風雨中抱緊自由
事情嘅發展越嚟越複雜，意料之外嘅複雜。
其實又唔係咁意料之外嘅，我呢幾年嘅男女關係，基本上鑊鑊都係咁上下啦。個個都話做住朋友先、個個都話上嚟我屋企坐吓、個個最後都坐埋上我張床度；扮乜鬼嘢矜持喎（講緊我自己）。我之所以咁耐都忍住、唔敢同初雪發生關係，除咗係我對自己嘅承諾之外，其實我最怕嘅，係一但我同佢有咗親密關係之後，我會事事都顧慮到佢，唔可以真正發揮一個記者應有嘅本份。
問題係，而家就算冇發生關係，我同佢，都好似開始對對方投入感情。
感情影響到一個人嘅主觀判斷。冇事冇幹嗰陣，呢種主觀判斷最多影響你某晚明明想食小菜、結果俾條女扯咗去排兩個鐘隊食元氣。但當你要面對危險嗰陣，呢種感情因素嘅影響，就可大可少。一個搞得唔好，我哋兩個都會有危險。之但係，當一個女仔肯為你豁出去、同你you jump I jump；我實在再冇藉口去拒絕佢。
唯有萬事小心啲啦……
同日晚上，延吉某韓國餐廳貴賓房。
（點解個故事進展咁慢㗎？因為呢個係主線故事嘛，冇得我斷捨離喎。你哋當呢篇係口述歷史咁睇，觀感就fit晒。）
仍然係呢幾日嘅usual gang：我、初雪、東元、啱啱到步嘅朴太太同金老太。雖然大家都冇做出一啲令人尷尬嘅舉止，但係我哋嘅目光，都有意無意集中喺一個人身上 — 韓先生。佢係東元嘅朋友、傳說中嘅「脫北者」。
可能大家會覺得我大鄉里，但係呢次係我呢世人第一次有機會接觸一個脫北者。雖然，喺韓國嘅三年時間，我都有遇見過脫北者（仲唔只一次）；但係好似而家咁，有機會同個喺北韓「叛逃」嘅人同檯食飯、兼且傾談脫北嘅事情，呢次尚屬「處女洞房」。
眼前嘅韓先生 — 坦白講，同我腦海中嘅脫北者stereotype不盡相同。大約半百之齡、微胖嘅中年發福身型、一派生意人嘅裝束、流利嘅韓國標準語，其實佢比較似個喺東大門做批發嘅生意佬。
「韓先生，」可能同我有同一種感覺啩，朴太太先開聲問韓先生。「你去咗韓國幾耐喇？」
「五年喇，」韓先生笑一笑。「我喺新堂洞住同做小生意做咗五年，最近同朋友夾份，嚟延吉嘗試做吓呢邊嘅小生意。」
新堂洞最著名嘅，係好似鴨記咁嘅店鋪、專賣平價同二手家電同夜冷傢私之類；唔怪得之佢成個生意佬咁款。
「習唔習慣漢城嘅生活？」朴太太再問佢。
「落差太大，好難習慣呀……」韓先生嘆咗口氣。「漢城無論工作定做生意，都非常困難……延吉好得多喇。」
「韓先生嚟咗延吉幾耐？」我插嘴問佢。
「差唔多一年喇，」佢拍一拍坐佢隔蘺嘅東元膊頭。「好彩得佢幫手，我先順利落腳延吉。」
原來東元連移民顧問呢瓣都撈埋！點夠佢撈呀……
「係呢，」最心急嘅，果然係朴太太。「你當日係點解會離開北韓㗎？」
「說來話長，要由上一代開始講起。」韓先生開始進入講故mode。「其實喺625戰爭前，我哋都係南方人嚟。當戰爭開始迫近洛東江（金海/釜山外圍）嘅時候，我父母一家人、連同大伯一家人一齊北移逃難。由於我媽媽係開城人，於是，我哋一齊去咗開城逃避戰火。當時我一歲，呢啲故事都係喺父母嘅口中聽返嚟。」
