伊講伊對阮的情形誠滿意，有無滿意的所在忍耐就好，彼是伊。我誠無滿意，想著我濟歲矣！欲守著伊一个人過我賰落來的時間？考慮誠久的時間，決定無愛按呢，準備欲共伊講開放式關係。我有女朋友的代誌想欲予伊知影的人攏講了矣！紲落來，除了看冊、看資料，閣去參加阿球𤆬領的「開放式關係讀書會」，幾若個月的時間，嘛摻有看電影、討論、實踐者分享的活動，我攏有參加，先了解清楚。
2015年年頭，我準備好矣！過年了後，我共伊講，伊聽煞，講：「這樣也好，我不在的時候，有人陪你。」看起來沒代誌。
伊轉去台南，揣伊的拉朋友講，逐家毋捌聽著這个做法，攏用原本的想法去想，伴侶應該是干焦有一个，２个以上就是……，幾若萬字的話，我貧惰講矣！
伊的性地規个夯起來，佮我冤家，佮我諍，我一直解釋，我認為這是我講出來的，我有責任解說予伊了解，毋管是見面，抑是敲電話的時，我一直解說。伊受氣的時，會講規氣來煞煞去，我講咱無無好，毋免煞，我閣熟似別人，加一个伴侶就好。伊嘛會使。講３个月，我發覺伊攏無咧聽，無想欲了解，我加了工，氣力了真濟，忝甲強欲曲去，就停落來，莫閣解釋。
伊有一擺來台北的時，講：「之前，我來台北的時候，心裏都很雀躍，但現在心情不好，很沈重。」我想著，這２年，我排活動的時，愛共伊來台北的代誌排入去，拜六、禮拜我較無閒，代誌較濟；抑有，佇工作室的活動，定定袂當準時結束，伊講：「時間到，就叫他們走，不要再講了。」活動時間，伊踮佇後面的房間。我講：「話還沒講完。」
我想欲表示我欲佮伊繼續，無欲煞鼓，我拜六、禮拜會使自由安排活動，改做去台南稅厝，平常時間去，２禮拜去一擺，一擺蹛四、五工。
我去台南的時，伊下班來，阮同齊出去食飯，踅踅一下，有當時候會安排出去𨑨迌，伊是老師，歇熱、歇寒的時，時間誠濟。
（2026.1.23.）
教育部台語辭典，https://sutian.moe.edu.tw/zh-hant/
