有的人講的話
●有一擺，我的查某囝送我一領衫，外套，
伊講伊一擺買兩領，一領予我好無？我講好。
我穿去上班，有一个同事看著，隨講：「這款衫市場真濟，一領兩百箍。」我雄雄無知影欲按怎應，伊佮我無仝辦公室，抑無時間閣講，我想欲共伊講的是：「是我的查某囝予我的，伊袂佇市場買衫啦！」真奇怪，看著「仝款」，就隨講是佇市場買的，表示伊逐項攏知影，彼領兩百箍嘛知，伊的喙講話誠緊。
●退休的同事同齊食飯，
有一个人咧聯絡，辦這件代誌。
有一擺食日本料理，講是講日本料理，毋過是較簡單的彼種。菜點煞，箸、湯匙仔、茶愛家己去提。
餐來矣！逐家開始食，那食那開講，講到愛家己去斟茶，有一个同事講：「日本料理攏嘛愛來桌仔邊共人斟茶、服務，哪會叫人家己去斟？」
我講：「你看這个餐有肉有魚，閣有菜，才一百外箍，等於簡餐類，茶家己去斟。」奇怪，伊聽著「日本料理」，頭殼內底就有全套的服務，猶無看當場的情形。規間店內，一个人佇櫃台予人點餐、收錢，捀菜的另外一个，一百外箍的物仔，店內裝潢袂䆀 bái，誠舒適，啥人欲閣共你服務矣！
●講到囡仔耍電動，就開始罵政府
欲去行跑馬古道，我啥物車攏無，長長的產業道路攏用步輦的。看著一个中年的查某人咧修理水管，山壁頂懸有誠濟條水管，應該是引山水去用。我倚去共伊講：「你誠𠢕 gâu，家己修理。」
「為著生活，無法度。」伊那做那講：「政府若抾稅的時，就袂共你袂記得，若講到自來水，就無人插阮，阮兜無自來水。」
「你蹛佗位？」
「山跤。」伊手指山跤：「猶無自來水。」
「彼是２个無仝的單位。」
「嘛仝一个總統。」
我想著共我抾著的籽仔提出來問伊：「你知影這是啥物樹仔的籽無？」
伊看一下，講：「敢若是楠。木字旁，閣一个南方的南。」伊用手指頭仔寫佇伊的手蹄仔頂懸予我看。
「多謝，我欲予囡仔耍，無知影是啥物樹仔，驚伊有毒無？」
「𤆬 tshuā囡仔來這耍就好。」
「伊這馬較細漢，等伊較大漢才𤆬 tshuā伊來行路。」
「講到教育，這馬囡仔攏咧耍電動，政府的教育有問題……」囡仔耍電動就來罵政府，我聽伊罵２句就緊來走，共伊再會囉！
（2024.7.13.）
你可能也想看