「後來，美國人喺仁川登陸，戰火由洛東江一帶，好快就轉移到漢城同板門店附近。由於有逃難嘅人帶嚟消息，話美軍正準備向北推進、已經過緊臨津江、好快就會進入開城；為咗避亂，長輩們決定先行離開開城，等待一切平息後先至返嚟。但係爸爸同大伯對於避難路線有分歧；爸爸認為應該向北走，大伯認為應該向南逃。」
「爭拗不下，結果大伯提議大家分道揚鑣，認為假使是但一家有危險，都希望另外一家可以生存落去。於是，我哋一家人、連同爺爺嫲嫲，就往北逃難，最後喺南浦落腳；大伯一家人，就去咗漢城。」
「後來，美國人喺鴨綠江一帶俾中國軍隊壓返落去現在嘅三八線一帶，戰爭開始膠著。但同時地，我哋喺北面後方嘅難民，就開始被政府清算。佢哋認為我哋係南方政府派嚟嘅間諜、或者係叛國嘅資本家。於是，我哋同好多由南方逃難去北方嘅家庭一樣，被一家一家咁送去唔同嘅勞改營、接受再教育。呢個時候，逃走已經係天荒夜談，因為如果逃走被軍隊捉到的話，只有死路一條。」
我哋一邊好留心咁聽緊韓先生講故事，一邊好唔專心咁食緊晚餐。當韓先生講到去勞改營接受再教育嗰陣，初雪伸咗隻手過嚟、拖住我隻左手；我感覺到佢隻手嘅冰冷。初雪係個「暖女」（因為食得多？），無論任何時候我拖住佢或者攬住佢，佢都係好暖嘅；同而家嘅冰冷好唔同。可能，佢將韓先生嘅遭遇，同佢爺爺嘅混為一談……
「我哋一家人喺勞改營住咗兩三年，然後就放返出嚟；但係我哋已經唔可以返去南浦或者開城生活，因為政府話我哋出身成份唔好，唔可以住喺大城市。於是，我哋被分配到北方嘅江界市外圍嘅地區生活。」
「因為你哋係敵對階層？」初雪開口問韓先生。
「你都知道呢樣嘢？」韓先生有少少詫異。
「係，」初雪答佢。「惠山。」
初雪有意無意間暴露咗自己嘅身份。東元本身就已經知道呢件事，兩位南韓女士好似仲未明白初雪呢句「惠山」嘅意思；韓先生亦都唔係太大反應，只係同初雪點咗一吓頭，然後就繼續：
「務農嘅日子唔算太難捱，起碼有自生自滅嘅自由。時間過得好快，眨吓眼就二三十年。喺八十年代，我結咗婚，有個女；一家三口，同埋父母清茶淡飯，都叫有啲安樂日子。喺九零年某一日，我哋收到由漢城帶嚟嘅一封信，係大伯嘅訊息。原來，從停戰後開始，大伯一直經唔同嘅途徑尋訪我哋。」
「喺九十年代，大伯經已成為韓國嘅富商，」韓先生呷咗啖茶、然後繼續。「佢用咗好多方法、疏通咗好多人，喺南北分裂接近四十年後，佢終於搵到我哋。由於大伯嘅疏通，我哋一家人都開始有啲好日子過；江界市嘅官員亦都開始對我哋有特別嘅照顧。呢啲好日子，過咗大約兩年。」
「咁你大伯有冇諗辦法，接你哋嚟韓國團聚？」甚少出聲嘅金老太問韓先生。
「有，大伯用咗好多方法，去疏通有關嘅官員；」韓先生答佢。「但係，呢個時候，發生咗啲意外。江界市嘅官員，因為營私舞弊被拘押，佢嘅辦公室同屋企都被查抄。我哋同大伯、大伯同官員之間嘅通訊全部被揭發。我哋全家無辜受牽連，被保安員帶走，收押到价川第十四號管理所。」
一聽到「价川第十四號管理所」，我感覺到初雪打咗個冷震。
「你冇事吖嘛？」我喺佢耳邊問佢。
「地……地獄呀……」佢好細聲咁答我。
「管理所同勞改營唔同，係真正嘅『地獄』；」我唔知韓先生有冇聽到初雪嘅說話，反正兩個先後都提到「地獄」呢個名詞。「一家人喺裏面嘅生活，比死更難受。管理所裏面環境非常惡劣、食物嚴重短缺，所有人都有長期病；再加上不定期嘅嚴刑迫供，冇人會捱得住。我老婆同女兒，喺入去冇幾耐，就因為被守衛……輪姦同虐打致死……佢哋冇人性到輪姦一個得十歲嘅細路女！一年後，我父母……都先後餓死同……」
