語言是一杯 Tee 一杯 Caj 一杯茶，伊跟綴人類四界生湠 mā 跟綴人類泅入在地上四常 ê 茶滋味。
德國 ê 軟晡宛然阿波羅策馬按臺灣 tuì-pik m̄ 願兄妹情翻頭 ê 黛安娜 kā 馬車停睏 tī 德國 ê 色緻總 hōo 我驚惶，驚惶家己一个無拄好成做 Bunun 神話➀，爸母𤆬囡仔去田做穡，囡仔 hōo 日頭曝甲變四跤杜定。迎新棄舊意愛科技生活 ê 翁無興踮厝內𫞼時鐘，迎新守舊跟綴世代潮流過日子 ê 我，猶原意愛 tī 新生活內底享受舊生活，無愛 kā 手機仔當做金烏 hōo 家己成做綴伊轉踅 ê 八粒行星之一。我愛我 ê 舊生活，跟綴街路卯時 ê 洘流 tī 申時又閣沓沓仔滇流，規个街路齊是搢水 ê 烏仔魚。
下昏飯款好勢，日鬚無法度揫 ê 徛家沓沓仔點燈火，這久合該然是點燈酉(iú)，燃一鈷燒茶𣁳一湯匙仔凡勢順土呂其人喙斗所致有淡薄仔甜 ê 斯里蘭卡紅茶踮臺灣紮來 ê 環保茶蒒仔，恬靜看逐隻生做無相𫝛，我問𪜶號做啥物字名，𪜶兼回答「鳥」ê 族群停跤 tī 厝邊順天地變化成做自然生態區 ê 車庫天篷交蝶仔、蜂做陣嘁喳叫。自然 mā 是人飼人，一支骨，天飼人，肥朒朒，我數想 ê 北蔥 mā 號做蝦夷(hê-î)蔥 ê 伊過我手永遠 buē 發穎，過自然之手，環境䆀 tsi-tsi 隨个仔人懸漢大。「你 m̄ 免啥物攏 ē 曉，m̄-koh 你愛保持好奇心佮興趣」Podcast ê 一段話步頻浮在眼前，我有好奇心 mā 有興趣，總是有 ê 事項就是客語講 ê 花缽仔種菜，無緣遮簡單免綿豉呔討按呢生。
茶鈷呻一聲閣兩聲，火禁掉，順燒甲會使得做面 ê 煙 kā 伊沖入去茶杯仔，斡頭行向冊櫥，久年無見 ê 記持 mā 順茶鈷沖出來 ê 煙想著大我 14 歲 ê 大姊 kā 頭做竹篙披浴巾仔交全面桶齊貯燒水 ê 面桶做面 ê 畫面 mā 想著食阿爸喙瀾食上重 ê 我捷 kā 鱸鰻講做流鰻 ê 囡仔代。
一絲順茶鈷揫出來 ê 火煙引𤆬我翻頭交 kiōng-bueh buē 記持 ê 家己做伙冇豆，本底雙跤踏雙船，心頭亂紛紛 ê m̄ 知愛選左爿抑是正爿 ê 亂紛紛知影 bueh 交佗一本冊恬靜踮磚坪成做日頭花等待事先交代今仔日愛閒到戌亥(sut-hāi)交換手 tsiah 有法度轉來食下昏飯 ê 翁。
囡仔時 ê 我上愛去阿春姨隔壁 ê 楊桃汁攤 bué 一包冰甲若偝冰塊 ê 紅茶，這久 ê 我 m̄ 知是喙斗轉變抑是遮 ê 紅茶減一味羊角豆仔 ê 芳甜 hōo 我慣勢透寡牛奶做伙啉 hōo 伊成做上俗價 ê 紅茶 la-thé。
東爿 ê 色緻勻勻仔成做門埕外圍順季節沓沓按青色轉做粉紅 ê 林檎，西爿猶原若臺中東勢 ê 柑仔，茶杯仔交《台語活詞典》排好勢，斡頭揣烏仁目鏡，斡頭準備伐向磚坪，「筆」耳空敢若聽著芋仔爸驚我家私攢無好勢就去考試 ê 聲音，擔頭看窗仔外 ê 圓桌，確實無囥筆隨閣斡頭款筆。
