裝修名人堂Tino ：「裝修，最重要知道自己想要乜。然後簡化，取捨。」

Tino半路出家，五年前從事內地電子商務回流香港，不再做朝九晚五，想求一份彈性度高的工作，就投身了截然不同的——裝修界。 Tino五年前仍未到30歲，後生甚麼事也能輕易上手，對轉變環境及模式從沒恐懼過。「做Marketing，paper work居多。冇㗎，由頭學過，其實裝修理論唔難，重點係肯做肯學。」每個工程都「落手落腳」去參與，經歷過工程的洗練令Tino吸收了扎實的裝修知識，讓他後來作為「監工」的職位更順利。 新型判頭監工 以全貌確保中立 監工與判頭不同，不動手。「唔落手做，個人會中立啲。我本身又識裝修，知道點同客解釋，改正一啲客錯咗嘅基本裝修概念。同時，工程我冇落手，唔係我嘅作品，就可以抽離一啲去判斷工程質素好唔好，點樣同師傅溝通，改善質素。」監工更能企後一步去了解工程全貌，作檢查。 監工雖不用動手，卻非常忙碌，Tino每項工程仍會去工地二十數次。「打拆前要上去mark邊啲要拆，邊啲唔洗。拆完上去check，再mark水電位，完咗上去check啱唔啱，總之就係每個工序與工序之間都要上去，一上一收，再交帶下一個工序。」 他彷佛就是工程每一個細節的繩索，聯繫所有事和人。失去這繩索的話，工程就會變得雜亂無章。合作關係要處理得好同時也和心態有關，這是Tino不斷重提的重點。「睇下你肯唔肯做多步。例如個客人出咗圖但想轉，就睇你咩心態，如果打工仔，未必肯行多步，會答『出左圖啦，冇得改㗎啦！』。」 工程之大，只以打工仔心態是不能夠完成一份好作品的。「其實打去廠問做咗未，可能半個鐘都唔洗。如果你唔係以打工仔心態做，冇理由唔肯㗎，因為如果你幫到個客，個客會睇好你，個客會記住你幫到手，結尾你一定會有得益。」 「以前做martketing有幫助，因為做開溝通，對客會仔細啲有更多耐性。老實講，溝通真係好緊要。因為大家唔happy就冇意思，亦都冇必要同客對著幹。最重要開心，心情心態好，遇到咩事都唔會俾心情影響到其他工程。」 安排時間有條不紊 自然能人所不能 保持樂觀的Tino比其他同行不同，面對多張單仍游刃有餘。「其實係睇點安排，只要唔逼埋一齊接，一個星期開一個，就可以控制到每個工程嘅工序都唔會重疊，唔會混亂。」安排時間，條理分明而不紊亂正是他能人所不能的地方。 然而，Tino也有力不從心之時。裝修工程時間彈性，但工程卻是困身的，最令他感到無奈的正是無法時常陪伴改變他人生觀的兒子。「屋企一定會返，但有試過忙起嚟，一星期冇同我個仔眼對眼。佢小學仲細，我返到屋企佢已經合埋眼訓咗，到佢起身返學我又仲訓緊。」。 工程困身仍為兒子加倍努力 「咁都冇辦法，錯過佢成長時刻一定覺得可惜。但阿仔嘅出生真係會令人改變。以前乜都會以自己為首，依家唔係㗎啦，人生規劃完全唔同晒，乜都以佢為先。」想給予兒子更好的生活，唯有把自己的生活調節得更好。 「學點樣去平衡，安排時間要做得更好。自己識得控制自己，唔懶散得，冇野做唔好企係度。可以做先就做咗先，例如有空閒就調之後嘅工作而家做，出咗後面要做嘅圖先。慢慢就會留到時間俾自己屋企人。」34歲的Tino今天仍對未來樂觀，為了家人於生活與工作中調節，持續充滿拼勁。 裝修佬教你裝修 想裝修的人有甚麼要注意？Tino：「知道自己想要嘅style。裝修一定好多style你好鍾意，但其實冇辦法全部都放落去，要取捨。以前遇過一間屋300呎左右，有成10款顏色，一間房2隻色，個廳又2隻色，加埋天花，地板，同埋傢俬，整體感覺好混亂，所以真係要諗清楚。如果真係冇概念，咁我哋可以出3D圖俾客，俾個客感受下。」

本文章內容及圖片均由本專欄作者提供及上載，並不代表本公司立場，如有任何版權問題，請與本公司聯絡。關键字： 裝修佬;裝修;故事;設計師;裝修工程;裝修網;裝修費用; 石屎; 修補;