德國鳥鼠正經無洗身軀，蓋鼠(趣)味。交德國人講德國寒人菜蔬，10 个德國人隨有 10 个燃一鈷 buē 記持禁火 ê 茶請我啉「德國寒人寒甲菜蔬種 buē 出來，所致 gún 慣勢 tī 寒人交熱人生菜過日。」
早前 m̄ 捌扞過鼎，自然 buē 去要意德國食食市場，自開始扞鼎我定感覺家己 ê 目睭有問題，起因德國 ê 寒人菜蔬交《穆斯林與猶太少女》所形容 ê 無啥無宛 2 體，有茄仔有 Kam-má-tooh 等等，唯一無相𫝛是向時 ê 鞏金閣包銀成做目今 ê 四常，人人食 ē 起 ê 進口菜蔬。
另外，準做德國寒人無菜蔬， 罐頭酸菜、罐頭紺草花抑是鹹篤篤 ê 瓜仔哖等等 mā 窒倒街有地 bué，而且這久 ê 氣候 hōo 無著時 ê 草花兄弟姊妹猶有才調 tī 12 月天青 líng-líng 妝娗田園。我捌 tī 2 月天見過發甲健欉 ê Wirsing 米蘭草花。德國 ê 米蘭草花最後收成是 11 月底，本地栽種 ê 米蘭草花賣無夠額 ē 按意大利進口。
德國人 ê 四常慣勢觀察記錄到遮，tī 遮我 kan-ta 想 bueh 順德國人 ê 分張審視家己 ê 慣勢，家己敢有田螺較循舊逝，較行 mā 仝逝 ê 驚改變，抑是好好仔鱟刣甲屎那流，像翁爸母，像翁 ê 朋友，像翁𪜶齊是好船拄著好港路，卻因為厚甲若蠓 ê 理由 kā 生活過甲亂七八糟。
遮 ê 亂七八糟 m̄ 是講生活匪類，是講身體健康。心肌窒 ê 人，酒照啉，甜照食。關節炎是喙食出來 ê 人講關節炎 tsiah m̄ 是喙食出來是人年歲一到就有 ê 問題。
「遮無醫生破病 bueh 按怎生？」一日交翁做陣看電視，一陣人去阿爾巴尼亞旅行，見著當地無醫療資源隨問這句，聽著德國人按呢講阿爾巴尼亞人第一个反應是伊罕得破病，準做破病 mā 順其自然，像張明志醫師 tī《菊子客家庄的醫生娘》ê 形容。
阿爾巴尼亞田庄人一日無閒貼貼，無時間 kā 家己按 S 食甲 XXXL mā 無時間 kā 家己食甲無到 40 就關節炎交腰尺 phàng-kìnn 閣 m̄ 驚三高來相揣，因為醫療 tsiâu-tsn̂g 甲有問題免驚惶，只要 kā 藥仔做啖糝食就大丈夫。
好船拄著好港路卻 kā 好好仔鱟刣甲屎那流，好好仔健康舞甲腹肚做藥櫥，這我無法度理解，總是遮 ê 故事是我 ê 點揬，搪著問題 buē 因為揣空抾口就大丈夫 ê 外甥仔點燈火，一切照舊。
往過，巡網路讀著生份人分張德國草花無臺灣高麗菜好食隨跟綴生份人 ê 喙斗拒絕德國草花，這久發見寒人無食草花是一件交銀兩 buē 過心 ê 揣麻煩，畢竟人兩跤，銀四跤，喙斗 m̄ 改兼喙白唯一 ê 未來 mā 是好好仔鱟刣甲屎那流 kā 腹肚做藥櫥。
草花自來 m̄ 是臺灣原生品種，目今 ê 高麗菜 mā 是根據臺灣塗肉交氣候所改良 ê 近代版本，草花是歐洲人專門，我 buē 使得田螺循舊逝，較行 mā 仝逝 ê 向家己慣勢 ê 語文請教伊 ê 味素，我需要楦闊家己 ê 世界。
感謝分張這份食譜 ê 𠢕人，馬鈴薯敆尖頭草花正港好味素。
