我知大家諗緊乜，你條友咁樣嘆慢板咁寫法，寫到普京退休你都未寫完啦！唔會喎，敘事唔係我強項，我好快就會乾塘，之後都會跳住嚟寫，per event basis。其實就算我想，我都冇咁嘅能耐將三年嘅嘢當日記咁寫出嚟，你估我係司馬遷咩；呃稿費冇你哋諗得咁易㗎。
上次講到：我喺東大門街頭，俾個韓妹連人帶冰咁狠狠撞咗一嘢，佢杯思樂冰，後來證實係刨冰，杰噠噠嘅綠色糖漿，好似鬼口水咁撻咗喺我件白色 polo 上面。我心一句「死八婆」口一句「屌」，手忙腳亂咁想撥走身上啲鬼口水，點知越撥越大撻。我稍稍抬頭啤住條韓妹，咁啱呢個時候佢亦抬頭望一望我。
吖！我知我嘅文字功夫力有不逮，我嘗試吓去形容：我見到一張俏麗嘅鵝蛋面，淡掃蛾眉，雙眸粲粲如星（唔好意思查老前輩），一頭及肩嘅 one length 秀髮，嘴角散發住幾分少女嘅俏皮。佢大約五呎七八左右，同佢高䠷身型唔配合嘅係嗰股衝力，我懷疑佢有運內功，我有少少俾佢撞到腦震盪，呆立當場。
有去過韓國旅行嘅都知，韓國女人出街通常都化妝化到能劇演員咁，層粉底厚過公屋外牆嘅批盪。凈係「淡掃蛾眉」呢吓嘢，我喺漢城街頭都係頭一次見。
你哋啲女人成日問，我哋啲麻甩佬睇女究竟睇乜先？我可以好老實咁答你：九成時間係睇個胸先，其餘時間係睇臀部同對腳，冇視線睇胸臀腳或者入世未深嘅死𡃁仔會睇個樣先；同你講「我唔在意外表我只係睇性格」嗰啲一係性無能一係想呃蝦條。
但係我呢次胸臀腳三範都唔中，我當時嘅眼中，凈係見到佢個鼻。
一個希臘鼻，或者叫古典美人鼻；呢種鼻係洋人群中絕非罕有，但係喺亞洲人中則難過中六合彩。
我明你哋點諗，韓妹個個整容吖嘛，一號眼二號鼻三號嘴矽膠波打針籮有幾難？
好-很-難-呀！
第一，唔係個個都有錢去整容，你估手術費平呀？第二，你估你去整就一定整得靚？如果你覺得有錢去整一定靚，就等如你覺得識揸筆就一定畫得出梵高林布蘭嘅畫一樣咁無知。第三，就算係整，又俾佢整得咁靚，你抵佢發啦講真！能夠整得出一副咁出色嘅面孔，佢個容醫都可謂醫學界嘅達文西或者米高安哲羅，藝術家嚟㗎喇！欣賞藝術品係唔應該用批判眼光嘅。
一個人靚唔靚，可以睇好多樣嘢；但係一個人靚得「骨子」與否就好大程度靠個鼻靚唔靚。一個粗輪廓嘅人都可以好靚，但一定唔會「骨子」。
大家見我寫咗咁耐都入唔到正題，可想而知當時我究竟有幾呆。
好明顯佢都被我突如其來嘅呆嚇咗一跳，可能驚我會猝死。佢略為整理咗一下佢濕咗嘅上衣，然後望住我，同我講：「我…我唔會賠返件衫俾你㗎…」佢當然係繼續講佢嘅英文。
我心諗：我有講過叫你賠咩？不過，當時我仲未識講嘢，只係支吾：「咁…我…」我知，我要好好哋再培訓一下我狗衝嘅反應。
「咁…我帶你去買過件…衫囉…」連佢都開始支吾；漏口應該係會傳染嘅。
於是，兩個心口有鬼口水嘅人就信步走咗入去某商場地庫嘅男裝部。
我承認，到今時今日，我都唔可以肯定，當時嘅我係絕對清醒嘅。俾女/仔迷嗰種三魂唔見七魄嘅飄飄然，我諗大家都會試過；但係飄成咁我都係第一次。
唔通佢係迷暈黨？
落到去買衫，其實大家都有啲心不在焉。佢點解心不在焉我唔係好清楚，但我心不在焉嘅原因，除咗迷藥仲未過之外，主要係因為我仲未諗到點抄佢牌。
終於，我揀咗件淺藍色嘅恤衫，然後佢好起勁咁幫我講價。原來，鍾意講價係女人嘅天性多於實際需要。
我繼續心不在焉咁俾錢。當我正想硬著頭皮咁問佢攞電話之際，佢將剛才從售貨員手上接過嗰袋衫遞俾我，然後同我講：
「你仲未諗到點問我攞電話？咁我走先喇，bye！」
「咪住！你…你叫咩名？」我垂死掙扎。
「下次再遇見就話你知啦！」佢嫣然一笑，好似 Julia Roberts 咁嘅笑容；撞鬼，使唔使笑得咁甜呀。
佢拋低咗句「안녕히 계세요！」然後佢消失於人群中。（當然我係要幾個月後先明呢句噏講乜）
而我就繼續戇鳩鳩咁秤住袋衫企咗喺度。
算吧啦你，今日仲未柒夠呀？回神一諗，原來我成日乜都未食過；唔怪得之咁飄吓飄吓。
都係搵間 cafe 食啲嘢再睇吓女啦，可能仲俾我撞到第二個希臘鼻呢；who knows!
（待續）
