Góa 看 Aldous Huxley ê 相

坦白講，góa m̄ sī boeh 做一个 kā 擁護、kā 支持 ê 讀者。自細漢到大漢，tī góa ê 印象 tang-tiong, 有 kúi-lō 改 tī 誠品冊店，ùi 冊架仔頂頭，看 tio̍h 伊 hit 本名聲 thàng 規世界 ê《Brave New World》；M̄-kò goán soah m̄ bat siōⁿ tio̍h boeh tòe 人讀 hit本 chu. Sī 因為最近 iá teh 看《Bandersnatch》ná chòe 紀錄，聽 tio̍h 排第二 ê 男主角講起 Aldous Huxley 另外一本 chu, 號做《The Doors of Perception》，而且 koh kham 劇情有關聯，goán 毋才專工 chhōe chit 本轉來讀。

Ùi 正爿 kā 冊皮掀開，第二張紙頂頭，正是 Aldous Huxley ê 相。Góa 講一句心內話，伊有影 seⁿ chòe chiâⁿ 普通，不過 sī 穿插面貌，有 khah thé-biān tām-po̍h--á. Aldous 梳一个海結仔頭，頭額曠闊，毋知 ná 低層 ê 平埔，a̍h-sī 懸山 ê 原野；伊面憂面結，雙眉長長烏兼粗；目頭腫一癗勼做伙，可比一粒珠 khiā tī 風水貴寶地 ；下面 iū-koh 啄鼻，兩爿目箍 nah--loeh, chhiōⁿ 溪溝仔，萬底深坑，毋過目屎 ê 河，已經 chok 久 m̄ bat ùi chit 逝流過。頂下片喙脣 kap 鬥陣，khah 薄過 Siang-khoe-口 ê 沙崙-tōe.

內底白色 ê siat-chuh kah ne-khú-tái 掠外，Aldous it-sin ê 烏衫；伊外面 tha̍h chi̍t 軀 se-bí-lo͘h, 穿 kah 撆紮 koh 整齊；iah-nā 褲跤 ê 花草，sī 幼 kah ná 米篩空，毋知敢是當時歐陸 ah 北美洲 tng-teh 時行 ê 款式？Aldous 肩胛頭歪一爿，手骨垂過 chhek, theⁿ 兩爿坐--leh, 雙蕊目睭 lia̍h 翕相機金金相，看 kah sī 一直 bōe 轉輪。

Hit 陣 Aldous 年歲 gōa chōe？Kan-na chit hāng iá 看 bōe chhut. 雖然 góa 形容 kah chiah 幼路，事實講，無定著 góa 一睏仔 tō kā 伊 ê 面容放 ō͘ bōe-kì. 聽講，in 兜 兩位阿兄 lóng 去做生物學家，家族頂面 koh 有一个阿公 Thomas, 早前已經 tī 學界 kài 出名；毋知 Aldous 敢有種傳 tio̍h 親戚 ê 五官面相，a̍h-sī 腹內有繼承 in 做生物研究 ê 才情，應用 tī-leh 寫作 ê hit 方面？

Aldous Leonard Huxley 自英國 ê 菁英世家來出世，ka-bûn 有阿公 Thomas Henry Huxley. Thomas 伊做一个 thui-sak 達爾文「進化論」ê 關鍵人物，去予人人 kā 叫做講「達爾文 ê 鬥牛犬」（Darwin's Bulldog）。Aldous ê 阿姨正是小說家 Mrs. Humphry Ward, 也就是 Victoria 時期頭等 ê 文學家兼文化批評家 Matthew Arnold ê 姪仔。Iah-nā Aldous ê 兄哥 Andrew Huxley, kah 阿公 Thomas 平款，成做出名 ê 生物學家。M̄-koh Aldous ka-kī 自細漢 soah 身體虛弱，16歲讀中學 ê 時 tio̍h 眼疾，兩蕊目睭 chŏaⁿ 漸漸仔看無；尾仔去 Balliol College 讀書，m̄-koh 等 kah 第一次世界大戰，soah koh 因為視力退化蓋緊，無法度 tòe 同學做伙去參加相戰。

1937年 Aldous 遷徙去美國蹛，徛 tiàm 西岸定居。伊 bat 替 Hollywood 影戲寫劇本，chhan-chhiōⁿ ùi Jane Austen ê 小說《Pride and Prejudice》改編 ê 電影，當時 sī Laurence Olivier 做主演。Aldous 尾仔 koh bat hŏng 提名七改 Nobal 文學獎，一直到1963年十一月二十二 Aldous 去做仙，tú-hó kah 美國總統 John F. Kennedy hŏng 刺殺身亡發生 tī kāng 一工……。