寫字（八）

寫/睇到呢度，可能大家都會有個疑問：點解筆者寫有關翻譯嘅篇幅特別多呢？（其實已經變相係一個mini series）

一來，翻譯主要係我嚟咗德國之後嘅經歷，日子越近記憶越多；二來，其實我一直到現在都仍然喺出出入入，所以想講嘅嘢特別多。

大家忍吓我啦！好快講完㗎喇（就乾塘吖嘛）。

之前講咗好多有關豬圈嘅古靈精怪嘢，咁究竟有無可能喺豬圈正正經經咁搵食呢？

有。

P記係一間頗有規模、喺豬圈內亦都算赫赫有名嘅翻譯公司。作為一個飼主，P記放出嚟嘅飼料數量亦唔算少。但係由於P記嘅出手仍然屬於偏低，所以都係被豬圈以外嘅翻譯從業人士所詬病，猶幸榜上無名。

P記嘅總部座落喺Miami。講到呢度，有必要解釋一下：喺翻譯行內，有好多翻譯公司都會表明，自己有office係如倫敦、紐約或者LA之類嘅大城市，以便有一個國際性嘅形象。但係其實好多都只不過係喺某啲大城市嘅商務中心租咗個地址，本身喺當地係無實質operation嘅。生意一般嚟講都係透過網上接洽，所以公司本身嘅「國籍」除咗形象之外，其實唔會構成問題。

就如豬圈內另外一間有名嘅翻譯公司T記，佢報稱自己喺紐約同倫敦都有辦事處，但係有細心嘅豬仔google過，T記所謂喺紐約同倫敦嘅地址都只不過係商務中心，真正嘅operation其實喺摩爾多瓦。

但係P記係真正喺Miami有operation嘅美國公司；呢個接近blue blood嘅身份令P記廣受豬仔歡迎。

另外一個令P記聞名於豬圈嘅原因就係佢嘅客戶群。就以筆者嘅英/德漢（繁中）翻譯為例，P記嘅客戶有某大型航空公司、跨國金融機構、投資銀行、跨國零售集團等等；呢啲Fortune 500級別嘅公司對於翻譯從業員嚟講係夢寐以求嘅client profile，寫落CV大方得體。

要晉身P記成為佢哋嘅on-list freelancer，筆試當然少不免。如果要成為某些大客戶（如航空公司）嘅特約freelancer，就要另外再做唔同嘅筆試。

當你過關斬將，成為特約freelancer之後，你每日最重要嘅工作，就係等。

等乜？等運到。

何謂運到？每日美國東岸時間10點（我嘅時區係中歐時間，即係快美東6個鐘），佢哋嘅飼養員就會透過email出嚟放飼料。

飼養員即係coordinator，一群職位唔高，但係對豬仔們擁有生殺大權嘅「上等人」。coordinator嘅主要工作，就係將project manager放落嚟嘅「飼料」（即係翻譯工作），按數量同緩急分配俾freelancer們，然後不定期捽貨，務求達到準時起貨嘅目標。至於俾幾多個freelancer去做、俾邊幾個freelancer去做同邊個freelancer做多做少，則完全係coordinator說了算。

很想要吧？！（我係指coordinator份工）

寫到呢度，相信唔使講大家都估得到，對住一群擁有咁大權力嘅飼養員，豬仔們必定落力阿諛奉承；衰啲講句，含吹舐啜乜都出齊。每日嘅噓寒問暖當然唔少得，想盡辦法去攞到飼養員們嘅Skype contact（P記內部係用Skype溝通嘅）以便快人一步亦屬必然。事實上，P記有好多大job（過萬字以至幾萬字），都係未落到email pool度就俾飼養員們分配好晒俾相熟嘅豬仔，喺email pool度出現嘅通常都係三數百字甚至係只得一百幾十字嘅所謂maintenance job嘅雞肋。

咁究竟喺P記做freelancer，可以搵到幾多呢？

其他人我唔知，我自己呢，喺2017年，大約每個月1000至1500歐元不等（我係一個經常推job嘅人）。

以一份freelance嚟講，呢個數字其實唔錯；美麗之處係：我仲有時間做其他工作之餘，我週工作都只不過係五天。

如果故事到此結束，咁呢個其實都算係個大團圓結局。

當你出得嚟呢個社會碌得一段日子，你就會明白，除咗地產鋪門口嘅「筍盤」廣告之外，呢個世界邊有咁筍嘅事情。

（待續）