佇「我是礁溪人」的社團內底看著有人寫伊去看TBM，有相片（９月８日貼的），我佇下跤回應問佇佗位？伊有說明，閣有一張地圖，我看起來應該是交流道的附近。
幾若工後，我坐客運車欲轉去台北。佇欲上交流道的進前，我攑頭看頭前的高架橋，無想著，伊的邊仔，我的目睭前，就有「ＴＢＭ」的字，我知影高架橋下跤的正手爿是停車場，按呢我越頭看倒手爿，哈！潛盾機就佇遐，路邊較入去一點仔的所在，這條路我來回行遐爾濟擺，毋捌越頭看著彼个大機器。
今仔日特別去看伊。先去白石腳站食畫，食煞走路過去，公車站２站爾爾。我本來行佇路的倒手爿，想欲翕高架橋邊仔的「ＴＢＭ」的字，過馬路去行正手爿。
翕煞了後，愛揣人行道過馬路。行到車攏咧越正手爿，欲上交流道的路口，才有花條馬線，我有注意著無設指示人過馬路的青紅燈，對面有２个警察。等對面轉青燈，我開始過馬路，有一个警察行到路中央，指揮交通，手攑起來，叫交流道落來，欲越倒手爿的車停落來，予我先過馬路，我緊行，向警察攑手，表示我有看著你為我服務，多謝伊。
當年咧開磅空的時，我知影有一部潛盾機予突然間落落來的塗石埋佇內底，救不出來，紲落來，水流８年 （８年無毋著吧！）。
我看資料，咧講這个工程有外艱苦，有工程人員因為做這个工課，家庭破碎（我咧頭殼底家己想，in足無閒，袂當歇睏轉去厝內，嘛無照顧家庭，in的某擋袂牢，𤆬 (tshuā)囡仔來離開—嫁別人）。
磅空完成了後，有人（單位）咧觀察頂懸的茶園有變化無？遐仔流㧒捒的水是自佗位來的？...... 遮的歷史，予我拄來礁溪住的時，有一段時間毋願意坐客運，猶原搭火車轉去台北，感覺過彼个磅空是誠恐怖的代誌。
為啥物，欲佇大山的內底開一條遐困難的道路呢？動著大山，雖然去台北較省時間，對東部的發展較好。
（2024.9.15.）
註：
￭TBM— tunnel boring machine
￭查詞典 教育部臺灣台語常用詞辭典
https://sutian.moe.edu.tw/zh-hant/
作者攝
