初雪（叄）

一個香港記者、一個朝鮮女侍、一個東北朝鮮人；我呢個「團隊」，都叫做「夠腳」開工喇。

只不過，呢個團隊能唔能夠做到嘢、交到貨，就只有天知。

做呢類嘅專題記者嘅生涯就係咁，先嚟一條捕風捉影嘅題目，然後就漫天打鳥咁去搜證，嘗試將喺方圓幾百公里嘅地上執到嘅毛髮，還原成為一隻駱駝，然後說服讀者，呢隻其實係馬。

點都好，執毛旅程係時候展開。首站目的地：吉林省圖們市。

去圖們睇乜？睇條毛囉。

Day 3，302國道往圖們方向路上。

薑都係老嘅辣。乜都唔好講，東元呢條老油條，真係幾識嘆。呢一點係我坐喺佢架現代Sonata上面領悟到嘅，佢揸緊Chloe媽媽嗰架同級同款嘅Sonata；即係話，佢同漢城嘅富婆品味相若。

「哥哥呀，呢隻魷魚絲好好食呀！」初雪將一條魷魚絲放喺我口邊。「你食唔食呀？」

「我唔食喇，你慢慢食啦！」我答佢。由琴晚到而家，呢包係佢嘅第三包魷魚絲；呢條女嘅消化系統非一般的強。

「東元，你架車好舒服，」我用韓文同東元傾計，方便初雪都聽得明。「呢款車喺中國貴唔貴㗎？」

「幾十萬左右啦，比韓國貴；」東元答我。「因為我經常要接待韓國嘅客人去玩，所以要架靚啲嘅車；你知啦，客人至上嘛！」

「原來你除咗賣紀念品之外，仲有接待遊客㗎？」我繼續講。「咁你對東北嘅旅遊業都好熟悉？」

「熟悉，非常熟悉；」東元突然轉台講國語。「你的女朋友，應該不是南韓人吧？」

薑真係老嘅辣。雖然我知道，「穿煲」只不過係時間嘅問題，識聽嘅一定聽得出；但係，我冇諗過會係第一日嘅第一個鐘……

「對，她是北韓人；」我答佢。「我們在延吉認識的。」

「呵呵，馮先生真的魅力非凡；」東元笑住講。「你不怕她會出賣你、洩露你的機密嗎？」

「不怕，她不知我真正身份，只道我是來做生意；」呢個時候，我突然變得煞有介事、壓低聲線。「萬一，如果她真的不識相，那我們只好用朝鮮的老套路對付她，把她交給『人民保安部』去處理好了。」

講完後，車上面靜咗一秒；然後就係我同東元嘅爆笑聲、同埋初雪望住我嘅不解表情。有時候，語言嘅障礙，其實都有美妙之處。

大約一個鐘嘅車程，我哋就到達圖們呢個中朝邊境城市。我以為東元會車我哋去市中心一帶睇吓，點知佢直接車咗我哋去邊境管制站。落車之後，我四圍望一望，前面就係圖們江，只要我上橋往前行，百步之內就會進入北韓範圍。

「你們喺呢度觀光一吓，橋上面嘅塔樓可以參觀；」東元指一指前面嘅牌樓。「我先去我嘅紀念品攤問一吓消息，然後等埋我弟弟；一陣我哋一齊食飯。」我點頭贊成。

東元離開之後，我同初雪就喺附近參觀。可能因為我哋嘅「買賣關係」將我哋嘅意識形態定咗位，呢兩日，初雪同我去任何地方，都係手拖手，就好似一對情侶咁。唔知點解，拖住初雪嗰陣，真係有一種情侶啱啱拍拖嘅「心跳感覺」。

究竟，我哋呢個「情侶」嘅身份，係咪真係只為掩飾？我都唔知；但係我唔抗拒。

我哋行到去橋頭位置嘅牌樓，守住牌樓門口嘅年輕武警見到我哋兩個就笑一笑，然後問我：「要上去看看嗎？二十元一位。喜歡的話，等會我還可以帶你們去橋中間看看北朝鮮！」

我擺低四十蚊人仔，然後拖住初雪上咗去牌樓頂；收錢嘅武警都跟埋上嚟。

喺牌樓頂，我可以清楚睇得見，北韓邊境管制區裏面嘅建築物，甚至可以清楚咁見到，佢哋辦公室牆上面掛住嘅金日成同金正日肖像。然後，我見到有一座應該係俾遊客用嘅投幣望遠鏡。當我正想埋去入錢玩吓之際，武警哥哥同我講：「那東西不管用了，用這個吧！」

