如果我有一座新冰箱 | 台語新詩

（為著配合活動，標題佮關鍵詞使用華文，內文是照教育部推薦漢字的台文）

無咧講啥物假使 因為我真正有一台新冰箱 隨共我食賰的菜囥入去內底 有人反對，就共𪜶剁剁咧嘛冰入去 這是我的新冰箱毋是𪜶的 我想欲貯啥攏是我的代誌

我這个人真好心 會鬥養飼無爸母的囡仔 當然是靠冰箱內底的物件 你講臭酸的菜袂使閣囥冰箱？ 我會好料哪會臭酸去？ 你敢無看囡仔食甲偌歡喜？ 而且這是我的冰箱 按怎用毋免別人教示

囡仔大漢了後曉得知恩報本 無，靠𪜶爸母的手尾是無夠納電費 𪜶有當時仔想著會家己去開冰箱 共我的凊飯窮寡出來擲掉 但是我共𪜶藏甲好勢好勢 早就和別个菜濫做伙 𪜶逐工咧食嘛毋捌發覺 而且我的菜色大範閣腥臊 本來就毋是𪜶所講的垃圾物

這馬𪜶講彼是𪜶的冰箱 我講彼猶原是我的冰箱 照三頓冤家相拍無了時 現此時總算互相有一个共識： 這是咱的冰箱，咱著好好仔徛起

有人講「新冰箱」的意義是對新生活的願景。我就咧想，聽了是誠樂觀，毋過若是已經失去想像的能力，干焦會曉綴殖民者行，按呢是欲按怎才好呢？

本文原底是用 Pe̍h-ōe-jī 書寫，為著佇華文為主的平台推廣，轉寫做教育部推薦漢字予今仔日大部份講華語的台灣人較好臆意思，一寡漢字可能顯示袂出來（我家己的電腦看是有齊全）。

若是有亂碼嘛無啥奇怪。我這馬誠清楚這毋是我的冰箱，當然毋是我想欲貯啥就定著有位。