現代科技，日新月異，劍擊隨時都可以變電競。之前提及過俄羅斯一間科技公司，研發咗一部VR劍擊模擬器，原來呢部嘢早前已經面世。
呢部名為《Fencer》嘅劍擊模擬器，研發公司原意係畀一眾初學者，可以透過VR熟習劍擊呢個運動，而喺段宣傳片入面展示《Fencer》嘅練習，有唔同小遊戲協助玩家訓練手上動作同步法，之不過影片入面只得重劍，可能花劍同佩劍未能使用呢個模擬器。
要玩呢個VR，其實唔難，放低2000蚊歐元（約18,758港幣），唔使2萬蚊就可以擁有呢一套《Fencer》，然後戴上VR眼罩、一把劍加個App，就可以VR練習。呢間俄國公司都表示，佢哋目標客群就係唔同劍會，等初學者可以快快樂樂學劍擊。
針無兩頭利，可以一個人練習，就必有缺陷，最大問題莫過於同其他劍手練習嘅機會，好似直刺或者防守呢啲動作，都好難透過呢個VR練到實質動作。俄國公司都知道呢個Bugs，就表示呢個模擬器主要訓練手上動作，熟能生巧，以肌肉反應記住動作，打好基本功咁話。如果有機會的話，大家都不妨一試喎。
