［性別講看覓］—「攏是咱查某人的代誌」
以前我上班的機關有合作社，賣一寡食的、文具、生活用品，價數較俗，學生、教職員攏來買。落尾倩的店員攏是囡仔大漢，閣出來上班的「二度就業」的查某人。
有一擺in咧欲下班的時間，我去買物仔，聽in佇講：「下班轉去，閣愛煮飯，食完規厝內的工課，攏是咱查某人的代誌。」
我看in佇櫃台坐規工，誠無閒，下班坐公車轉到厝，煮飯，全家食煞，規桌頂的碗筷、賰菜，猶閣有洗衫、拭塗跤……，遮仔厝內面的工課，攏是「查某人的代誌」，工課哪是按呢分查埔、查某的？厝內面其他佇食飯的人攏是死人矣？叫袂振動，抑是有人的手較高尚，遐的代誌查某人做「就好矣」！抑是in家己嘛按呢想，共規家伙仔的厝內面工課貿來做？
聽in二、三个人佇講，我的心內感覺足艱苦。
進前我的工作室開課，教人摒掃，講師頭一个就講：「家事不是媽事。」有一个老母𤆬伊的查某囝來，想欲學按怎做，會使共厝內摒甲清氣閣較緊做完。聽伊講，伊逐擺菜煮完，就共瓦斯爐佮抽油煙機攏鑢清氣，按呢就沒時間摒別位。講師講，逐工愛做無仝位的工課。按怎佮厝內面的人參詳各人的物仔囥佗位，擲捒進前愛問物仔主人的同意……，遮仔愛注意的代誌攏有教。
遮仔厝內面的工課無人愛做，誠少人會自動去做，古早時代，全貿來做的「查某人」就愛家己出聲，分配，叫逐家動手，若逐工做甲艱苦罪過，過日子的「幸福感」欲佇佗位來呢？
註：昨暗我佇想，我寫遮仔我聽過一、二个人講的，看過一、二个人做的代誌，寫出來，有意思無？可能干焦彼一、二个人的想法佮做法，佮其他的人有相甘無？
昨昏天氣變熱，厝內有蠓仔出現，原來，我聽著嗡嗡嗡的聲音時，跤頂懸已經予伊咬幾落喙，佇癢。我用手拍死一隻，想講無蠓仔，會使放心。料想袂到，猶有第２隻，攏總拍死３隻。原來，蠓仔毋是我想的，干焦拍死一隻就無代誌矣！
我想著進前看過一篇文章，講你看著一隻虼蚻，表示你的厝內覕七十隻，嗯！按呢我知啊！雖然我干焦聽著一、二个人講，毋過，有彼个想法佮做法的人毋但in一、二人爾爾。我就繼續寫落去。
（2024.4.12.）
你可能也想看
