當首爾仍是叫漢城的那些年(伍拾捌)

2021/02/16閱讀時間約 7 分鐘
你哋同你哋嘅 Ex(s) 關係如何?有冇再見亦是朋友?抑或見佢前面憎佢後面?我相信大部份嘅「前度關係管理策略」(ExRMS)其實都係後者居多;老老實實,分得手,又點會咁容易做得返朋友吖;有彎轉又點會無啦啦分手喎。
不過,凡事都有例外嘅。Colette 同我,喺分手之後,都仍然能夠保持良好關係。咁多年嘅日子,唔好話我哋身邊嘅朋友,就連我哋兩個本身,都覺得係個奇蹟。
只不過,喺呢段漫長嘅前度關係裏面,佢都俾過我唔少,令我幾乎心臟病發嘅時刻。

仍然係年初一嘅夜晚。
姐姐夠鐘返佢嘅 graveyard shift(罪過罪過),食完年糕做甜品就走咗;屋企又得返我哋兩個,Chloe 瞓咗喺我大脾上面繼續睇電視。對於佢嚟講,我對脾一係就要嚟晾腳,一係就要嚟做枕頭。
不過,今晚佢攞我對脾嚟做乜都唔緊要咯,因為我都冇心情去諗。我個心,俾 Colette 嗰個放假大計,嚇到唔知跳咗去邊。
如果唔係我有女朋友的話,Colette 嚟探我,其實係件好開心嘅事。上次佢嚟探我,我哋都開心咗一個星期。問題係,上次佢嚟嗰陣,佢個身份,仲係我女朋友;而家,呢個 position 已經另有主人。
古語有云:「情已逝 你當初一帶走 便再不歸」。當日,佢好堅決要分手,喺冇選擇之下,我唯有順從。既然一切已成定局,我哋亦都再見亦是朋友,點解佢會無啦啦提出,放假要嚟漢城探我同 Chloe 呢?
前度女友同現任女友,就好似水同鈉,分開擺冇乜嘢,你試吓放埋一齊睇吓點。
生命誠可貴;為安全著想,我要諗個藉口推咗 Colette。
「蠢蛋呀,」Chloe 一邊望住電視,一邊同我講嘢。「我晏晝唔覺意𥅈到,好似 Colette 有 email 俾你喎。」
差啲唔記得,女朋友偷睇男朋友 email 是常識吧。都好,到時大條道理同 Colette 講:「Chloe 話唔好喎」。
「你又唔覺意睇到我啲 email 呀?」我邊問佢邊輕輕搣佢面珠。
「女朋友睇男朋友 email 喺韓國係合法㗎,你認命啦。」佢邊講邊坐起身,然後坐上我大脾。冇錯,呢個係我對脾嘅第三個用途。「Colette 想過嚟探我哋呀?」
「係呀,」我懶老定咁答佢。「不過唔係幾好嘅,話晒佢都係我嘅前度女友;等我聽日覆佢話唔好啦。」我驚佢收唔到,專登講埋「前度女友」呢個詞嚟刺激吓佢。
「唔好,」Chloe 嘅答案令我以為自己幻聽。「你哋咁耐冇見面,難得見吓嘛;更何況,我都未見過佢,我都想見吓佢。」
「你……你……你講真㗎?」我聲都震埋。
「係呀!」佢點一點頭。「話晒你同佢都咁多年朋友,做唔成情侶啫,都可以做好朋友㗎!咁佢係你好朋友的話,我冇理由同佢連面都唔見啫。」
呢次輪到我被殺個措手不及喇。我呢個連提吓第二個女人、或者提吓3P都要「安全地移除下體」嘅「金太太」,竟然主動要求,要同我前度女友見面。我諗呢鑊莫講話我,就算我個「祖師婆婆」Erika 喺度,都未必識得拆。
「唔使咁驚喎蠢蛋哥哥,」Chloe 一邊摸住我塊面一邊笑住講。「最多應承你,我同佢唔會喺你面前打交吖!」
「我唔係驚你哋打交,」坦白講,你雖然係高妹,但講打講好力,你點會係有腹肌嘅 Colette 對手。當然,諗還諗,打死我都唔敢講出口。「不過,你同佢又唔識,夾住我喺中間,身份又尷尬,我驚到頭來三個都冇癮啫。」
嗱,呢啲就真係心底說話喇!萬一你兩隻嘢嘴藐藐面阻阻,夾住我喺中間做磨心,真係唔慌唔比死更難受喇。
「嘻嘻,蠢蛋呀,」Chloe 古古惑惑咁笑。「你又知我同 Colette 唔熟?你肯定?」
「吓?」呢次到我 O 晒嘴喇!你唔係大我呀下話?
「其實呢,有件事我一直冇同你講㗎,」佢陰陰嘴笑。「自從上次我搵佢幫手救你之後呢,我同佢一直都有保持聯絡㗎,嘻嘻!」
「你講真㗎?」呢啲算唔算背主私通?按照大清律例,我可以浸你兩隻嘢豬籠㗎喎。
「係呀!」佢由陰陰嘴笑變咗傻笑。「嗰次你冇事之後,我 email 佢,同佢講咗聲多謝,之後我哋就 keep 住有聯絡喇。不過佢真係冇同我講過,話放假過嚟探我哋;佢對你其實都好尊重。」
我女朋友背住我,同我個前度女友 email 通訊,而我就一直乜都唔知。睇嚟我呢個男朋友,真係戇鳩鳩唔知喺度做乜 Q。
值得安慰嘅係,我哋冇為呢件事有任何磨擦,而我又有能本事保持一直唔知。即係話,佢兩個一來隔空相處到,二來佢哋冇乜點講我壞話,三來我冇隱瞞過佢兩個任何嘢,亦冇行差踏錯,否則一早出咗事。
應該係話,死咗都唔知乜事。
事到如今,我冇選擇啦下話?!
兩個都正衰婆嚟㗎!

