這幾若工，逐家攏足歡喜台灣提著世界十二強摃球的冠軍；幾若十年前，是紅葉少棒拍贏日本關西隊，我想著閣較早的代誌。
量約仔60幾年前，我誠細漢的時，全台的少棒比賽佇宜蘭市的中山小學舉行，正式比賽結束了後，猶有的隊留落來佮其他的隊做家己好耍的比賽，我的外公𤆬（tshuā）我去中山國小去看，行行一下。
外公的朋友過來講話，彼當陣仔，有一隊自台東，抑是花蓮來的隊誠強，伊講：「in比賽彼工，囡仔無食飯，輸去。𤆬（tshuā）隊的教練老師的錶仔提去當……」
「落尾比完，in留落來閣比一擺，是in贏。」彼个意思就是有人出錢予in食飯，所以毋免隨轉去？閣會使留落來比耍的。
我較大漢了後想著這件代誌，感覺足可憐，教練領隊𤆬（tshuā）一陣囡仔遐爾仔遠來比賽，錢用了，應該是冠亞軍彼場上重要的比賽無食飯，輸去。in有車錢通轉去無？敢是比賽激烈，延延，加蹛一、二工？宜蘭市內的好額人，若聽著這個消息，有人鬥出錢無？人知影的時，代誌（比賽）嘛過去矣！in會當順利轉去就誠好。
彼當陣，遐的囡仔的厝內可能攏散赤，學校嘛無經費，無公開募款的觀念，當地嘛無對象通募，去一擺全國的比賽是誠無簡單的代誌。遐的囡仔佇厝內可能嘛無逐頓有飯通食，毋過，in是出外，猶閣咧比賽，因為無錢，無食飯，我這二工想著，嘛閣感覺囡仔可憐，老師誠辛苦，閣偉大。
