台語文學
水雞鈷地陷大爆發！
神人去予震甲飛起來，後面的石壁崩陷，掩閘地陷的喙口。
挩窗飛甲遠遠遠遠遠，想講無命矣，落塗時軟㽎㽎，歡喜講：「好佳哉！袂疼！」下跤的哈囉紲來出聲：「你硩著我啊啦！」
挩窗徛起來，四箍輾轉是烏卒卒，屑屑仔光攏無，正正是暗面趖貓，干焦哈囉一對目睭出光，敢若十五的月娘。
「頭拄仔到底是發生啥物代誌？」挩窗問。
「你敢無鼻著出磺？磅空猶有一絲仔瓦斯味，而且摻水雞鈷的厭氣濫摻做伙，我為著救你，用爪仔硬共火星控出來，共瓦斯點予著，才會來爆發。」哈囉講。
「你真好膽去點瓦斯！我前一站仔提蠟條耍火，險險仔火燒厝！你怎會當按呢！」
「若無點火去燒水雞鈷，是欲按怎救你！好心去予雷唚！」
「啊啊！莫按呢啦！多謝哈囉相救！你是我神明界上好的朋友！來！唚一下！」
「任務猶未完成，莫佇遮滾耍笑啦！這聲好啊！連參詳攏無，就去予水沖入來，愛咱神人兩箍去揣騎虎王爺！唉！連上訴的機會攏無！遮是烏龍磅空呢！蓋恐佈！」
「曷就烏貓貓看攏無，有啥物好驚的？」
「你真正是七月半的鴨仔，毋知死活！」