然後，佢將掛喺心口嘅望遠鏡除落嚟遞俾我。

「謝謝啊！」我接咗個望遠鏡、道謝後，就用佢嚟睇吓嗰邊嘅情況。

「初雪呀，你想唔想睇吓？」我睇完後，想將個望遠鏡遞俾佢。

「傻哥哥呀，你唔記得我係由嗰邊過嚟㗎？」佢望住我笑，然後擰頭。

我笑一笑，然後繼續睇。

「你們是從哪兒來的？觀光嗎？」武警哥哥問我哋。

「是啊！我是從香港來的；」我答佢。「她可聽不懂你的話，她是從韓國來的。」

「香港嗎？我有聽過，」武警哥哥笑一笑。「你們那邊的警察，叫『皇家警察』吧？！」

「現在沒『皇家』了，就叫『香港警察』。」我笑笑口答佢。

「我很喜歡看你們的電影，」武警哥哥答我。「你們那邊的生活，跟我們的很不同；看了覺得很有趣！」

我哋參觀完牌樓之後，武警哥哥就帶我哋行上橋上面，一直行到橋中心。地上面有一條黃色嘅界線，界線前面以中韓雙語寫住「邊界線」。

「我們應該不能越界吧？」我問武警哥哥。

「有甚麼不能？」佢答我，然後向前行兩步，進入咗北韓嘅範圍。「沒甚麼大不了的。」

我跟住佢行前兩步，過咗邊界。就係咁，我無啦啦過咗北韓。我下意識望吓北韓方面嘅守衛，兩個守衛都只不過望一吓我哋喺度做乜，冇乜反應。反而初雪仍然企喺中國邊界線嗰邊，唔肯行前。

「初雪妹妹，你怕我拉你返朝鮮呀？」我笑佢。

「唔怕，反正四月我都會返去；」佢傻笑。「不過，界線嘅另一邊，令我感覺到肚餓，我唔想……」

參觀完邊境橋頭之後，我哋去咗停車場附近嘅紀念品小店，見到東元同人傾緊偈。

「怎麼樣？看完了嗎？」東元問我，然後指一指身邊嘅男人。「這是我弟弟東順。我們一起去吃一點東西，好不好？」我點頭、然後同東順握手。

我哋四個去咗紀念品店附近嘅一間好簡陋嘅小店，叫咗幾碗湯烏冬、一啲小籠飽同埋蒸飽。

「呢餐可能冇咁好味喇。」我向同我坐埋同一張長櫈嘅初雪耳邊講。

「唔係㗎，睇落都好好味吖！」佢亦都同我「咬耳仔」。

「東順，你能夠告訴馮先生，部隊裏面的情況嗎？」東元問東順。

「嗯……先頭部隊已經到位；」東順用手喺檯上面比劃。「琿春、圖們、白山、集安、一直到丹東。大部隊亦會在這幾天開始進駐，總數可能有十五萬。」

「十五萬解放軍不是個少數目，」我問東順。「你們應付得了嗎？」

「應付不了。很多都是從黑龍江那邊的中俄邊境抽調過來的，那邊的領導們都被迫瘋了；」東順頻頻擰頭。「有一部份較後時間會來的，都是從內蒙那邊的北京軍區抽調過來。」

「需要那麼多人嗎？」我問佢。

「整條中朝邊界差不多一千五百公里，十五萬人不算太誇張了。」佢呷住茶講。

「朝鮮那邊，真的要出大事嗎？」我繼續問，一邊食緊飽。

「這個說不準，他們鬧飢荒也鬧了好幾年了，人民吃不飽，還能由他們捱餓、自生自滅；軍人吃不飽的話，事情可就會鬧大；」東順分析。「張成澤（金正日妹夫；時任中央組織指導部第一副部長）那家伙也不是省油的燈，趁這機會策動軍方、來一場嘩變也不是天荒夜談的事……希望不要再來一次『抗美援朝』吧……」

