《Hehe生活日常》愛人前，先要懂得愛自己

撰文：藍編

好多同志，因為自我貼上標籤，就會覺得自己唔值得被愛，唔值得有愛情。亦有一部分人，因為過去嘅愛情令佢遍體鱗傷，唔敢再擁抱愛情。

近排有個朋友同我講，佢話：「識咗個仔仔，我感覺佢鍾意我，我都鍾意佢，但我唔知我係鍾意同佢做朋友，定係情侶嘅愛，我唔想傷害佢」。

先唔講朋友定情人嘅愛點樣分，從我同佢之間嘅對話，會感覺到佢對自己無信心，所以先會有不確定。同埋過去嘅愛情令佢有傷痕，唔敢去愛。其實係愛人之前，你要學識愛自己。就算你無世界定型嘅男神元素，你都會有一啲行為係令你加分嘅。可能係一技之長，可能係性格特質。只係你從來無好好檢視自己嘅好，而不斷放大自己嘅醜，咁大嘅負氣場。又點可以吸引到愛情來襲呢？

利申藍編唔係愛情至上嘅人，不過我明白，你肯愛自己，就會自然散發你嘅魅力。呢個完全適用於任何性向。如果相同頻道嘅人，就會自然搵到你。就算反過來由你去主動，對方請食檸檬又如何，嬲完傷心完咪又要繼續生活，考試都唔會次次一百分啦，懂得下台的美麗，何必為被拒絕，而影響自己嘅魅力，又或者講，呢個人其實唔係Mr.Right，既然唔係就更加唔使動怒啦。

當然講好易，真係面對時，你情緒點都會有起伏，因為你都係人一個，不過想講嘅係，就算有好多人唔鍾意你，只要你開始懂得欣賞自己、愛自己，包括陰暗面，你慢慢就會感受到身邊嘅愛與被愛。