台灣人敢一定愛會曉講台語？講台語的人敢就一定是台灣人？定定眼著面冊頂一寡人咧相爭遮的問題；另外一方面，若是講著『台灣文化』拄著的困難，就會袂少台語人應聲講『逐家愛卡捷咧講台語』。但是，問題敢有遐爾仔單純？

佇我進前寫的一篇落落長的文章《台灣文化困境：解構中華》內底，有講著『時間』、『空間』、『人間』對著文化構成的重要性。台語雖然是足重要的，對著台灣文化底蒂的傳承嘛有伊的必要性（客語、原住民嘛共款的道理），毋過『語言』干焦會使算做『人間』中的一支柱仔跤，袂使直接參『文化』的概念相比。

歷史上，逐家攏知影二二八進前的台灣頭人民眾，初初攏是足歡迎中（華民）國的統治。雖罔講對日本時代逐家就向望自治，毋過彼當陣的國族認同，是共台灣人當作中國民族的一部份咧發展，所以嘛對台獨無啥想路。佇彼當時，台灣人至少閣有七成的人口普常以台語為主，但是𪜶的文化參政治認同，若是佮咱今仔日的華語社會相比，顛倒閣卡倚中國。

閣舉一个足濟台語人攏熟似的林茂生先生作例。先生的台語比大多數的現代台灣人閣卡輾轉，嘛會曉寫白話字，毋過伊佇彼當陣出版的博士論文，是共台灣人寫作 Chinese 的一部份。講台語、寫白話字的人，對歷史的角度來看，其實無一定影響著台灣人的認同，必定有其他要素是咱落勾的？

反倒轉來講，『文化』是比『語言／文字』閣卡懸位的意識形態，牽涉的範圍閣愈大。台灣文化／台灣人認同的厝頂若真正愛弓予在在，除了台語文、民主自由，嘛愛有親像宗教（公媽教；人間）、歷史（東亞史觀；時間）等等的共同體，才有法度抵抗著中華文化統戰。有時陣，台語的推捒佇社會拄著卡大的反衝力，是因為教育體系無仝時仝伙處理著花翱翱的文化認同。

時間、空間、人間，逐支柱仔跤其實對台灣文化的重建成攏足要緊的。毋過嘛像我佇文章內面講的，目前的困難是足濟台灣人認同的理論，彼輪桶箍，圈起來的範圍毋是足隘就是傷冗，定定是隨人顧發展，無仝山頭有時陣閣會相觸，像公民民族主義看文化認同無起，法理台獨會供體媽祖是中國神。

才無偌久進前，講台灣歷史的 Taiwan Bar 欲解釋著台灣這个音的由來，煞用華語來唸『大員』、『大灣』，閣講這幾个音有轉踅過，實在是譀死𪜶祖公。作台灣歷史的無台語意識，煞有理矣？現此時台灣文化拄著的問題，就是各路的意識形態，毋是鬥袂起來，就是咧烏白鬥。

所以今仔日大部分的台灣人（著算是豬屁屁的支持者），攏無法度對華人、漢人、閩南人的概念卸身離。究其然，夯竹蒿鬥菜刀的意識形態，實在是無彼號才調對抗著中國民族主義的銃子。