初雪（拾肆）
明白我已欠你太多嗎
我好討厭打交！我好討厭打交！我好討厭打交！
好很重要所以講三次。
「打交」呢個動作，本身就已經係一套「七傷拳」 — 傷人七分、損己三分。你唔戴套（拳套）兜口兜面舂人一拳，人哋爆晒缸就固然傷，你自己個拳頭同人哋個頭骨顴骨硬碰，點都紅腫痛返一兩日。
更何況，我又唔係葉問李小龍，街頭爛仔交嘅嘢，你打人十拳，點都中返兩三拳；就算俾你打贏咗，返屋企都係要捽跌打酒；何苦呢？
暴力的確解決唔到問題，但係可以解決形勢（situation） — 特別係，如果個形勢會危害到初雪嘅安全的話。
人生除咗喺擂台同練習場外嘅少數幾場拳頭交，100%全部都係為女人打；呢啲就係命。
醫生，唔打交得唔得呀？
Day 15，接近中午時份。
「哥哥早晨！」初雪粉臉微紅、一起身就好嗲咁攬住我。
見到佢呢個樣，我不其然諗起，我哋琴晚（即係今朝清晨）做嘅「好事」……
是咁的，琴晚光正走咗之後，我哋都各自返房休息。正如之前所講，龍門客棧嘅暖氣唔係好夠，喺溫帶地區住過嘅都會知，一日最凍嘅時候，係日出前後一兩個鐘；喺三月嘅冬春交替季節，呢啲時份一般都仲係零度甚至零下嘅氣溫。
凍，加上我同初雪都唔多鍾意著厚衫瞓覺，於是我哋喺被裏面攬得好實；乾柴烈火、攬吓攬吓……雖然，到最後我哋都仍然守得住，冇發生關係；但係，都只係差冇發生關係……（同個「交」字有關嘅愛情動作都冇做過嘅）
與其話我守住我嘅所謂「原則」唔同佢發生關係，不如話我唔捨得同佢發生關係，會更加貼切。大家經歷嘅嘢多咗、了解多咗，我更加珍惜初雪呢個女仔，唔想隨便咁同佢發生關係。
如果，我呢個採訪可以無限期咁繼續做落去就好喇……
晚上九點，賓館大堂。
唔知點解，我同初雪好似都唔太鍾意留喺房，所以我哋食完飯就坐咗喺大堂。驚做錯事？唔會啦，返到去延吉要錯大把機會啦……
「哥哥呀，」初雪喺門口鐵閘嘅路軌上面玩緊「踩鋼線」；撇除佢嘅身體同埋嗰份被迫嘅職業，其實佢只係個廿歲嘅細路女。「咩叫『記者』呀？」
佢講完後，行咗過嚟，坐喺我隔籬。
「上次聽你同朴太太講，你係『記者』，我都想問你㗎喇；但係又唔記得咗喎。記者係做啲乜㗎？」
「記者會去好多地方，記錄唔同嘅嘢，然後寫成文章或者故事，喺報紙雜誌刊登。」我拖住佢隻手答佢。
「咁咪即係幫政府做嘢囉？」佢一臉天真。「喺朝鮮，報紙都係寫政府同黨嘅。我間中都會去村辦公室門口睇報紙㗎！」
「咁又唔一定嘅，香港嘅報紙係私營嘅；」我答佢。「雖然好多香港報紙都會幫政府講嘢，希望有朝一日成為政府喉舌；但係，佢哋基本上都係獨立運作，同政府冇乜關係嘅。」
「哦……」佢似懂非懂咁。「咁哥哥會唔會寫初雪嘅故事㗎？」講完後，佢眼碌碌咁望住我。
「會㗎！」我笑住答佢。「咁你想我點寫吖？」
「唔……」佢好認真咁諗。「可唔可以寫得我高啲、靚啲，同埋……係個女俠呀？」
我覺得佢誤會咗我係寫小說囉……
