【台北百萬遍】礤冰

七月15日（星期日）起，一連五週，我會在紀州庵文學森林進行台語文寫作課，主題就是「用台語寫小吃」！每個禮拜會有一個主題小吃，課程中除了閱讀，也會有「田野調查」──這馬已經食過滷肉飯、蚵仔麵線佮四神湯 。

歡迎來報名（請點連結）。五堂寫作課剩下最後兩堂，上課吃小吃，每個人都能寫出有趣又道地的台文散文，留下台文中最有魅力的氣口（khuì-kháu）！

這場比賽實在是無攬無拈（bô-lám-bô-ne，無精打采），投手掔（khian，投擲）了䆀毋知保送幾改，內野不時咧失誤，佔滿壘矣分數閣摃（kòng，用力打）袂轉來，加油聲攏是加的，猶原是「零比零」。

淺拖仔坐踮內野，無啥精神，暗時的天氣照理講會較四序（sù-sī，舒服），本底有涼風透過來，時間愈晏，煞愈來愈熱，規个球場翕（hip，悶住了）牢咧，全然無風，淺拖仔直直出汗。

提葵扇來擛（ia̍t，搧動），汗猶原流袂停，看邊仔有人攑（gia̍h，拿著）細支電風來吹，嘛是喝熱。

啦啦隊尻川扭（ngiú/gió，扭動）咧扭咧，球迷大聲喝咻奧援，球員拚勢來摃，攏催盡磅（tsīn-pōng，極限）矣，分數就是「零」。

而且，感覺愈來愈慢，強欲拍袂行矣。

漚鬱熱（àu-ut-jua̍h/lua̍h，悶熱）的暗暝，連時間嘛懶懶。

這時，淺拖仔目睭雄雄擘金，看著一个囡仔，手捀的彼碗冰礤甲若一粒山，伊用湯匙仔去揬（tu̍h，戳、刺）冰山，山崩去，囡仔的喙㧣（tu，撅）懸去承（sîn，承接），規个面煞全全冰。

看彼囡仔歡喜的表情，淺拖仔擋袂牢，貴參參嘛是走去買。

食冰嘛，毋是食飽，摻（tsham，加入、混合）啥物料無重要，要緊的是清涼退火，予球場的翕熱（hip-jua̍h/lua̍h，悶熱）溶去。一陣風吹過來，投手球掔出去，箠仔相準大力共撼（hám，猛擊）！

球欲飛去佗位？敢有著分？啥輸？啥贏？