歡迎收聽「台語講怪奇」。
咱chit ê節目是beh用台語來kā ta̍k-ke紹介chit ê世界上，真濟奇奇怪怪ê代誌。
用台語來表現，ǹg望ta̍k-ke聽liáu ē感覺趣味。
頂1回咱紹介--ê是，明帝國遇--tio̍h ê 1件chok衰ê代誌，今á日第3齣，咱beh來講--ê是「月娘ê秘密」，ta̍k-ê lóng看--過ê月娘，tàu底有啥物怪奇--leh ！
等leh等leh，你beh紹介--ê，應該m̄是beh講，有人偷the̍h in ang ê仙丹，飛ùi月娘--去hit ê故事hoⁿh。
M̄是m̄是，咱beh講--ê，m̄是hit款欺騙gín-á ê故事。
Ŏ͘？Ah無，咱beh講--ê，是啥物款ê故事？
咱beh講--ê，是騙大人ê故事。
Eh！你báng烏白kâng騙ŏ͘！
Tī 1969年，全世界siōng大ê新聞，to̍h是人類頭1回登陸月球。
Beh去kā hit粒仙丹搶--轉-來。
Sòa--落-來，美國ê太空人，to̍h一直去、一直去、一直去。
Kám是chhōe無hit粒仙丹？
Hó͘，你是有jōa愛hit粒仙丹--lah！
Ah無--leh，kám是beh去買兔á牌麻糬？
然後，過無幾冬，tī 1972年以後，to̍h無人koh去月球--ā。
Án-ne一定是he兔á牌麻糬無好食。
聽講hoⁿh，是tī月球面頂，去tú tio̍h外星人！
Nah ē無lia̍h 2隻á轉來研究看māi--leh。
Nah有可能，你ka想看māi，人類舞hiah久，開hiah chē錢，chiah有法度登陸月球，結果人已經chhoân便便tī hia leh等--你，eh，che gún ê地盤neh，你是beh創啥！
走hiah遠去到月球，soah去hông恐嚇--o͘h！
Hèⁿ ā，koh想beh kâng lia̍h 2隻轉--來，你食較bái--leh-lah。
Án-ne講，月娘頂面，真正有外星人o͘h！
有a̍h無我是m̄敢講--lah，m̄-koh聽講hoⁿh，in m̄-nā tú tio̍h外星人，koh有看tio̍h chiâⁿ久以前，siak tī hia ê UFO，koh有m̄知外久進前ê城市建築物。
Hăⁿ？Chiah-nī怪奇ê代誌，我nah ē lóng m̄-bat聽--過。
因為美國政府kā chit kóa代誌lóng am-khàm--起-來，m̄ hō͘人知影。
Āi-iò͘，ah你kā chit kóa代誌講--出-來，kám ē hō͘人查水表。
免驚--lah，che lóng是後--來聽人講--ê，聽講hoⁿh，2013年，日本人koh發現有UFO，用真緊ê速度，tī月球表面siu̍h siu̍h siu̍h飛過來koh飛過去。
Kám有可能是太空pùn-sò，in看liáu m̄-tio̍h去--ah。
無可能，hit ê UFO，1 ê to̍h有1公里hiah長neh！
是較大pû ê太空pùn-sò--ā！
M̄-koh伊m̄是直直飛--過-去，伊koh oat來oat去，án-ne飛，koh án-ne飛。
Án-ne一定是he駕駛hoⁿh，lim酒醉koh tī hia駛UFO，bo̍k怪ē有1台siak tī hia！
Hò͘ⁿ，千萬m̄-thang o͘h，ē hông罰錢。
M̄-koh hiah大台ê UFO，平常時是beh chhàng tī tó？
Hèⁿ，che to̍h趣味ā，你kám知影，月球se̍h地球公轉，kah伊ka-tī tī hia自轉， se̍h 1 lìn ê時間，竟然是kāng款--ê。
Hăⁿ？Chiah tú好？He kám有啥iàu緊？
Nā是án-ne，伊面對地球ê hit面，永遠是kâng 1 pêng，to̍h是講，月球後壁生liáu啥款，你永遠to看bōe tio̍h。
Hăⁿ？Ah nā是UFO chhàng tī hia，咱ùi地球頂頭m̄ to̍h看bē tio̍h--ah。
Tio̍h，nā是hit pêng有外星人ê基地，咱mā看無。
M̄-tio̍h--ā，chit-má ê科技chiah-nī發達，射1粒衛星去kā伊hip相，mā m̄是啥物困難ê代誌--ā。
Ah nā伊是chhàng tī土腳底--leh。
Hiah大chiah ê UFO，beh chhàng tī內底，m̄ to̍h ài挖1 ê chiok大ê khang，he真費氣neh!