「更何況，這些日子的邊境也太不安寧了，朝鮮過來作案的難民太多；連續發生了好幾宗乘夜潛入中國、然後搶劫殺人的案子。就這裏圖們市，短短幾個月已經十多宗，殺死了好些人，嚇得大家都不敢夜歸；領導們按耐不住，我們就要來接防了。」

「難民問題真的很嚴重嗎？」我問。

「對啊！你看看街角那邊；」東元指一指近停車場入口嗰邊。「那些要飯的，都不是中國人。」

「你怎知道？」我明知故問。

「這裏只會有不懂朝鮮語的中國人，哪會有不懂國語的中國人？」東元答我。

呢個時候，有一個深膚色、非常矮細嘅乞兒，企喺我哋幾張檯之外，眼定定咁望住我哋檯面嘅食物。

「小子（ 새끼 ），你好肚餓？」初雪開聲問佢，佢點頭。

然後，初雪將大半籠小籠飽、連埋兩個菜肉大飽放埋入籠度，再同佢講：「快啲嚟食啦！」

個乞兒接住個籠，然後退後兩步、就喺我哋面前狼吞虎嚥咁食。唔使三分鐘，佢已經食晒啲飽。

「仲有呀；」初雪再攞咗兩個飽俾佢。「未夠就繼續食啦！」個乞兒如言、狂風掃落葉咁掃晒兩個飽。

我喺銀包掹咗二十蚊人仔出嚟，遞俾佢，然後同佢講：「好好袋住，肚餓再買嘢食。」

「多謝……」仍然滿口食物嘅佢答我。

「你今年幾多歲呀？」初雪問佢。

「十六歲。」佢答。

十六歲？佢睇落只有十二歲嘅高度同體型……

「你家鄉喺邊？」初雪繼續問佢。

「南……南陽……」佢欲言又止，望住冇幾遠嘅兩個武警。當兩個武警開始「移動」嗰陣，佢立即放低個蒸籠、飛快咁走咗。

「這裏的公安武警會抓他們嗎？」我問東順。

「除非是『嚴打』的月份，否則一般來說都不會；」佢邊搖頭邊答我。「於心不忍啊！畢竟大家都是朝鮮族，他們也是餓得走投無路才過來要飯的，真的碰到也不忍心抓起來吧！被抓到回去，可算是死路一條……我們只抓罪犯、不抓平民。」

「但是在嚴打的月份呢……」東順繼續。「『紅頭文件』下來，我們也只好秉公處理。那些時候，看守所都擠滿朝鮮人，都等著被遣返。」

「那你知道，他們被遣返後的下場嗎？」我問佢。

「不好說啊！」東順嘆咗口氣。「一般來說，他們會被送去『集中營』。當中我們聽得最多的，就是近龍井那邊的會寧集中營；朝鮮人稱它作『地獄』。能不能活著出來，就得看運氣。我們也有見過，在會寧關過一次、釋放後再偷渡的難民。只不過，進去的人，多數九死一生。碰著運氣壞到極點、剛遞解回朝鮮隨即被就地處決的，也不是沒有。」

「過了圖們江，人命不值錢啊！」東元都嘆咗口氣。

食完飯後，東順返咗部隊開工，我哋三個就去咗圖們市區四圍行吓睇吓。

行到一個十字路口，東元去咗報攤買煙，我同初雪就周圍隨便睇吓。我留意到，喺大約廿米之外，喺高牆上有一個類似守衛塔嘅地方。憑經驗，我估計呢度就係圖們看守所嘅外牆。

由於我需要大量嘅配圖，所以我順手拎起相機對準守衛塔影相。影得兩張、突然有兩個手持AK-47S嘅武警向我衝過嚟、一邊喝：「不許拍照！」

「你是誰，幹嘛拍照？」其中一個持鎗武警問我，鎗口對住我。

我好憎人搵鎗指住我！

「我是遊客，只是隨便拍一吓。」我答佢。

「遊客為甚麼要拍看守所的照？跟我們走！」兩個武警強行將我帶走。初雪企圖欄喺佢哋前面，俾佢哋推開。

（待續）

本故事人物及情節如有雷同，實屬巧合。