我蹛佇成功大學校園的邊仔，彼棟有四、五層，全部是套房，看起來是稅予成大的學生蹛，我查PTT的稅厝版看著的，厝頭家蹛佇幾若間厝的頭前，in後生規家伙仔嘛佇附近。
簽約是佮太太簽的。有一擺，我接著伊的電話，問我洗身軀間的水道頭生做啥款？伊佮伊翁佇大賣場買材料，我共講。我講我無佇的時，in嘛會使來換。下擺拄著，我問修理的代誌，伊講：「無伊我哪有法度。」原來，伊管稅厝，厝跤的代誌，伊的翁婿猶咧上班，下班時間管修理。
我蹛的是一樓，後壁有一个細細的埕，後門拍開，就是後壁巷仔，我共後壁門的鎖匙予伊，伊的oo-tóo-bái直接入來，就毋免閣去拍一份頭前門佮大樓大門的鎖匙，嘛較袂予其他的人看著，誠好。
我日時仔去成大的校園內底行行一下，拄著博物館，有咧展覽，就入去看，看甲誠詳細。in兜的跤踏車無人咧用，騎來借我，我佇附近的街仔路四界騎，熟似台南市，若欲出去較遠的所在就坐公車，無oo-tóo-bái嘛無要緊，我袂曉騎。
我會去市場買菜，用電鍋煮，電鍋提去玻璃門外的坎仔頂煮，佇細埕內底，煮好才共電鍋收入來，早頓佮中畫頓定定家己煮。伊欲暗仔下班來，阮同齊去外口食暗頓，食煞，天氣若好，就去成大的運動埕行路運動，去運動埕的規路攏是人，運動埕內底行路、走相逐的路線嘛是，人洘洘，有的人那走標那看手機仔，做其他的運動嘛是，實在是……
奇美博物館我無去參觀，無想欲看。幾若年前咧寫古早背景的小說的時，真愛看博物館、古厝，去臆古早人是按怎生活的？落尾無閣寫小說，去台南彼２年，已經無想欲看彼號展覽矣！
講幾若件佮伊鬥陣的時的代誌：
￭我若欲暗仔５點到台南，你就共約好的面部保養（做臉）取消，講欲來火車頭接我，我講毋免按呢，約好就去做，做好才來我厝內，我會使行路抑是坐公車轉去，毋免來車頭載我。我毋是坐一下仔就隨欲走，欲蹛幾若工，無差彼２點鐘，生活照常過就好。我無問伊，是按怎欲取消原本欲做的代誌? 人美容師的時間排好，共人取消，嘛是無好的代誌。伊可能認為按呢做是誠重視我？其實毋免矣！
￭伊若想著，問我：「你下次什麼時候來？」我講：「不一定。」伊一點鐘問一擺，抑是一工問２擺，攏是仝款仝款的問句，我為了伊袂閣問，凊彩講：「星期一。」若毋是，到時才閣改。
誠濟擺了後，我問伊：「我已經說『不一定』了，你為什麼還再問？」
「『不一定』不是答案。」
￭我若有代誌想欲請伊載我去辦，抑是買物仔，會共伊講：「我想去ＸＸ，你有空的時候載我去。」講了後，無聲無說，我等誠幾工，愛閣問一擺，伊講：「現在去。」
「你是『答應』規答應，和『去做』沒有連在一起嗎？我要再問一遍才行。因為你在上班，車子你在開，總要等你有空的時候去。」
￭我問伊問題，嘛是無回答，誠濟工了後，我擋袂牢，閣問一擺。按呢幾若擺了後，我問伊：「我問你的事情，你為什麼都不回答，還要我再問一遍呢?」
「因為我還沒決定。」
「你還沒決定可以先跟我說一下，我要知道你有聽到，還記得這件事。」伊的頭殼內底的想法佮我無仝款。
（2026.3.12.）
教育部台語辭典
https://sutian.moe.edu.tw/zh-hant/