真費氣hōⁿ！
Nā beh chhàng 2 chiah，m̄ to̍h ài挖2 ê khang，beh chhàng 100 chiah，to̍h ài挖100 ê khang neh！
Ah無，to̍h kui-khì kā kui粒月球，chiâⁿ做太空基地好--ah。
Hăⁿ？Án-ne siuⁿ hàm--ah-lah！
聽講hoⁿh，月球ê表面chiok tēng，tēng-khiau-khiau，tēng-khong-khong，鑽bē --入-去，beh挖khang mā chok pháiⁿ挖。
Kah你ê心肝kāng款tēng-kho̍k-kho̍k。
Ah m̄-koh伊內底soah khang-khang-khang。
Kah你ê頭殼kāng款，無物件。
Eh！你是kah我有冤仇o͘h！
冤仇是無--lah，m̄-koh，你m̄是講，he表面chiok tēng，鑽bē--入-去，án-ne是beh按怎ka挖kah khang-khang-khang。
Nā án-ne kui-khì mài挖--ah，咱tăⁿ開始to̍h kā設計做1 ê空心--ê to̍h好 。
Án-ne, kám講bē親像ke-kui-á kāng款，破1 ê孔，soah kui-ê變做火流星lak--落-來！
聽--起-來親像啥物絕招--leh，我想hoⁿh，應該是bōe--lah，tī 1970年，Apollo 13號發生意外，1 chat 15噸ê火箭lak tī月球表面。
Ŏ͘，驚--死-人，hiah重lak--落-去，án-ne ē地動neh。
Hèⁿ ā，hiàng時，khǹg tī月球面頂ê 1台機器，to̍h有去記錄tio̍h地動，結果án-chóaⁿ你kám知，hit ê地動竟然liân-sòa搖3點鐘。
Hăⁿ-à？Nah ū可能--lah！
He月球hoⁿh，nā內面是cha̍t-pak--ê，án-ne伊kan-na ē搖1分鐘，nā beh搖kah 3點鐘，to̍h真正有可能是空心--ê-ō͘。
驚--死-人，是siáng有本事舞chiah大條！
你kám ē記--leh，進前有1段時間，chhui-bîn chiok時行，chhui-bîn chiâⁿ趣味neh，真濟人hông chhui-bîn了後，ē講出伊ê前世是siáng，teh做啥物代誌。
Hèⁿ，我ē記--eh，hit ê時陣我mā想beh知影我前世是siáng，凡勢~是tó 1 ê國家ê公主。
好，無咱來試看māi，來，你看我the̍h--ê chit塊錶á，hàiⁿ來hàiⁿ去~hàiⁿ來hàiⁿ去，你chit-má真ài睏，你慢慢á睏去--ah。
我睏去--ah。
請問你是啥物人？
我是1 ê做工á人。
請問你teh做啥物工程？
Gún ê工作室，teh製造月球。
Hăⁿ？月球是lín製造--ê？Lín是án-chóaⁿ製造--ê？
Goán先製造1 ê圓形ê框，用太空船kā伊拖去天頂，chiah ùi內面kā伊tah--起-來。
To̍h是án-ne，當初hit ê人去hông chhui-bîn了後，伊講--出-來ê代誌，聽--起-來chok hàm，m̄-koh伊講--ê kah咱頭前所講ê hit kóa推論，竟然tàu ē--起-來。
Eh，你nah ē無接話。
我koh teh睏。
Hó--起-來-ah-lah！月娘曝kha-chhng--a。
M̀？Chit-má kúi點--ah？
睏--起-來-ah hōⁿ，khah精神--leh，我koh beh kā你講1件chok奇怪ê代誌。
好，我醒--ah，你講。
你知影--無，咱平常時看tio̍h ê日頭，kā暗時看tio̍h ê月娘，是kāng款大粒neh！
