［性別講看覓］—跨性別１：扮裝，扮裝皇后

這幾若工妮妃雅的新聞逐家有看著無？我臆，這个獎有夠大，伊的作品真誠媠，講伊的歹話可能較少。

跨性別有真濟種，其中有一種是扮裝。佇講扮裝的時，大部份講的是查埔扮做查某，in是查埔的無毋對，只是有時陣特別穿插做查某款。嘛有查某扮做查埔，毋過較少人提出來講。

扮裝量其約仔有幾个情形：

￭佇家己的厝內穿查某衫、化妝，打扮做查某。家己耍耍一下，衫就換掉。

￭以查某的打扮出去街仔路行行一下。

￭會去扮裝的地點佮其他的人同齊耍，參加遊行。佇同志遊行的時陣，有一寡仔扮裝者會打扮出來遊行，全世界的同志遊行攏有扮裝者參加遊行。

￭參加扮裝皇后的表演、比賽。扮裝皇后是一種表演，抑是比賽，佮選美抑是才藝比賽仝款。

In佇生活中是查埔的，只是有時陣特別改變穿的衫佮打扮爾爾。

這个時代，做家己是上重要的代誌。