紅魔鬼賽後評
英超 賓福特 1-1 曼聯 (30-3-2024)
1. 拎得一分，真係唔抵…我講緊賓福特。
2. 國際賽後，傷兵陸續回歸，雖然仲係冇左閘，但其餘十個位都勉強叫做齊腳，對住近況麻麻既賓福特，理論上應該會好返啲。不過今場踢出黎既表現，除咗頭十五分鐘之外，只能夠用兩隻字黎形容︰垃圾。我唔想咁講，但真係垃圾。
3. 回顧返全場，除咗球曼治既入波之外，根本冇一腳有威脅既攻勢，賀龍果球我唔計喇，本身般奴應該越位，入咗既話睇返VAR一樣會係詐糊。
4. 反而賓福特，佢哋響十五分鐘取得連續幾次角球開始，就開始主宰咗成個局面，其實佢哋製造咗好多有威脅既射門，只係球員響臨門處理一腳爭啲，又或者係比奧拿拿救到，淨係計中柱中楣都起碼三次，仲未計自己撻Q射咗唔知去邊果啲。
5. 唔係講笑，如果對手把握力好少少、又或者果幾球中柱中楣好彩少少、又或者今場守龍果個係季初果個奧拿拿，就算曼治果球係入，我諗都應該要輸夠六比一。
6. 第二段先講大部份傷兵回歸，結果今場華拉尼同埋連迪路夫又傷，加上唔知伊雲斯既傷勢係點，黎緊兩場對車路士同埋利物浦隨時得返麥佳亞同埋馬天尼斯。
7. 講起今場賓福特皇牌東尼對住冰人同埋馬天既對碰，前者簡真係完勝，冰人上半場壓制唔到佢，只能夠盡量比壓力佢，而馬天尼斯好明顯未操fit，響比人圍攻既時候代替受傷既冰人上場，又交失波、防守時企位又進退失據，仲有幾日又要對住車路士，真係唔知可唔可以操得切。
8. 不過咁垃圾既表現，曼聯反而響96分鐘一次反擊，由右路安東尼傳中，般奴交比後上既卡斯米路，再傳個靚波比曼治射入，呢下都好難以置信，估唔到比人射足三十幾腳，反而會係曼聯入波先，仲諗住今次係咪真係咁好彩？
9. 抱歉，唔會真係咁好彩，又係今季曼聯典型既失球方式，就係後上既進攻球員冇人理，比東尼硬爆入到底線，艾耶無人看管下射成一比一入場。究竟成班友走到咁入做乜鬼呢？
10. 其實今次都唔係第一次曼聯響入球之後短時間失波，但估唔到今次係入完波之後人哋第一個攻勢就入，屌。
11. 最失望既唔係比數，係球隊今場場上既表現，中場第二點永遠爭唔贏，賀龍回後冇人follow到，前場一壓逼就中場穿窿，人哋好輕易就劏開我哋條中場，正選果三個中場中，麥湯同埋文奴表現奇差，般奴好少少但都係唔合格，我記得睇United People TV分析過，只要麥湯同埋般奴一齊正選，球權就好難保得住，因為一個技術粗糙、一個好冒險進攻，兩個加埋好易失球權，唔係落後要變陣都唔應該咁出，我諗呢個分析都有少少今場既寫照。
12. 下半場我諗過咗十五至二十分鐘之後，唔知係咪覺得對抗唔到賓福特既中場，組織唔到攻勢，曼聯決定改變戰術係咁斬波上前場唔經中場造波，但係今日兩隻翼都冇威脅，賀龍做支點冇人follow，可以話個效果奇差。
13. 要勉強揀一個曼聯MOM，我會揀奧拿拿，我諗佢係今晚唯一一個可以抬起頭走出球場既曼聯球員。
14. 最後喇，進攻既時候真係睇得出有個左閘既重要性，雲比沙卡推落底線殺唔入禁區，又要及返後用右腳傳返出黎，咁你殺入底線黎做乜？
#不專業足球筆記 #足球專欄 #專欄 #我愛紅魔鬼 #英超
#紅魔鬼賽後評 #BENMUN #曼聯 #賓福特 #足球 #賽後評
#英超賽後評
更多專欄內容︰ https://www.leafopenleafopen.com/unprofessional9up
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