「划艋舺對台灣出發...」這个「划」按怎講，徛起身行入廚房揣 m̄ 知囥踮佗位 ê 手機仔，碗盤簞笥斟酌繩，無料食譜冊區斟酌繩，規个廚房交厝內繩甲無地繩準備放棄，手機仔交茶鈷相放伴恬靜停跤 tī tiàu 味區。生性生猴 ê 我 buē 堪得等隨上網請教教育部字典，呔討無法度做連結，我敢誠實遮爾仔背骨 kan-á 捌一種文字抑是年歲到矣愛接家己 ê 無頭神？這久 ê 我捎頭一个摠，硬 bueh 捎一个摠 mā kan-ta hōo 我叨撚家己 ê 頇顢，放這个問題自由，起因六歲前捷聽大姊去臺中公園談戀愛 ê 划船仔故事又開踅翻頭相借問，划就是「kò」。
順二十外冬 m̄ 捌聽過 ê 歌聲讀《台語活詞典》聲母、韻母捎無摠，七聲八調 ê 寮仔門 m̄ 管按怎斟酌選門開猶是選走精，若西方字母順 A 排到 U tuì 學習頇顢 ê 我是一項福音，起因順話我有才調 kā 伊鬥一个羅馬字，像 Tai-gi hua-su-tiam 無任何標號 ê 英文式書寫體。
按 A 一路巡字田，巡到「擢」(tioh) 我想著按「台華對應綜合大辭典」請教來 ê「調味」是寫「擢味 tioh-bī」隨上教育部辭典請教「調味 ㄊㄧㄠˊㄨㄟˋ」按怎講。
調 tiau、tiàu、tiâu、tiāu 4 个音，其中「調味 ㄊㄧㄠˊㄨㄟˋ」是「tiâu-bī」這个交我腔口九分九相倚 ê 講法𤆬 hōo 我平靜，起因早前猶 tī 面冊沐沐泅，參加 ê 台語社團有人講透世人 m̄ 捌聽人講 tiàu-bī。我 ê 烏仁目鏡順教育部台語辭典 ê 調 tiau、tiàu、tiâu、tiāu tuì 遐 ê 透世人 m̄ 捌聽人按人講 ê 人笑講「你 ê 透世人 m̄ 是我 ê 透世人，總是我尊存你 ê 廣東目鏡，隨人佮意。」
我 ê 阿母按永靖來，厝內序大兄姊妹敢有人講 ian-tsīng 我 m̄ 捌研究，總是我家己是慣勢講 Íng-tsīng，另外教典收台中腔「番茄」是講「thoo-má-tooh」總是我交朋友齊講「Kam-má-tooh」這个講法 tī「台語好代誌」交「亞特聊聊天」這兩个 Podcast 齊有得著相𫝛 ê 印記，閣喋落一回交苗栗苑里同學開講，講著烏杮仔踮德國框金不過紅紀紀 ê Kam-má-tooh 比臺灣俗價，伊隨應講我愛食臭杮仔炒卵，自高職就熟似到出業 20 外冬 tsiah 知影伊台語講甲比我老 ê 同學，兩个人做陣話仙無一个 uī-tio̍h「番茄」ê 外來語愛講做「thoo-má-tooh」m̄ 是「Kam-má-tooh」teh 花 buē 離，huînn-ti̍t gún 就是知影對方 teh 講佗一味，tshan-tshiūnn 翁仔姐做陣看歐洲消失 ê 田庄按怎恢復人口，倚意大利 ê 奧地利人講 sau kalt➁德語非我母語，我猶原知影對方 teh 講夭壽寒。
若風捋過水面一稜閣一稜輕輕仔巡 A,B, E, I...搪著擢(tioh)成做綿豉向海岸靠岸 ê 海波浪，跟綴擢讀例句；
