因為嗲從來都唔係佢嘅預設模式，可遇不可求。但係我總係感覺到有啲奇怪、有少少唔妥嘅不安感，我肯定佢冇受傷，但我講唔出咩事。
玩到黃昏時份，我哋喺蠶室驛附近搵咗間日本餐廳食壽司同冷麵。返到酒店，Colette 仍然緊緊拖住我唔願放手。
「你今日無咩事吖嘛？」我嘗試輕鬆少少咁問佢。呢個時候，佢將拖手變做擁抱。佢嘅嗲開始令我有啲擔心，會唔會係有絕症，定係識咗第二個？
「今日我哋喺地鐵失散嗰陣，我好擔心以後都見唔到你……」佢細細聲開始解釋。
「傻妹，咁我哋最後咪……」我講到一半，Colette 截住我。
「你聽我講埋先啦，」佢繼續。「其實喺兩年幾之前我哋喺 LA 準備畢業嗰陣，我已經開始擔心，我見到身邊好多朋友同學，畢業之前好好感情，畢業之後都分收收場，我好驚我同你嘅結局會係咁。」
「後來，GU 收咗我哋兩個讀碩士，我哋喺校園嘅時間又可以延長，而且離開咗 LA，可以一拼離開埋你身邊嗰啲我唔想見嘅人，」佢眼尾瞄一瞄我，然後繼續。「我當時覺得，既然仲有兩年時間，我都唔需要即刻諗個解決辦法。我以為兩年係好長嘅時間，點知嚟到DC，啲時間好似 fast forward 咁，眨吓眼我哋又話畢業喇。」
「舊年平安夜我地去完 party 之後，我見到有啲人喺街上面倒數，我心諗，都傻嘅，平安夜倒數為乜啫？後來我先意識到，其實我同你，都喺度倒數緊，只不過唔係聖誕倒數咁解。然後我驚覺，我哋又返咗去兩年前就畢業嘅原點。」
「於是你就先發制人，同我協議分手？」其實我唔係有心咁講嘢，不過呢個問題實在困擾咗我太耐。
「乜你真係認為，我可以就咁離開你咩？」Colette 嘅坦白令我覺得自己先前嘅質問口吻有啲過份。「同樣我都唔認為你可以就咁離開我。但你知道我係嚟自單親家庭，我嘅家教令我對感情同承諾冇乜信心。雖然呢幾年你改變咗我好多負面嘅諗法，但係唔夠㗎，我始終對我哋畢業之後嘅將來悲觀，我真係好擔心，我哋會連埋份感情都一齊畢業。」講到呢度佢開始眼泛淚光。
「有一日，我喺度諗，與其我哋乜都唔做，任由我哋嘅感情變淡，甚至鬧得不快收場，不如由我哋自己親手引爆。」聽到呢度，我有少少唔係好信自己對耳。「只有咁樣，我哋先可以喺一個完全受控嘅環境之下和平分手，唔會憎恨對方。然後放心去認識呢個世界。我有信心，我哋將來始終都會喺返埋一齊。」
認識世界其實係我哋協議分手嗰陣嘅理由，只係唔知有咁多前因後果所以然來。我哋讀政治，有一門課程叫 Crisis Management，簡單嚟講就係危機處理嘅學問。如今 Colette 打算學以致用，要嚟 manage 我哋嘅感情。
坦白講，我一時三刻真係唔識點駁佢，但係唔代表我完全同意。
佢見我shell shock緊，於是輕輕拍一拍我，然後好認真咁望住我，同我講：「我知你愛我，但你有時會係一個完全無心肝嘅人（我仲記得佢嘅用語係 heartless little shit sometimes……），個人又衝動又易𠱁，所以當你做任何決定，或者面對任何誘惑嗰陣，我要你記住一樣嘢：你係屬於我嘅（you are mine)。做任何嘢之前，諗一諗我；只要我哋知道自己做緊乜，只要我哋個心有對方，我覺得我哋始終都會喺返埋一齊。」
嗰晚我好夜都瞓唔著，腦海中諗起一件往事：
Colette 因為跟媽媽姓，所以有個唔難串、但唔係人人識讀嘅法國姓，由於不時要教人讀佢個姓，佢經常都感到困擾。有一日，呢個情況又再發生，佢好有耐性咁教完人讀之後，同我呻咗句：
「如果我姓馮，叫 Colette Fung，咁幾好呢。」然後佢望住我。
正如佢所講，我有時的確係 heartless little shit，我當時只係隨口答咗句「白人有個中國姓，好怪啫」，然後冇再放喺心。
其實，會唔會呢個先係解決問題嘅方向呢？
（待續）
