上一篇嗰個 Netflix 式嘅結尾出咗街之後，我幾乎 feel 到自己俾人咀咒咗幾日（講笑啫，我知你哋唔會嘅）。問題係，你哋認為我會將我個 ex-gf 嘅故事寫成甜故俾你哋丁咩？少年，你太年輕了。
實情係，當日我女朋友千里迢迢咁由華盛頓飛咗嚟漢城，book 咗成個星期嘅五星級酒店準備開大餐嘆我；就算廿年後嘅今日諗返起成件事，我個腦第一時間能夠process 到而又出得街嘅都係得咁多。
小睡過後，我慢慢醒咗。由於冇戴表，我唔知瞓咗幾耐，從窗外嘅光線判斷，應該大約係黃昏六七點左右。Colette 喺塊連身鏡前面左扭右扭咁照緊鏡，佢見我醒咗，就問我：「我係咪肥咗呀？」
「唔覺呀。」我口嗰句同心嗰句都係咁答。
男人同女人喺量度體重上面嘅度量衡單位根本就唔一樣，女人睇嘅係小數點後四個零，男人睇嘅係十位數，即係你唔係肥咗十磅八磅的話我根本就察覺唔到；就算察覺到，你俾個天我做膽，我都未必敢出聲。
更何況，Colette 係有腹肌嘅鋼條型女仔，講真，肥得去邊吖！
「你唔好咁情深咁望住我，我哋分咗手㗎喇。」Colette 見我入晒神，就補咗呢句。
「分咗手你又同我上床？」呢樣嘢我想問咗好耐。
「分手還分手，造愛還造愛，兩件事嚟㗎。」佢一路講一路行埋嚟，坐低喺床邊。「分咗手你又繼續同我造咗大半年先問呢個問題？」
好問題；法官大人我冇嘢問。
「唔係過到嚟呢邊我都冇認真諗過呢個問題嘛。」我好老實咁答佢。
「你識咗第二個女仔？」佢突然好認真咁望住我，但我知道呢個眼神係冇惡意嘅，唔係想發脾氣嘅眼神。
「冇，去邊度識喎？」咩唧，咁係冇吖嘛，俾人撞到飛起連姓甚名誰都唔知，點算識喎。
「我都知你冇，嘻嘻！」我分唔到佢嗰聲「嘻嘻」係開心定係恥笑。
「你又點知？」你識讀心術咩？
「同你造嗰陣 feel 到。」嘩！你下面係測謊機嚟㗎？
「即係乜嘢 feel？」我唔明。除咗快感同高潮，造愛嗰陣仲可以有咩 feel？
「唔識講你聽，總之你冇咪得囉！我哋分咗手㗎喇，但你係屬於我嘅。」佢講咗第二句我聽唔明嘅嘢。
「咁即係點？」我問。
「你記住就得喇，唔使明㗎。」佢係咁答，我當然係繼續唔明。「我肚餓喇，又話帶我去食嘢？」佢轉移話題。咁多年來，當佢唔想再糾纏喺某話題上，佢都會選擇扯開話題；收聲同發老爛從來都唔係佢嘅所為。
「啱啱先食完個全餐你咁快又餓？」既然佢唔想糾纏，我都唔想破壞氣氛，唯有開個玩笑講第二樣。
「我真係肚餓，我哋去食嘢先，夜啲先再收拾你。」佢嗰千幾銀蚊美金應該係嚟又食又拎嘅。
我同佢去咗忠武路，當日曹先生帶我去食嗰間韓國料理，因為我記得呢間係我暫時見過最靚最傳統嘅韓國餐廳，而且仲有韓燒食。
我哋叫咗二人份嘅炭燒牛肋骨。上菜後，Colette 細細聲問我：「呢啲係咪 K-Town 嗰啲有 Doumi 嘅餐廳呀？」
喺度幫我哋燒緊牛肋骨個女侍應聽見「Doumi」之後，啤一啤 Colette。
「唔係啩，都唔似……」其實我唔知，更加唔想俾人踢出門口。
「不如搵個 Doumi 嚟坐吓吖，再唔係呢幾日我幫你搵個韓國女朋友陪你吖！」好明顯佢放緊地雷。
「好呀！你講㗎！」你鍾意玩嘢我梗奉陪㗎。
「你就想呀！搵個 Hae-Kyung 俾你好唔好？」Hae-Kyung 喺我哋喺 LA 嘅韓裔舊同學，五尺四/百四磅，從來冇人見過佢停口唔食嘢。
可能係肚餓，可能呢間嘢啲炭燒牛肋骨真係好好食，我哋兩個總共前後食咗四人份量嘅韓燒。埋單嗰陣個老細親自拎單過嚟，順便睇吓呢兩隻生大食癪嘅外國人究竟咩料。
飯後，我哋沿路行咗落明洞 window shopping，然後我帶咗佢去鍾路附近嘅一間 disco，係我朋友 Sammi 提過本地人會去蒲嘅地方；我係唔會去梨泰院同啲美軍一齊跳舞然後睇住佢哋醉酒鬧事嘅。
落到去啱啱好係慢舞時間，我同 Colette 出咗去跳舞。話就話跳舞，其實我哋只不過係隨住音樂互相依偎；我哋兩個都唔係跳舞嘅材料。佢倚傍住我心口，我哋冇傾計，有啲時候無聲勝有聲；一切都彷彿返到去高中畢業舞會當晚咁……
當年嘅 Colette 仲係一隻「醜小鴨」（佢係咁話自己），比同級同學嬌小嘅身型、一棚鋼牙加一把又長又厚嘅頭髮、戴住個七八百度近視嘅厚眼鏡、好多時都係同學嘅取笑玩弄對象。我約佢去舞會唔係因為同情佢（我冇咁偉大）或者冇女約，而係我一直都俾佢嘅冰雪聰明同善解人意所迷住；我好鍾意聰明嘅女仔，亦都唔係好在乎佢靚唔靚。
直到大學開學前個鬆啲月，某日佢約我出嚟，我完全唔認得眼前嘅佢 — 鋼牙冇咗、髮菜拉直咗偷薄咗、眼鏡唔見咗、仲化咗個淡粧，加上佢深深嘅輪廓同碧綠嘅眼睛，醜小鴨一夜間蛻變成小美人。
冇幾耐我哋就開始咗。後來佢話我聽，其實佢早就 feel 到，不過唔想自己成隻怪獸咁同我一齊，佢話驚自己會自卑。
清晨五點半，我嘅生理時鐘叫醒咗我。喺韓國嘅日子，我每日都係五點半起身去跑步。
八月漢城嘅太陽非常勤力，漸強嘅晨光透過窗紗，零星散落喺熟睡中嘅 Colette 半裸嘅背脊上面。
我唔想整醒佢，輕輕咁微微坐直咗個人，點咗支薄荷萬，思索緊佢琴晚同我講嘅嘢。
「我哋分咗手㗎喇，但你係屬於我嘅。」
（待續）
