「我們都是香港說書人」本土故事作者訪問：問題(三)

(回上題)

十三郎： 你哋係呢次嘅比賽到(暑期八回連載小說大挑戰)，想得到啲咩？

子遴： 對我嚟講，無論係咩類型嘅寫作活動，目的都係將自己的創作同人分享，喜歡嘅可以點讚，唔係佢杯茶嘅可以略過不讀。我覺得寫作係絕大部分情況下，都屬於個人創作，反映作者嘅想法，能夠推動自己寫作嘅，就只有自己，其他嘅回報都屬於獎勵，唔好太介意能唔能夠獲獎或被人賞識，先可以保持創作的動力。

羊之歌： 比賽中，我想得到交流機會，人地睇完我的作品可以俾我意見，更重要可以識到一班志同道合的寫作人。我發覺penana呢度有樣野唔夠好，就係大部分人都係各有各寫，自己寫得爽就算，然後好少會去睇其他人的作品，咁當然少部分人會睇，但真係好少，就算你話呢度度好多點擊數的作品，其實佢每一集都係得百幾二百人睇，實際閱讀人數真係唔多，所以我希望大家都可以多一點看別人的作品，這樣才能俾到人寫作的動力。

萬歲森林： 參加今次比賽純粹想挑戰下自己，冇想過會得到啲咩噃….或者係認識到幾個志同道合嘅作者啦！我覺得多搞創作挑戰係好事，只要題材合適，我會再參與嘅。 我覺得呢個網站應該搞多啲活動(例如裝app推廣)，向外推廣一下，向內就要加強作者同嘅聯繫，始終網站嘅內容完全係作者無償奉獻，網站應該搞多啲推廣作者嘅活動，例如幫多啲好嘅作品推出實體書，搞多啲小說比賽。當然，都可以搞同某啲機構合作嘅指定寫作題材，但係呢種合作只不過係廣告公司同客戶之間嘅合作，對作者似乎冇乜好處，他日隻GAME出咗，GAME公司會唔會專登介紹個故事原作者係乜水呢？真係唔知。所以，若果唔好好管理和推廣，作者就會逐漸流失，倒不如返去連登？又或者去台灣小說網站？ 當然，我係因為珍惜香港有一個咁認真嘅小說平台，才來湊熱鬧，希望呢個網站、以至整體網絡連載小說都可以日益昌盛啦！

3D八爪魚： 無他，就係所有作者想要既野，曝光率。以此次創挑為契機，令讀者產生：『尼條友寫野好有趣。』既諗法，然後去拜讀其他作品。簡單講就係為左宣傳效果。

短頭髮： 同第一題答案類似，我只係想寫一個完整的故事，精不唔精彩唔重要，重要嘅係自己有得著 (例如如何串連零碎的想法、要係咩時候講世界觀設定)，呢啲都係做讀者時不會特意思考嘅嘢。利用呢次嘅比賽去比自己嘗試、體會。可能呢啲對於平日寫開文嘅各位不算啲咩，但對我嚟講呢啲都係得著，亦係我想得到嘅嘢。

天洛卡： 坦白講，梗係想自己嘅小說可以接觸到更多讀者，跟住搵到同好或者知音人！哈哈！我真係會好開心！相信每個作者都有同樣嘅希望。

沒有名字的人： 其實係今次嘅比賽之中，我真係無諗過想得到啲咩。見到自己所寫嘅故事有人去睇，對我嚟講就足夠了。

十三郎： 你哋有咩意見想向作者們提出，鼓勵大家一齊去做某件事/活動/行為？

短頭髮： 我冇啲想講喎 XD。呃 …… 大家加油，莫忘初衷！

天洛卡： 香港係個不折不扣嘅商業社會，連寫作同閱讀亦離唔開現實嘅商業模式。呢一點，明白嘅，理解嘅，始終每個人都要食飯。我希望作者們可以多多留意同思考「作者」、「出版界」同「讀者」之間嘅關係，嘗試帶頭作出改善。三者同時係主動者、被動者和平衡者，形成一個循環，構造出而家嘅寫作閱讀風氣。三者都有作出改善嘅能力，只係差邊個率先動手。長遠嚟講，希望可以喺商業計算同文學創作之間搵到個平衡點，繼而增加文學創作嘅面向。

(續)