圖 ê 來源「台灣教會公報新聞網」 https://tcnn.org.tw/archives/34412
Kō͘ Tâi-gí 寫這篇 siàu-liām 晴美姊 ê 文章 sī 上好 ê 選擇, 因為就算講伊尾手 lóng 是 tòa Sūi-tián koh 得著 A-chu-hái-bah 症, 伊猶原是拍拚 teh 做母語運動 kap 寫作.
知影晴美姊這 ê 人是 ùi 424 刺蔣事件另外 2 位男性主角開始, 往過保守教育 ê 影響以及媒體刁工對女性角色輕視 ê 因端, 致使我完全 kap 一般人 kāng-khoán kan-na 興英雄款 ê 人物. 對下手彈銃 kap 喝「Let me stand up like a Taiwanese!」ê 黃文雄先生崇拜 kah.
一直到這幾冬, 開始參與較濟社會運動 ê 都合, 熟似 khah 濟有 teh 運動 ê 友志了後, 對 424 事件 ê 理解越愈深刻, 才知影當初時 ê 行動者內底, 有一位真了不起 ê 女性（我想晴美姊凡勢會無 kah-ì 人 án-ne ka phô͘）, 伊 ê 思想 kap 行動完全無較輸查埔人, tī 彼 ê 時代 ê Tâi-oân-lâng 凡勢無幾 ê thang 有伊彼款 ê 智慧 kap 勇氣. 這定著 sī 咱 ài 去重視 kap 傳湠 hō͘ 閣較濟 Tâi-oân-lâng 知影, 咱 bat 有一位 chiah-nī 有情有義有智識 ê 俠女 teh 海外為 Tâi-oân 拍拚.Ti 進前已經出版 ê 冊內底咱知影 424 事件 ê 準備工課, 晴美姊--á 自頭到尾 100 % 參與 kap 計劃, Peter 彈銃了和翁婿自才棄保走路, 這段 424 事件 ê 延長戰鬥甚至 lóng sī 伊家己孤身面對, ài 連絡友志鬥相共 chhiâu-chhe̍k, koh ài 想辦法晟養 2 ê 囡仔, 家己 mā 需要討趁過生活, kan-na 想 tō 知影彼內底壓力有偌爾仔沉重. 伊毋若 sī 無去 hō͘ 壓力拍敗, 甚至會使講 sī kā 逐項代誌 lóng 處理 kah 真順序 koh 得著彼當陣國際上濟濟人 ka 相 thīn. 毋若 sī 民間組織 ê 朋友, tī 英國 koh 有彼當陣 ê 在野黨政治人物來關心伊 ê 訴求, 咱 ka 想看覓, 這後壁需要 gōa 堅強 ê 意志 kap 態度以及計劃才有通產生遮闊 ê 效果？聽講伊 kan-na 是 1 ê 154 公分懸 ê 女子 niā-niā, soah 會當承擔彼當時自美國到瑞典, koh ùi Norway 到英國踮 hia 1 冬 phah 引渡官司, 路尾自才兄 hō͘ 美國成功引渡倒轉去監獄關 chia--ê 事事項項.
Tī 過程當中毋若 sī 時間拖磨, 生活環境 tiāⁿ-tiāⁿ ài 改變 ê 無方便, tī 無 kāng 國家 ài siâⁿ in ê 人民來關心 1 ê hō͘ 政府追捕 ê 「國際政治犯」, 更加 sī 需要有政治意識 ê 人才有才調處理 ê 狀況. 另外伊 koh 需要 tī 做救援行動 kāng 時安排朋友 tàu 照顧 2 ê 囡仔, 在我看--來若講伊 sī 千手觀音媽等級--ê, 應該 sī 袂有人反對才著, 有影是 1 位獨立自主 ê 女性 ê 大範. 咱 ài 想, 彼 sī tī 1970 年代 ŏ͘h！
Tī 伊煞尾 ê 人生路途, 伊毋是親像英雄故事內底 ê 角色, 自彼了後 tō 無 koh 冒險挑戰, 當伊知影咱 tī Tâi-oân ê 母語文運動 tng-teh 推 sak ê 時陣 tō 開始研究學習, 伊家己 mā 逐不時會寫作投稿, kō͘ Tâi-gí 文發表家己 ê 想法意見, 我想凡勢這成做 sī 伊思念故鄉 ê 方式.
真濟人去到外國生活了後, 對 Tâi-oân tō kan-na 賰「健保費俗 koh 大碗」, 「投資房地產趁錢」這款物質價值 ê 路用, 其他--ê tō kap 中國華人無精差, 甚至 koh 會去靠勢中國人（華人=Chinese）海外組織, 放捒家己成做 Tâi-oân-lâng ê 認同 kap 尊嚴, kan-na 有利益 ê 時陣才會喝「我是台灣人！我愛台灣！」這款人到底愛--ê 是啥物 neh？
咱 tī 晴美姊身軀頂所看--tio̍h-ê, 是自信勇敢面對變化 kap 衝突, 1 世人 lóng teh 冒險 kap 拍拚, 成就 1 ê 獨立女性 kap 世界 Tâi-oân-lâng ê 典範, 這款精神 sī 往過咱毋捌去重視 kap 教 hō͘ 囝孫--ê, 向望自這馬開始會有愈濟少年人來熟似, 閱讀晴美姊 ê 故事, kā 伊 ê 精神傳湠--落去.
