會曉講台語，就毋免學羅馬拼音？

有人佇講，伊的老母，抑是阿媽誠𠢕 gâu講台語，伊袂曉羅馬拼音嘛會曉講；伊家己會曉講台語，是按怎愛學羅馬拼音？

我若是拄著有人按呢講，我按算欲問伊：

一、你感覺你無需要學羅馬拼音？

按呢就莫學；別人有需要，別人去學。

二、請問，你有佇寫台文無？

１．無。

我：你講台語，干焦佇你的面頭前的人有聽著你講的話，較遠的人，猶有無在場的，就無聽著矣！用寫的，會使予較濟人看著你講的話。

伊：無要緊，毋免。

我：好，你就毋免學羅馬拼音。

２．有，用漢字寫。

我：你若會曉羅馬拼音，拄著袂曉寫的字，抑是查無著的，會使直接用羅馬拼音寫，較緊，嘛較簡單。羅馬拼音毋但用來學台語，嘛是咧用來寫的。

有佇寫佮讀的人，會使佮較濟人寫來寫去，抑閣讀別人寫的文章，互相交流。咱身軀邊的人總是有限，就是遐的幾若个，若是有佇寫佮讀，會使熟似較濟人，看著較濟的講法，就是眼界較闊。

伊：毋免。

我：好，按呢你就毋免學。毋過別人愛學，彼是別人的代誌，佮你無底代，我的意思是，你莫擋人去學，嘛莫笑人學羅馬拼音有啥物路用啦！

註：

１．逐擺看著有人佇講／寫，伊會曉講台語，毋免學拼音，感覺足煩耶！

２．近來，我家己學台羅，這馬佇佮聲調、變調奮鬥，加看、加唸、加「臆」，有進步。

Brett Jordan on Unsplash