我哋喺度談天說地之際，朴太太都拎住個食物盒落咗嚟。我哋一齊食完飯後，佢就返咗上房安頓金老太休息。估唔到佢都會落嚟「打墩」 — 鬼咩，上面對住四道白牆，乜都冇；瞓唔著的話，又係幾折磨嘅……
「我會唔會阻住你哋談情呢？」朴太太笑笑口咁講。
「點會呢！」我答佢。「一齊傾吓偈啦，時間會過得快啲。」佢點頭。
我哋三個一邊傾偈、一邊食朴太太琴晚俾光正嘅「剩餘物資」點心。我知道初雪恨咗好耐，佢恨食嗰樣嘢嗰陣，對眼會釘住件食物唔放。不過琴晚見到光正，佢唔好意思食咁多。朴太太對初雪嘅身世好有興趣，初雪個傻妹亦都好老實咁講俾佢聽。我覺得，呢個女仔如果要喺中國長住落去的話，佢唔可以繼續咁老實同咁信人。
不過，我擔心啲乜吖，佢都唔會喺中國長住……
傾到大約十一點，賓館老闆返嚟。佢見到我哋仲喺度傾偈，就問我哋：「你哋琴晚都見完親人啦，點解仲唔走嘅？咁夜，你哋仲唔返房瞓？」
「我哋今晚等緊朋友呀，」我答佢。「聽日我哋就會離開圖們。」
「早啲返上房啦，」老闆語重心祥。「記得鎖好門窗呀！世道險惡，呢一兩年，圖們治安都唔係咁好……」
「呢兩年發生咩事？」朴太太問佢。
「呢，嗰邊啲人囉……」老闆指一指圖們江嘅方向。「有時就過嚟乞食，都冇問題，但係有時又會過嚟打劫殺人；早幾個月呀，佢哋過嚟殺人之後，仲將條屍拎返去朝鮮，聽聞要嚟食呀……」
我哋聽到，都俾佢嚇一嚇。
「食？」朴太太面露惶恐之色。「……唔會真係食人呀……」
「窮成咁，又唔夠嘢食，除咗食人仲可以點？」老闆嘆咗口氣。「中國人個個都肚滿腸肥，殺一個，可以食好幾餐喇。」
我哋面面相覷，一時間答佢唔到。
呢個時候，突然間外邊傳嚟幾聲腳步聲，我哋都打咗個突。
原來係申先生，仲有一個矮細兼黑黑瘦瘦嘅人同佢一齊。
「朴太太，我嚟咗喇。」申先生同朴太太打招呼。「我哋去處理埋啲手尾啦。」
「申先生，」朴太太指住嗰個矮細嘅人。「呢位係……」
「佢係明根，」申先生答佢。「係我嘅幫手。」朴太太好猶豫咁點頭。
「嚟啦，我哋去搞埋啲手尾啦。」講完，申先生同明根轉頭就行。
我哋三個喺冇選擇餘地下，唯有跟住佢去。
我哋五個人，行咗大約十分鐘，去到一個四野無人嘅草地上面 — 與其話係草地，不如話係草地再加上俾人棄置廢棄家具雜物嘅地方。草地離馬路唔遠，向另一個方向再行幾分鐘，應該就會到圖們江邊。
帶頭嘅申先生行到去一張爛木檯前面就停低咗，然後佢同朴太太講：
「朴太太，錢呢？」
「喺呢度；」朴太太喺袋度拎咗一個公文袋出嚟。「五萬蚊美金，麻煩你點清楚。」
申先生收咗錢之後，就借助明亮嘅月光、喺爛木檯上面點數。從嗰疊銀紙大細嚟睇，我估計應該係美金一百蚊紙；否則，唔可能一個公文袋就放得晒。
喺佢點緊數嘅同時，同佢一齊嚟嘅明根就一直監視住我哋。我有留意到，明根嘅手一直到捽住自己嘅腰股之間嘅位置，就好似啲老人家腰痛咁。由於呢個動作並唔係乜嘢危險動作，所以我亦都冇乜特別留神 —話晒都要攀山涉水咁過嚟， 你唔俾人哋真係腰痛咩。
