老爸、老母的老母，華語講「祖母」，台語叫「阿媽」，嘛是對較濟歲的查某人的稱呼。毋知佗一年開始（三、四十年前），「阿嬤」出現，就按呢流行起來，有人講是中國出品的古早戲的連續劇傳來的。
我以早看中國彼塊土地頂懸的古早小說（咱講的古早小說攏是對面彼塊土地發生的），內底寫的「嬤嬤」，是奶母，抑是佇厝內面鬥做工課的使用人，華語講的「老媽子」，小說內底的「老婢女」，用這个字來叫家己的阿媽，抑是別人的阿媽，實在誠無妥當，毋但是無禮貌爾爾。
華語內底無「阿嬤」這个詞，台語無「嬤」這个字，是台灣人（？？）提來代替原本的「阿媽」，敢若「嬤」這个字皺痕較濟，較老款，看著這个字，緊提來做叫阿媽的字，唉！
咱講的「公媽」嘛是「媽」，毋是「公嬤」。請逐家來寫
「阿媽」
「阿媽」
「阿媽」
多謝！
教育部台語辭典, https://sutian.moe.edu.tw/zh-hant/
