我９月搬來瑞芳。頭一暝佇遮蹛，水道水用濾水罐濾好，欲插電去燃滾水的時，才看著壁頂的插座是２空的，我的滾水罐的插頭是３支，愛去買轉接頭。
去到店內，一直咧想延長線欲選幾个插座的？決定４个。轉來了後，包裝拆開，才看著伊的插頭嘛是３支，才想著，無彼款插頭２支，延長線的插座是３空的，燃水罐仝款袂使用。
第２工閣去買，這擺注意愛選插頭是２支，才插會落去，頂懸有開關的，會使共幾个插座的電關起來。轉來到厝，插起起插座，會使插是無毋著，毋過頂懸的２个插座空嘛是２空的，閣買毋著，唉！傷久無去買這款電氣類的物仔矣！
第３擺閣去買，愛揣插頭是２支，頂懸的插座是３空的，這種是無延長線的，先轉變，再閣插延長線，揣著一粒頂懸有２个３空，２个２空的，誠好，２種延長線攏會使插。
嘛拄好，３个攏有用到，彼支２个２空的，插電腦佮手機仔，無用的時共開關關起來，電腦袂一直充電；頭一擺買的延長線插佇２支轉３空彼一粒頂懸，延長線閣插燃滾水的茶鈷佮電風，攏有用著，只是去買３擺才買著，買齊全，有夠好笑！
（2025.9.）
教育部台語辭典，https://sutian.moe.edu.tw/zh-hant/