「兄（ 형님 ），你點好數未？夠唔夠？」明根問申先生。
「明根呀，呢度唔係好夠光呀，」申先生答佢。「你等陣啦，唔好咁心急。」
明根再冇答話，只係繼續捽佢條腰。
呢個時候，初雪突然間行咗出嚟，企咗喺我前面。佢企嘅位置，正正喺我同明根之間。
「初雪，你做乜呀？」我細細聲問佢。
說時遲，那時快，明根突然向初雪一拉，然後箍住佢條頸。佢捽住條腰嘅右手，突然多咗把鎗，指住初雪嘅太陽穴。
「全部唔准郁！」明根大喝一聲，然後將鎗指向申先生。「將啲錢放返入個紙袋度，拎過嚟俾我！」
「明根你做乜呀？！」申先生亦都向明根大喝。
「將啲錢俾我！」明根有少少歇斯底里。「如唔係我先殺咗佢，然後殺晒你哋！」佢再將鎗指向初雪。
由於月色嘅明亮，我睇得到明根手上揸住嘅，係一支類似華特PPK嘅小口徑手鎗。喺北韓要搵支德國或美國製手鎗，斷估都唔會太容易；我認定呢支應該係黑星六四式，亦即係PPK嘅翻版。
呢個時候，挾持住初雪嘅明根有想向後退嘅跡象。我知道，如果要郁手的話，就係而家；否則，佢將會離開我可以近距離制服佢嘅範圍。所以，我決定賭一鋪。
我決定搏嘅主要原因，係因為一旦佢攞到錢，佢真係會有可能殺晒我哋滅口。黑吃黑嘅嘢，從來都係咁運作。
我一個箭步上前，一隻手㩒落明根嘅手鎗度，然後將手鎗「滑架」向前（我嘅前佢嘅後）一推，直至到我感覺到滑架完全向後移位。我嘅左手就用力將初雪向外拉開。呢個時候，鎗口正正指住我心口嘅位置 — 我當然唔會搵初雪條命嚟「教飛」。
當初雪向一邊跌開嘅同時，明根嘅直接反應，就係向我開鎗！
啪。
板機扣動，但係鎗聲冇響。啪嘅一聲，係板機空響嘅聲音；我賭贏咗！
是咁的，我喺美國讀書嗰陣，我嘅監護人兼uncle，係個註冊鎗匠、開鋪靠賣鎗整鎗為生。由十二歲開始，我就每日對住各式各樣唔同嘅鎗。未夠十六歲，我已經識得由零件還原絕大部份嘅「曲尺」型手鎗。拘拘一支PPK或者黑星，根本難我唔到。手鎗嘅設計，萬變不離其宗；我只要將滑架向後推，滑架就自然會頂住撞針；佢點「掹雞」都開唔到鎗。
如果係左輪的話，我就會摙住個輪；同樣都係開唔到鎗。
喺連扣兩三吓板機之後，明根亦知道開唔到鎗。喺佢腦海中，應該會認為係「手鎗失靈」。果然，三吓過後，佢將鎗掉喺地上。
我用㩒鎗嘅手將佢拉埋我身前，另一隻手足住佢衫領。由於高度嘅分別，佢埋到我身前，大約矮咗大半個頭。我實在抗拒唔到呢個「高矮分別嘅誘惑」，於是用我嘅前額，向佢嘅鼻樑位置，使出「櫻木頭槌」！
兩吓頭槌過後，我感覺到佢身體軟咗落嚟，應該係頭暈啩？於是，我想用一吓「背負投」將佢掟開。唔知係因為緊張定點，我嘅背負投變咗將佢舉起、凌空成個掟開！原來要掟開一個矮細嘅男人，比我想像中容易。
掟開咗佢之後，我喺地上執返起支鎗，清除咗因為㩒滑架嘅jam彈之後，我向明根落地嘅方向開咗一鎗 — 我肯定我唔會打中佢，我只係想嚇走佢。果然，聽到鎗聲後，明根半爬半跑咁，向圖們江嘅方向好狼狽咁走咗。