Hăⁿ？真--ê-o͘h？我lóng無注意--過neh。
你後回hoⁿh，nā是出日頭，你to̍h去kā伊斟酌看，出力看，看kám是án-ne。
He目睭ē青盲--lah。
Aih-iò͘，nah ē hiah歹騙。
是講，你今á日講--ê，tàu底是真--ê a̍h是假--ê？
我a̍h知，我講話a̍h無teh負責--ê。
無負責koh敢講kah chiah大聲。
Án-ne咱今á日感謝ta̍k-ke收聽「台語講怪奇」，我是Ko͘-chiáu，我是A-chin in ang，咱後回再會ŏ͘！
Hoan-gêng siu-thiaⁿ “Tâi-gí Kóng Koài-kî”.
Ta̍k-ke hó, góa sī Ko͘-chiáu, góa sī A-chin in ang.
Lán chit ê chiat-bo̍k sī beh iōng Tâi-gí lâi kā ta̍k-ke siāu-kài chit ê sè-kài siōng, chin chē kî-kî-koài-koài ê tāi-chì.
Iōng Tâi-gí lâi piáu-hiān, ǹg-bāng ta̍k-ke thiaⁿ liáu ē kám-kak chhù-bī.
Téng 1 hôe lán siāu-kài--ê sī, Bêng tè-kok tú--tio̍h ê 1 kiāⁿ chok soe ê tāi-chì, kin-á-ji̍t tē 3 chhut, lán beh lâi kóng--ê sī “Goe̍h-niû ê pì-bi̍t”, ta̍k-ê lóng khòaⁿ--kòe ê goe̍h-niû, tàu-té ū siáⁿ-mih koài-kî--leh!
Tán--leh tán--leh, lí beh siāu-kài--ê, èng-kai m̄-sī beh kóng, ū lâng thau-the̍h in ang ê sian-tan, poe ùi goe̍h-niû--khì hit ê kò͘-sū hoⁿh.
M̄-sī m̄-sī, lán beh kóng--ê, m̄-sī hit khoán khi-phiàn gín-á ê kò͘-sū.
Ŏ͘? Ah bô, lán beh kóng--ê, sī siáⁿ-mih-khoán ê kò͘-sū?
Lán beh kóng--ê, sī phiàn tōa-lâng ê kò͘-sū.
Eh! Lí báng o͘-pe̍h kâng phiàn ŏ͘!
Tī 1969 nî, choân sè-kài siōng tōa ê sin-bûn, to̍h sī jîn-lūi thâu 1 hôe teng-lio̍k goe̍h-kiû.
Beh khì kā hit lia̍p sian-tan chhiúⁿ--tńg-lâi.
Sòa-lo̍h-lâi, Bí-kok ê thài-khong-jîn, to̍h it-ti̍t khì, it-ti̍t khì, it-ti̍t khì.
Kám sī chhōe bô hit lia̍p sian-tan?
Hó͘, lí sī ū jōa ài hit lia̍p sian-tan--lah!
Ah bô--leh, kám sī beh khì bé thò͘-á pâi môa-chî?
Jiân-āu, kòe bô kúi tang, tī 1972 nî í-āu, to̍h bô lâng koh khì goe̍h-kiû--ā.
