【台北百萬遍】四神湯

2018/07/26閱讀時間約 2 分鐘

七月15日（星期日）起，一連五週，我會在紀州庵文學森林進行台語文寫作課，主題就是「用台語寫小吃」！每個禮拜會有一個主題小吃，課程中除了閱讀，也會有「田野調查」──這馬已經食過滷肉飯佮蚵仔麵線。

歡迎來報名（請點連結）。五堂寫作課，五種小吃，每個人都能寫出有趣又道地的台文散文，留下台文中最有魅力的氣口（khuì-kháu）！

【台文】四神湯（sù-sîn-thng）

點菜的時陣講真明，頭家敢若失神失神，叫兩、三改攏無應，干焦金金相頭前。

淺拖仔掠做伊耳空重，喝講：「大碗四神（湯）！」

這亭仔跤的擔仔，有較腌臢淡薄仔，人來來去去真齷齪，閣有胡蠅來舐。

但淺拖仔就是愛這擔，自拄來台北朋友食好鬥相報就牢矣，莫講豬腸和薏仁，湯頭有夠利，看鼎內底沖沖滾，鼻著彼个味就吞瀾。

所致，點大碗的才會夠氣，啉了元神飽滇、精神百倍，好食甲連喙舌都欲哺落去。

怪奇的代誌發生矣！頭家行過來、行過去，敢若有心事的款，不時咧䀐。淺拖仔想講，敢是伊啉湯過頭大聲、表情傷譀，頭家看袂落去。

雄雄，頭家行倚，佇伊邊仔講細聲話：

「人客，偷偷共你講一件代誌，我袂佮人講喔⋯⋯ 」

「敢講⋯⋯敢講⋯⋯我上愛的這擔四神湯⋯⋯」淺拖仔心頭驚惶。

「你衫穿顛倒反矣。」

「啊！」

淺拖仔真落氣，想起出門時拚時間，一時無頭神，衫煞囊毋著去。

四神湯捽捽咧就緊來旋，緊覕轉去厝內，莫予人發現。（嘛毋先去揣揜貼的所在穿予好）

想著這件代誌，有影是落下頦，淺拖仔就抾七字、鬥四句，家己詼家己，來寫這首七字仔：

人若饞食若胡蠅，啉完四神展風神；
踅神共衫顛倒穿，眾神笑我無頭神。

為什麼會看到廣告

鄭順聰

鄭順聰，嘉義縣民雄鄉人，中山大學中文系，台師大國文研究所畢業。著有《時刻表》、《家工廠》、《海邊有夠熱情》、《晃遊地》、《基隆的氣味》，《黑白片中要大笑》、《台語好日子》，即將出版台語神怪弄險小說：《大士爺厚火氣》。於教育廣播電台主持全台語節目「拍破台語顛倒勇」。

留言0

查看全部

發表第一個留言支持創作者！