瓊瑤家己決定無愛閣活落去，嘛成功轉去。
前幾若工，消息出來了後，我看瓊瑤的面冊，講到伊的翁婿平鑫濤過身５年外。我有一站仔追踪瓊瑤的面冊，彼當時平咧住院，伊講伊交出醫療決定權予平的囝兒，干焦去病房看平。有一擺講著平的後生欲共平「插管」，我的感覺是伊若聽著「管」，就反應誠大。插好了後，平的後生寫是「插尿管」，按呢處理，人嘛較爽快—彼是平的後生講的，平袂講話。
彼當陣仔，＜瓊瑤全集＞拄拄出版，伊誠歡喜。
瓊瑤寫，平生前有揣伊的３个囝兒，講伊的老死欲按怎處理，講不止一擺，逐擺講的時，瓊瑤無在場，予平佮３个囡仔家己講。
平失智，閣毋知影人了後，瓊瑤主張予平去，彼嘛是平家己的意思，身軀毋免閣再受苦，平的囝兒的看法無仝，雙方冤家，瓊瑤交出醫療決定權，等於共平這个老爸還予平的囝兒。
我的感覺是：
一、彼３个囝兒想欲老爸轉去in的身軀邊，毋知影人嘛無要緊，只要活著，有老爸通叫、通顧就好。橫直是請人顧，毋是家己顧。
我想著古早（嘛無外久進前，這馬嘛猶有），翁婿放捒某囝，外口另外有家庭，某忍耐一世人，無想著離開，抑是離婚這件代誌，守佇老家。等矣等，等查埔人重病，抑是死了後，屍體扛轉來，彼个老某哭照哭，心內可能誠歡喜，上尾等到你轉來，伊會使用正某的身分辦喪事，翁婿袂曉講話，死去嘛無要緊。平的囝兒是毋是有這種想法？
二、另外一个可能是，囝兒誠怨嘆老爸放捒in的老母佮in，佮瓊瑤結婚，刁工毋予伊快活去，加受一寡仔苦，報復。有當時仔，這是藏意識（潛意識）內底的意思，本人毋知影in按呢做有這个意思。這嘛是有可能。
三、就是欲反對瓊瑤的意思，毋佮伊的意思仝款，佮伊冤家，欲爭替in老爸的代誌做主。
３个囡兒佮平的前某一直罵瓊瑤破壞in的家庭，瓊瑤講是平一直追求伊，伊拒絕誠濟擺，膏膏纏十幾年，應該怪的是in老爸，怪查某人較簡單。當時瓊瑤一个人𤆬一个囡仔，家己愛生活，愛飼囝，寫小說賺錢，平出版瓊瑤的小說，生理誠好，誠真人買。
平放捒同齊創業的前某，佮瓊瑤開創誠濟事業，賺大錢，平的囝兒嘛佇出版社做工課。in的複雜的關係，外人毋知，我是看瓊瑤的面冊佮新聞，想著遮的想法，共寫出來。