Án-ne it-tēng sī he thò͘-á pâi môa-chî bô hó-chia̍h.
Thiaⁿ kóng hoⁿh, sī tī goe̍h-kiû bīn-téng, khì tú tio̍h gōa-chheⁿ-lâng!
Nah ē bô lia̍h 2 chiah-á tńg-lâi gián-kiù khòaⁿ-māi--leh.
Nah ū khó-lêng, lí ka siūⁿ khòaⁿ-māi, jîn-lūi bú hiah kú, khai hiah chē chîⁿ, chiah ū hoat-tō͘ teng-lio̍k goe̍h-kiû, kiat-kó lâng í-keng chhoân piān-piān tī hia leh tán--lí, eh, che gún ê tē-pôaⁿ neh, lí sī beh chhòng-siáⁿ!
Cháu hiah hn̄g khì kàu goe̍h-kiû, soah khì hông khióng-hat--o͘h!
Hèⁿ ā, koh siūⁿ beh kâng lia̍h 2 chiah tńg--lâi, lí chia̍h khah bái--leh-lah.
Án-ne kóng, goe̍h-niû téng-bīn, chin-chiàⁿ ū gōa-chheⁿ-lâng o͘h!
Ū a̍h bô góa sī m̄-káⁿ kóng--lah, m̄-koh thiaⁿ-kóng hoⁿh, in m̄-nā tú tio̍h gōa-chheⁿ-lâng, koh ū khòaⁿ tio̍h chiâⁿ kú í-chêng, siak tī hia ê UFO, koh ū m̄-chai gōa-kú chìn-chêng ê siâⁿ-chhī kiàn-tio̍k-bu̍t.
Hăⁿ? Chiah-nī koài-kî ê tāi-chì, góa nah ē lóng m̄-bat thiaⁿ--kòe.
In-ūi Bí-kok chèng-hú kā chit kóa tāi-chì lóng am-khàm--khí-lâi, m̄ hō͘ lâng chai-iáⁿ.
Āi-iò͘, ah lí kā chit kóa tāi-chì kóng--chhut-lâi, kám ē hō͘ lâng chhâ chúi-pió.
Bián-kiaⁿ--lah, che lóng sī āu--lâi thiaⁿ lâng kóng--ê, thiaⁿ kóng hoⁿh, 2013 nî, Ji̍t-pún-lâng koh hoat-hiān ū UFO, iōng chin kín ê sok-tō͘, tī goe̍h-kiû piáu-bīn siu̍h siu̍h siu̍h poe kòe-lâi koh poe kòe-khì.
Kám ū khó-lêng sī thài-khong pùn-sò, in khòaⁿ liáu m̄-tio̍h khì--ah.
Bô khó-lêng, hit ê UFO, 1 ê to̍h ū 1 kong-lí hiah tn̂g neh!
Sī khah tōa pû ê thài-khong pùn-sò--ā!
M̄-koh i m̄ sī ti̍t-ti̍t poe--kòe-khì, i koh oat lâi oat khì, án-ne poe, koh án-ne poe.
Án-ne it-tēng sī he kà-sú hoⁿh, lim chiú-chùi koh tī hia sái UFO, bo̍k-koài ē ū 1 tâi siak tī hia!
Hò͘ⁿ, chhian-bān m̄-thang o͘h, ē hông hoa̍t-chîⁿ.
M̄-koh hiah tōa tâi ê UFO, pêng-siông sî sī beh chhàng tī tó?
Hèⁿ, che to̍h chhù-bī ā, lí kám chai-iáⁿ, goe̍h-kiû se̍h tē-kiû kong-choán, kah i ka-tī tī hia chū-choán, se̍h 1 lìn ê sî-kan, kèng-jiân sī kāng-khoán--ê.
Hăⁿ? Chiah tú hó? He kám ū siáⁿ iàu-kín?
Nā sī án-ne, i bīn-tùi tē-kiû ê hit bīn, éng-oán sī kâng 1 pêng, to̍h sī kóng, goe̍h-kiû āu-piah seⁿ liáu siáⁿ-khoán, lí éng-oán to khòaⁿ bōe tio̍h.
