Ich habe das lecker Gericht in Chemnitz in einem Libanon Restaurant kennen gelernt. Ich suche das leckere Rezept im Internet. Ja Mega lecker, wir mögen es sehr!!!
第一擺食黎巴嫩餐廳是人 tī Berlin 見著一群歐洲人出出入入隨成做貓徛踮店門按內底貓貓仔相，店東隨行倚來笑微微講「來坐」。
我 tuì 中東文化無一个認捌又閣捷捷 kā 橐袋仔麭𩛩肉遮 ê 料理直接認定是土耳其料理，所致 mā 綴 leh 文文仔笑兼幌頭表示「多謝」。按呢互相客氣來客氣去，店東踅轉去招呼人客，我越頭揣人猶原 Unterwegs ê 男朋友，這久 ê 翁，敢有發見女朋友 hőng 拐去。
「這是黎巴嫩餐廳，你敢無興趣？」知影 m̄ 捌字兼 m̄ 捌一个呼 ê 女朋友 tuì Phoenicia(腓尼基)文化有莫名其妙 ê 興趣，總算搪著一間按這角勢來 ê 人呔無喝講「我 bueh 來體驗一下。」
我手指內底 ê 水煙妝娗佮橐袋仔麭𩛩肉，翁知影我 ê 14 隨講「希臘 mā 有 Kebab。」
聽翁按呢講，我又閣成做一隻貓 kā 頭輕輕仔伸入去店內瞭一目，店東彼對佮翁無分懸低 ê 牛目 mā 拄拄好按我遮䀐過來「來坐，遮閣有坐」店東微微仔笑，手指倚角 ê 桌講。
四常是翁膽膽 m̄ 清彩烏白亂坐，這久換做伊隨大大典典按店東手指 ê 位坐好勢，換我膽膽 m̄ 敢踏出一步。見翁學我先 kā 頭洗落去 ê 態度，欶一口氣 kā 笑容固定 hōo 好勢，跤手儘量放 hōo 自然行入店內綴翁坐好勢，開始點菜。
菜單無相片，德文又閣 2266 只好恬靜等翁紹介，總是翁較按怎紹介齊是若土耳其烘肉店 ê 肉𩛩麭 hōo 我更加確定伊 uī-tio̍h 家己 ê 喙斗 kā 一隻蝨母嗙甲水牛大。
店東應當看出我 tuì 德國人傳統喙斗有興趣，隨行倚來紹介米料理。我認真聽伊紹介，總是 m̄ 捌一呼 ê 我真僫綴伊畫巡，押尾接受伊 ê 建議點一盤傳統食食 - 十全盤。
這个十全盤 m̄ 是伊正式 ê 名字，起因無頭神 ê 我 m̄ 捌記過伊 ê 字名，總是十全盤 ê 腥臊佮好味素到今我猶記牢牢。
2020 肺炎疫情湠甲德國觀光業 kiōng-bueh 倒擔倒了了，gún 翁某就順這个勢四界蹛飯店𨑨迌兼相楗一下仔翁 ê 本業。
這份食譜就是彼陣綴飯店優惠券四界𨑨迌搪著 ê 好味素，只不過這擺換我大大典典行向櫃檯點菜，換翁 m̄ 敢踏入店間一步。
「我非常確定這間是阿拉伯人 ê 食食」我行入去店內捎一張菜單出來那勾菜色那 tuì 膽膽 mā 食土耳其烘肉店食甲飫 ê 翁講。
「按佗落看出來」翁問。
「按你 tī 土耳其烘肉店看 buē 著 ê Baba ganoush 佮 Hummus，這兩項是我按阿丁遐學來--ê」我講。
阿丁是敍利亞人，聽著我哭呻德國超市 Baba ganoush 佮 Hummus 䆀味隨講伊 bueh 請𪜶某做一份 hōo 我改變想法，我 mā 確實自拄著阿丁媠某 ê 好手藝愛 Baba ganoush 佮 Hummus 愛甲若豆腐仝款，見著阿拉伯人開 ê 烘肉店有這兩項決定入店交觀。
「這敢冷盤」我手指冰櫥問少年頭家，少年頭家頭那講頭那 tìm mā 那紹介這是真受𪜶黎巴嫩人佮意 ê 冷盤，𩛩橐袋仔麭、肉閣透濫薄荷優格醬，是一份退火氣閣食甲哽胿 ê 好味素。
Tī 我猶未拄著衣索比亞餐廳 ê 珠仔豆料理，我 tuì 珠仔豆印象䆀甲若見著冤仇人，食過衣索比亞餐廳 ê 好味素，準做又閣搪著 tsuē 冬前 tī 柏林 ê 無法度跟綴店東畫巡，總是我知影無試鹹汫 ē 捶心肝。
德語 ê Linse, die Linse 指目睭 ê 珠仔豆 alias 華語 ê「水晶體」mā 指光學 ê 透鏡。 華語 ê「小扁豆」 tī 德語 mā 號做 Linse，die Linse，因為伊看起來宛然目睭 ê 珠仔豆，不而過，咱食豆仔永遠 buē kan-ta 食一粒，一个豆莢 mā buē kan-ta 一粒豆仁，所致講著食 ê 珠仔豆 ē 講 Linsen, die Linsen 來表示伊是豆➀。
這冷盤 tī 若火燒埔 ê 日子，正港是解大腸告小腸燒粅粅食 buē 落喉，焦甲若柴框 ê 德國麭 mā 無興楔入喙止枵，冰冰涼涼 ê 珠仔豆是解熱兼救枵 ê 天使➁。
➀ 資料解說，gún 兜小父さん。
➁ 傳統芳料是薄荷