二月尾某星期六,纛島漢江公園籃球場。
又係打波嘅時候;雖然我比較少寫,但其實星期六晨七咁早打籃球呢個習慣,咁耐都冇變。
Chloe、Ricky 同 George team up,同另外三個同場打波嘅𡃁仔打緊 3 on 3。點解我唔打?因為我要搵姐姐救命囉。
冇錯,Colette 復活節嚟探我哋,呢個已成定局,冇得變;但係佢嚟咗之後點拆,我一定要掹埋美恩落水。有乜衫長褲短,佢就算勸唔到交,起碼都幫到我著草;再退而求其次,護士起碼識急救。
講笑啫,點會咁大鑊吖。
真係講笑?
「弟弟呀,俾姐姐望真啲你個樣吖!」美恩笑到有啲眼濕濕,呢啲真係笑到標眼水喇。「我驚我而家唔望真你,過咗復活節冇機會喇,哈哈哈哈!」
「姐姐你係咪咁對我呀……」我其實都有個星星眼可憐樣,只不過除咗我嗰兩隻嘢之外,冇外人見過。今次對住美恩,我要出埋呢招。
「你電我冇用㗎弟弟,」美恩繼續笑。「你留返啲電力,電暈你嗰兩位紅顏知己仲好啦!既然佢哋都鍾意你,或者佢哋俾你電到三魂唔見七魄,可能你會冇咁傷呢!哈哈!」
「姐姐呀!姐姐!」唔過電,唯有典地。「我係你個弟弟喎!連你都唔幫我!咁點算呀?」
「年幾兩年時間,你終於真係似返個弟弟喇!哈哈!」美恩終於笑完。「其實你都唔使咁擔心喎,佢兩個既然可以保持聯絡咁耐,如果要反面的話,一早反咗啦!女人天性,如果佢哋真係互相猜忌,唔會話因為俾面你就當冇事㗎!所以你唔使擔心佢哋見面會大打出手。」
「講係咁講,」我其實唔係冇諗過,只不過係說服唔到自己。「但係隔住個 email 傾偈,同面對面又係兩回事。萬一是但一個唔覺意做咗啲乜,另外一個睇唔順眼的話,咁……」
「你意思係,Chloe 同你喺 Colette 面前打情罵俏,Colette 會酸溜溜;」美恩對男女關係嘅分析,永遠都係一矢中的。「然後一個唔覺意,Colette 又對你做出啲以前同你拍拖做慣嘅嘢,到時輪到我個傻妹妹想煎咗你層皮,係咪?」
「姐姐真係善解人意喇!」我繼續落藥,點都要拉埋你落水㗎喇。「如果真係咁,我就真係過唔到復活節喇……」
「唔使賣口乖喇!」美恩終於投降。「睇在你同妹妹係我哋嘅伴郎伴娘份上,今次我幫你啦!到時 Colette 嚟咗,你哋去玩,我陪埋你哋去,咁得未?」
「多謝家姐!」呢句多謝家姐唔係賣口乖,係真心嘅。呢年幾以來,我同美恩最有姐弟 feel,就係呢個 moment。
由知道 Colette 想嚟探我哋開始,到呢一刻,個心總算踏實咗啲喇。雖然 Murphy’s Law 嘅嘢,唔係我想控制就控制得到;起碼,有乜𠵱郁,我都仲有個姐姐幫吓手;死都唔好淨係我一個死晒吖。
(待續)
為什麼會看到廣告
IF
IF
Medium 累積超過一百萬 claps 嘅廣東話作者。小說 《當首爾仍是叫漢城的那些年》系列、《北角演義》、《初雪》、《中環遊戲》作者。https://medium.com/@herrfung 、 https://t.me/ifpush
留言0
查看全部
發表第一個留言支持創作者!