［性別講看覓］—遮的嘛是性別

●有一擺，我佇路邊買菜，頭家喝：「一斤50箍。」

我共我家己紮的塑膠橐仔提出來，伊講：「家己紮橐仔100箍。」

聽到按呢講，知影伊佇講耍笑，毋過我感覺怪怪，我有共伊買無？我袂記得。

我行開了後，想著，我若是查埔的，伊敢會講這句話？

●誠久以前，我佇學校內底的體育館頭前運動，做一寡伸展的動作。有一个中年的查埔人騎跤踏車經過我的面頭前，已經騎過去矣！看伊停落來，牽車來到我的面頭前，共車停好，講：「毋是按呢做，我教你。」

做幾若个動作予我看。我佇想，可能伊感覺遮仔動作誠好，伊會曉，真愛教人。

伊走了後，我家己做看覓，袂使，我的跤頭趺袂當，壓力傷大，無適合我，我猶原做我本來的動作。

敢若，佇伊的頭殼內底：「查某人等於袂曉，愛人教？」

我閣想著，伊若看著查埔佇做，伊敢會專工停落來共伊教？

●我少年的時，是去工讀，抑是拄頭仔上班的時陣，有查埔人趖來阮的辦公室，一入來就講：「（華語）有女生氣氛比較好。」我心內佇罵，查某人嘛佇做工課，毋是欲予你氣氛好的。

●我訪談過佇消防隊做拍火員的查某人。伊講到辦消防講習嘛是in的業務之一：「（華語）這部份我做得比較多，那些男生寧願去滅火，也不喜歡講課。」

初初聽著，逐家感覺講課較輕可，查某攏做較輕鬆的代誌。我閣想落去，毋是喔！講課愛準備教材，欲教啥物？按怎講？做投影片，準備發予學員的資料，專工去人的場地，愛開喙講，回答學員的問題……。頭腦佮體力愛用誠濟。

伊講著平常時仔佮大部份是查埔同事鬥陣的時陣：（華語）「有女生時氣氛不會那麼陽剛，火爆。」好矣！連伊家己攏按呢講，我就恬恬。