Hăⁿ? Ah nā sī UFO chhàng tī hia, lán ùi tē-kiû téng-thâu m̄ to̍h khòaⁿ bē tio̍h--ah.
Tio̍h, nā sī hit pêng ū gōa-chheⁿ-lâng ê ki-tē, lán mā khòaⁿ bô.
M̄ tio̍h--ā, chit-má ê kho-ki chiah-nī hoat-ta̍t, siā 1 lia̍p ōe-chhiⁿ khì kā i hip siōng, ma m̄ sī siáⁿ-mih khùn-lân ê tāi-chì--ā.
Ah nā i sī chhàng tī thô͘-kha té--leh.
Hiah tōa chiah ê UFO, beh chhàng tī lāi-té, m̄ to̍h ài ó͘ 1 ê chiok tōa ê khang, he chin hùi-khì neh!
Chin hùi-khì hōⁿ!
Nā beh chhàng 2 chiah, m̄ to̍h ài ó͘ 2 ê khang, beh chhàng 100 chiah, to̍h ài ó͘ 100 ê khang neh!
Ah bô, to̍h kui-khì kā kui lia̍p goe̍h-kiû, chiâⁿ chò thài-khong ki-tē hó--ah.
Hăⁿ? Án-ne siuⁿ hàm--ah-lah!
Thiaⁿ kóng hoⁿh, goe̍h-kiû ê piáu-bīn chiok tēng, tēng-khiau-khiau tēng-kho̍k-kho̍k, chǹg bē--ji̍p-khì, beh ó͘ khang mā chok pháiⁿ ó͘.
Kah lí ê sim-koaⁿ kāng-khoán tēng-kho̍k-kho̍k.
Ah m̄-koh i lāi-té soah khang-khang-khang.
Kah lí ê thâu-khak kāng-khoán, bô mi̍h-kiāⁿ.
Eh! Lí sī kah góa ū oan-siû o͘h!
Oan-siû sī bô--lah, m̄-koh lí m̄ sī kóng, he piáu-bīn chiok tēng, chǹg bē--ji̍p-khì, án-ne sī beh án-nóa ka ó͘ kah khang-khang-khang.
Nā án-ne kui-khì mài ó͘--ah, lán tăⁿ khai-sí to̍h kā siat-kè chò 1 ê khang-sim--ê to̍h hó.
Án-ne, kám kóng bē chhin-chhiūⁿ ke-kui-á kāng-khoán, phòa 1 ê khang, soah kui-ê piàn-chò hóe-liû-chhiⁿ lak--lo̍h-lâi!
Thiaⁿ--khí-lâi chhin-chhiūⁿ siáⁿ-mih choa̍t-chiau--leh, góa siūⁿ hoⁿh, èng-kai sī bōe--lah, tī 1970 nî, Apollo 13 hō hoat-seng ì-gōa, 1 chat 15 tòng ê hóe-chìⁿ lak tī goe̍h-kiû piáu-bīn.
Ŏ͘-ò͘, kiaⁿ--sí-lâng, hiah tāng lak--lo̍h-khì, án-ne ē tē-tāng neh.
Hèⁿ ā, hiàng sî, khǹg tī goe̍h-kiû bīn-téng ê 1 tâi ki-khì, to̍h ū khì kì-lio̍k tio̍h tē-tāng, kiat-kó án-chóaⁿ lí kám chai, hit ê tē-tāng kèng-jiân liân-sòa iô 3 tiám-cheng.
Hăⁿ-à? Nah ū khó-lêng--lah!
He goe̍h-kiû hoⁿh, nā lāi-bīn sī cha̍t-pak--ê, án-ne i kan-na ē iô 1 hun-cheng, nā beh iô kah 3 tiám-cheng, to̍h chin-chiàⁿ ū khó-lêng sī khang-sim--ê-ō͘.