我扶起跌咗喺地下嘅初雪，問佢：「你有冇事呀？」
「冇事。」初雪企返起身。雖然喺月色下，佢顯得有啲蒼白，但我諗都係嚇親吓啫，無嘢嘅。
控制咗場面之後，我用鎗指住申先生。
「舉手。」我同申先生講。
「唔……唔關我事㗎……」申先生滿臉惶恐咁舉高雙手。「明……明根只不過係我哋新加入嘅跑腿，我真係……我真係乜都唔知㗎！唔好開鎗呀！」
「跑腿？」我行到申先生前面，將佢擰轉身趴咗喺爛檯上面，然後搜佢身。申先生身上，除咗一個爛嘅銀包之外，乜都冇，亦都冇鎗，甚至連刀仔都冇把。我打開個銀包睇，冇錢，但係有張北韓嘅「公民證」。做賊做到你帶身份證出街咁戇鳩？！你都抵死咯！
「申昌華，地址係穩城郡下三峰里東浦洞二街四號，已婚；」我將佢公民證上嘅資料讀出嚟。「如果我將呢啲資料交俾人民保安部，唔知會點呢？」
「先生饒命呀！」申先生求饒。「剛才嘅事……真係唔關我事㗎！你哋都俾咗啲錢我啦，我仲點解要搶劫你哋喎！」
「係啦……先生，」魂魄唔齊嘅朴太太叫住我；佢夾硬吞返我個馮字。「我諗……應該唔關佢事嘅……」然後佢細細聲喺我耳邊講：「光正嘅事，仲要佢哋幫忙。我睇，唔好搞大件事喇……」
其實，我都冇諗住玩嘢；不過係想嚇吓佢啫。
「起身啦你，」我同佢講，佢喺檯上面起返身；我亦都收起支鎗。
我將個銀包交還俾佢，然後同佢講：「今次嘅事，我信你。但係如果日後朴太太嘅親人有乜嘢事嚟唔到中國的話，我就將你嘅資料，寫告密信寄俾人民保安部。後果會點，你自己諗啦。」
申先生誓神劈願會好好照顧光正，又話會保證佢嘅安全。之後，佢飛快收拾好檯面嘅錢，然後就同我哋道別，向圖們江嘅方向走咗。
呢個時候，路邊有兩盞車頭高燈照過嚟。然後，我聽到一把聲音：「小馮，你們沒事吧？」係東元；佢應該係聽到鎗聲過嚟搵我哋。日子耐咗，我開始明白，點解我老總咁信佢：因為佢可靠。
「沒事，我們走喇！」我答佢。然後拖住初雪、同朴太太離開草地。
上車後，我感覺到初雪嘅手好濕；我以為係佢緊張嘅手汗，攞紙巾一抹。點知，我見到係血！
「初雪，你受咗傷？」我情急咁問佢，朴太太同東元亦都望咗過嚟。
「哦……」佢答我，伸出佢嘅左手。我一睇，見到滿手都係血。當我稍稍抹咗佢手上嘅血再睇，我見到喺掌心一條兩吋長嘅傷口。
初雪為咗我而受傷，我嘅惡夢竟然成真……
願讓我隔於空氣吻著你 更想清楚可見你 細語夜靜時滿心歡喜
掛念時候合上我雙眼 如蜜餞聲音去又返 讓思念摸索你 面容像已清減 從未心意冷 每想到你易添夢幻 化身你面前心寄盼 這感覺為何更浪漫 在我生死之間
是你嗎 是愛嗎 是你出於真心日日夜夜彷彿漆黑中說話 像那一顆星星海角天邊 讓我彷彿之中可望見 留下這句這句說話 而非一般的對話 明白我已欠你太多嗎
（待續）
本故事人物及情節如有雷同，實屬巧合。分享至
成為作者繼續創作的動力吧！
© 2024 vocus All rights reserved.