韓先生講到呢度，忍唔住喊起上嚟。我哋於是暫停話題，等佢平復心情。
「韓先生，我好抱歉，你遇到嘅慘劇；」朴太太滿臉內疚。「不如我哋唔好再講落去喇……」
「唔緊要，」韓先生抹乾眼淚、深呼吸，然後繼續講落去。「反正，呢啲故事最好就傳揚開去，等全世界都知道，北韓金氏父子同佢哋手下呢班共匪（ 빨갱이 ）嘅惡行！」
「當時我爸爸病得好嚴重，佢係我仲剩低嘅最後一個親人。我扶住佢，去跪求守衛俾佢睇醫生；點知……佢哋喺我面前，用鐵鎚將我爸爸監生打死……」
韓先生停咗落嚟、抹眼淚、然後繼續：
「喺管理所嘅第三年，日子特別難過，」韓先生心情應該平復過嚟，語氣亦恢復平靜。「唔知乜嘢原因，原本已經少得可憐嘅口糧，呢一年就更加少；每個囚犯每日，就只得一湯羹發臭有蟲嘅雜糧，好多人都無聲無息咁死亡。我亦由原本嘅採礦工作，被編配去處理屍體。」
呢個時候，我再感覺到初雪打咗個冷震；睇嚟佢真係感同身受。
「由於每日嘅死亡人數太多，唔夠燃料去焚燒所有屍體，我哋只好將屍體堆積喺營區北面嘅一個角落，任由佢哋腐爛發臭。有好多同務因為接觸腐屍染上傳染病，亦有人因為食死屍肉染病，結果帶病工作直至死亡……」韓先生嘆咗口氣。
「有一日，我感覺到自己嘅身體虛弱得好緊要，我知道自己大限已到。當我喺屍體堆前面喘息嗰陣，有守衛叫住我、然後將我帶到去營區嘅另一邊。我以為我終於得到解脫，因為佢哋好多時都會將就死嘅犯人帶到冇人嘅地方，要佢哋為自己挖掘墳地、然後秘密處決。」
「佢帶咗我去一個辦公室，然後就叫我喺裏面等。」韓先生面色開始轉好。「喺管理所三年，我第一次去守衛嘅辦公室。雖然同村嘅辦公室差唔多，但係已經係我三年嚟去過最好嘅地方。等咗唔知幾耐，有一個守衛攞咗碗粥俾我！係一碗粥！幾年嚟，我第一次見到咁大碗粥！」佢指一指檯面一隻飯碗。
「我狼吞虎嚥咁食咗碗粥。之後過冇耐，有一個比較高級嘅守衛入咗嚟，俾咗一套比較新淨嘅衫褲我，叫我換咗佢，話有人要見我。我換好衫後，佢帶咗一個軍人入嚟，軍人同我講我已經獲釋，國家將我重新分配到滿浦市；佢負責安排我過去。就係咁，我竟然活著離開地獄，移居位於中朝邊境嘅滿浦市。」
聽到呢度，我望一望在場嘅三位女士；不出所料，佢哋都滿面淚水。
「就係咁，你就開始你嘅脫北計劃？」朴太太問佢。
「可以咁講嘅，不過，其實整個脫北計劃，我都只不過係依計行事；」韓先生答佢。「後來我先知道，原來我之所以能夠出獄，完全都係因為大伯鍥而不捨嘅疏通。錢可通神，佢經過好多重嘅功夫，最後搭上咗張成澤，一個真正有實權嘅北韓高層人物；咁樣我先可以逃過一劫。可惜，我全家上下四口，都已經枉死……」
又係張成澤……呢個名字不斷喺唔同嘅人口中出現，俾我嘅感覺，佢先至係真正嘅北韓「影子揸fit人」。
年月把擁有變做失去
疲倦的雙眼帶著期望
今天只有殘留的軀殼
迎接光輝歲月
風雨中抱緊自由
一生經過彷徨的掙扎
自信可改變未來
問誰又能做到
（待續）
本故事人物及情節如有雷同，實屬巧合。