Kiaⁿ--sí-lâng, sī siáng ū pún-sū bú chiah tōa-tiâu!
Lí kám ē kì--leh, chìn-chêng ū 1 tōaⁿ sî-kan, chhui-bîn chiok sî-kiâⁿ, chhui-bîn chiâⁿ chhù-bī neh, chin-chē lâng hông chhui-bîn liáu-āu, ē kóng chhut i ê chêng-sè si siáng, teh chò siáⁿ-mih tāi-chì.
Hèⁿ, góa ē kì--eh, hit ê sî-chūn góa mā siūⁿ beh chai-iáⁿ góa chêng-sè sī siáng, hoān-sè~sī tó 1 ê kok-ka ê kong-chú.
Hó, bô lán lâi chhì khòaⁿ-māi, lâi, lí khóaⁿ góa the̍h--ê chit tè pió-á, hàiⁿ lâi hàiⁿ khì, hàiⁿ lâi hàiⁿ khì, lí chit-má chin ài khùn, lí bān-bān-á khùn khì--ah.
Góa khùn khì--ah.
Chhiáⁿ-mn̄g lí sī siáⁿ-mih lâng?
Góa sī 1 ê chò-kang-á-lâng.
Chhiáⁿ-mn̄g lí teh chò siáⁿ-mih kang-têng?
Gún ê kang-chok-sek, teh chè-chō goe̍h-kiû.
Hăⁿ? Goe̍h-kiû sī lín chè-chō--ê? Lín sī án-chóaⁿ chè-chō--ê?
Goán seng chè-chō 1 ê îⁿ-hêng ê kheng, iōng thài-khong-chûn kā i thoa khì thiⁿ-téng, chiah ùi lāi-bīn kā i tah--khí-lâi.
To̍h sī án-ne, tong-chho͘ hit ê lâng khì hông chhui-bîn liáu-āu, i kóng--chhut-lâi ê tāi-chì, thiaⁿ--khí-lâi chok hàm, m̄-koh i kóng--ê kah lán thâu-chêng só͘ kóng ê hit kóa chhui-lūn, kèng-jiân tàu ē--khí-lâi.
Eh, lí nah ē bô chiap ōe.
Góa koh teh khùn.
Hó--khí-lâi-ah-lah! Goe̍h-niû pha̍k kha-chhng--a.
M̀? Chit-má kúi tiám--ah?
Khùn--khí-lâi-ah hōⁿ, khah cheng-sîn--leh, góa koh beh kā lí kóng 1 kiāⁿ chok kî-koài ê tāi-chì.
Hó, góa chhíⁿ--ah, lí kóng.
Lí chai-iáⁿ--bô, lán pêng-siông sî khòaⁿ tio̍h ê ji̍t-thâu, kā àm-sî khòaⁿ tio̍h ê goe̍h-niû, sī kāng-khoán tōa lia̍p neh!
Hăⁿ? Chin--ê-o͘h? Góa lóng bô chù-ì--kòe neh.
Lí āu-hôe hoⁿh, nā sī chhut ji̍t-thâu, lí to̍h khì kā i chim-chiok khòaⁿ, chhut-la̍t khòaⁿ, khòaⁿ kám sī án-ne.
He ba̍k-chiu ē chheⁿ-mê--lah.
Aih-iò͘, nah ē hiah pháiⁿ phiàn.
Sī kóng, lí kin-á-ji̍t kóng--ê, tàu-té sī chin--ê a̍h-sī ké--ê?
Góa a̍h chai, góa kóng-ōe a̍h bô teh hū-chek--ê.
Bô hū-chek koh káⁿ kóng kah chiah tōa siaⁿ.
Án-ne lán kin-á-ji̍t kám-siā ta̍k-ke siu-thiaⁿ “Tâi-gí Kóng Koài-kî”, góa sī Ko͘-chiáu, góa sī A-chin in ang, lán āu-hôe chài-hōe ŏ͘!
