以前仲係好窮的時候 （雖然而家都唔係好有錢，但係都尚算有少少積蓄），真係乜嘢都捨得買，我最貴兩個手袋同隻手錶係我最窮嘅時候買，差唔多瞓身成副身家去買，因為個心態就係反正都冇錢，唔買呢樣又唔見得啲錢會多咗，於是就搵藉口買禮物送畀自己。
直到前兩年我升咗職之後，真係可以儲到少少錢，個心態就唔同咗，而家好多嘢都唔捨得買唔捨得洗，我個手機已經好舊好殘，因為仲用到，於是一直都的唔起心肝去買，又例如而家見到一件衫$700，覺得好靚好想買，但係跟住就心諗，嘩原來都差唔多一千蚊，買十件就一萬㗎喇喎，於是又忍住，然後覺得自己啲皮膚好乾，想買啲護膚品，唉又覺得好貴又唔捨得買，而家我用緊萬寧施巴嗰啲好平嘅護膚品。而家洗錢嘅地方偏向買一啲經驗感受，而不是物質，最捨得洗錢嘅地方就係去旅行，有陣時都會捨得飲$50、60一杯咖啡，但一個all day breakfast，喺香港食要$138我又唔捨得食。我都定義唔到自己洗錢嘅模式，有啲飄忽，都有implusive shopping嘅情況。