睇見藍橘子同SOS合作，真係好正！
但自己始終唔係嗰種層次，對住SOS要求嘅計劃書，一個Point都寫唔出。
都係發少啲夢，繼續寫自己想做嘅故算喇。
今日睇咗個討論，講開寫小說平台，之後就用咗個半鐘時間去回應，但未發佈之前，我一嘢delete咗佢。
原因係，我自己睇返都好似對人放負咁，唔想成日唱衰香港，所以都係唔好提。
不過話晒都用咗成個鐘，真係衰啲講，夠我去投多一篇稿，所以唔想浪費，不如整合一下當爽文去發佈算。
睇返香港寫作平台，我簡單去用自己嘅角度去講，係吸引到作者，但吸引唔到讀者。而當大部份用戶都係作者時，花咗個幾鐘時間去寫故，係咪真係仲有心機對住個mom睇故事？(睇文就睇fb睇ig就會)。
我自己因為返工已經對住部腦八個幾鐘頭，寫埋故都十幾個鍾，比著係你，分分鐘連fb都唔想開，我攞本書睇好過。
(呢點都係我想出版實體書嘅原因，不過因為我係作者，純讀者唔會係呢個情況。所以做電子書係無衝突)
另外係香港，其實平台已經越嚟越多，但點解講嚟講去都係香討、連/高登？因為佢地都建立咗一種文化，去得嗰度睇故就知道有咩類型，而你想寫故，但又唔係個種風格，你就知道你可以唔發好過。咁香港人係咪真係只會鍾意個幾種？
我只可以話就算鍾意睇都唔會「幫你分享話比人知」囉… …
咁無人分享，咪自己介紹囉，但有咩地方可以介紹自己嘅小說作品，而香港人會去睇？R爆頭。跟住又有人會講，應該要睇「華人」市場… …咁我又R爆頭，陸內嘅以本傷人創作力，日更萬字，作者無數，你真係可以 喺「華人」世界被人發現？仲要你同佢地文化係有差異，台灣人都睇唔明香港人嘅中文字喇(唔係講緊粵文，係真係書面語)！
咁當然又有好多例外，高登起家嘅最少都有幾個，去埋台灣發展添，咁你又可以睇返個比例，有幾多個香港作者有能力咁做？你會唔會係其中一個？
我成日都聽人講，作者要有自己的風格，先可以吸引讀者，所以一定要寫一個自己鍾意嘅故事。
但問題宜家個風氣係，如果你個故事同主流無咩關係，你就會發現仲慘過甜故，甜故都話有班人追住睇，BL都由鬼鬼祟祟到光榮盛勢，反而一個普普通通嘅故事都不屑被人Click入去睇下，咁你就明白香港所謂嘅百花齊放，只係需要有焦點去吸引讀者，仲要唔好寫咁長，因為大家都無心情去理「家明」同「婉君」由相識到相愛到分手又復合等等，大家只係想知道「家明」同「婉君」做愛嘅過程已經足夠。(文學另計，因為佢地有政府及學校支持，包括人力物力儲藏等，唔擔心出唔到書。)
就算真係成功出道，十個有八個都會轉向主攻愛情喇！因為呢個先係收支平衡嘅方法。
所以，最後真係好感激有人願意投資係香港本土嘅故事作品身上，我都唔知點解佢哋可以生存到？唔通真係靠廣告咩。我自問真係無咁嘅生意腦頭，我只係鍾意寫故，仲要係寫自己鍾意嘅故，唔係市場需要嘅故。所以都只係期望有更多呢類綜合平台，搵我做湊夠數又好，比機會我又好，點都好喇，希望可以多多合作。
最少我自己嘅得著係，比人知道我係香港嘅大多數寫故事嘅作者之一，而又無咩人識咁。
而我最大嘅特色就係：《DSE幻想校園系列(一)》：從這裡開始
堅係堅係堅係就出版架喇！我希望呢兩個星期內可以講實邊日喇！到時我會再洗版！到時希望大家多多支持！
台灣讀者先說抱歉，因為本作品是「粵白文」，但大家可以從電子版試讀，如有興趣也請多多支持購買。
現在有關故事的資料只有這個(上年八月已經更新，宜家都未出版到！真係超無奈… …當然主要因為自己太多錯字做咗五、六次校對，封面又做極都唔好，最後好彩兩者都有高人出手幫忙！太太太感激！)