擢傀儡，擢擢咧，擢舌尾，擢舌根，擢一下，穿鞋擢襪 ê 襪除了我慣勢 ê bue̍h 敢若有聽人講 be̍h-á 佮 buē-á，隨閣請教教典，確實有遮 ê 講法。我是按佗落學慣勢遮 ê 講法？想無，唯一 ê 想法是厝邊太 tsuē 按臺灣地田庄來 ê 序大，家己 ê 序大 mā 有台南腔，不過伊 ê 台南腔 kan-ta 搪著白河阿媽 tsiah-ē 出現。
擢是整理佮搝 ê 意思，搝，我 mā 敢若慣勢講兩款腔口 khiú 佮 giú，這兩个講法按怎切換，我捎無摠，總是我清楚知影底時使用 khiú 底時使用 giú 像用 ê iōng 佮 īng。
文字是獨一面肉 ê 記錄，腔口是生活四常 ê 融合 mā 是孤𣮈四常 ê 展現。順台語有愈來愈 tsuē 人分張伊家己 ê 面肉 hōo 我確定，準做教典抑是 ChhoeTaigi 台語辭典揣無 ê 辭無表示無人使用，像彼句 sau kalt。
「Hallo」踮臺灣騎 oo-tóo-bái 出門做穡是利便，踮德國騎 oo-tóo-bái 出門做穡是我 ê 手頭有冗剩，按記錄是未食五日節粽，破裘 m̄ 甘放 ê 德國 tī 這幾冬 5 月日是天一拆箬順大地揫鬚 ê 金烏就隨 kā 四界飛來飛去 ê 鳥仔佮人揫甲揣大樹公致蔭，翁tī 5 月初 mā 開始展風神騎 oo-tóo-bái 上班，順紲不三時伴我搬羅馬假期。
「腹肚枵無？」我刁意故問。
「大腸 kā 小腸告甲憲法法庭去需要食一碗燒燙燙 ê 媠某牌暗頓」翁笑應。
順翁 ê 話，我 tsiah 發見淺咖啡色 ê 烏仁目鏡色水確實有較沉一寡，隨 kā 伊架 tī 鼻刀 ê 伊取落來，見著西爿 ê 天宛然人 tī Andorra 搪著 ê Pyrénées 水紅，魂舒隨交懍恂。
是金烏 ê 鬚 kā 我揫做娘仔繭燒熱抑是這句 m̄ 知按佗落讀著「伊是一本適合按算成做台語老師 ê 葵花寶鑑」ê《台語活詞典》hōo 我有機會順文字跤跡勻勻仔食老倒勼，踅轉去兩位阿姊交爸母猶在生 ê 日子， 我 m̄ 知機，總是自人成做貓好玄自帕水就慣勢 ê 歌聲 tī 這个無奇不有 ê 年閣敢有台語字典，揣著線頂辭典開始向望有機會收藏盧廣誠老師編輯 ê《實用台語辭典》到目今 m̄ 捌有過機會，這久有機會搪著《台語活詞典》我順讀來 ê 推薦巡編輯者，有《我咧唱歌》交《咱來讀讀》ê 王秀蓉老師、《真情 99》交《酒蜜》韓滿老師交 tī 台文通信Bong報捷讀伊文章 ê 張寶明老師 hām《哈佛台語筆記》李勤岸教授，我相信這本《台語活詞典》絕對是葵花寶鑑，準做我無按算成做台語老師。
這 m̄ 是讀冊心得 mā m̄ 是冊評。
➁ Sau kalt 是筆者順音做記錄，m̄ 是正確寫法。畫面德文交通用德語 ê 寫法是 Sehr kalt
➂《三杯茶》von 葛瑞格．摩頓森、大衛．奧利佛．瑞林「敬上第一杯茶，你是一個陌生人」，「再奉第二杯茶，你是我們的朋友」，「第三杯茶，你是我的家人，我將用生命來保護你」
2023.05.19
