台文開講 || 咱ê青春，佇台灣

　　2014年3月ê時，你佇leh佗位？彼當陣ê你，敢有teh關心政治？敢知影除了總統kap市長以外ê政務官叫啥物名？彼當陣ê你，kap現此時當leh看文章ê你，敢有啥物無仝？頂懸這幾个問題，其實就是咱會當回答《咱ê青春，佇台灣》這塊紀錄片ê導演ê答案。

　　4/12，我孤身一个去戲院，拜五下晡，戲院內底ê人比我ioh ê koh khah濟，m̄-koh kap 我仝款beh來看這塊紀錄片就誠少。 　　Beh兩點鐘久ê電影，大部份ê時間我攏是teh比，那看那想講電影當leh講ê這个時陣我當leh創啥物？比看彼當陣ê我知影一寡代誌發生ê時，我ê心情敢有kap這馬聽tio̍h in兩人ê講法無仝款？除了這，我koh會想講，這馬比大學生koh khah少年ê囡仔，敢知影318運動？敢知影佇這場運動結束了後，台灣產生啥款ê變化？

　　這塊紀錄片是導演傅榆佇台灣發生318運動進前就開始記錄ê，記錄ê時間超過6年，伊記錄觀察ê對象，有一个是全台灣通人知ê社會運動參與者，陳為廷，另外一个，可能較無遐出名，m̄-koh mā是社運箍仔內底誠濟人熟似ê蔡博藝。導演tuè in兩个參與誠濟社會運動ê現場kap地方文史ê活動，伊講，伊佇這兩个人ê身上看著期待，伊向望會當佇in兩个ê故事內底看著台灣ê改變是按怎發生ê。 　　佇這層意義頂頭，伊應該算是失敗矣。 　　因為尾仔陳為廷beh選立委ê時，家己決定beh kā過去bat烏白摸tsa̋u囡仔ê代誌講出來，蔡博藝mā因為伊中國人ê身份，佇淡江大學選學生會長失志，加上厝內人kap中國政府對伊參與政治足敏感，所致伊mā變kah無遐爾衝矣。 　　這兩人ê生活攏改變矣，in對社會kap政治ê目標敢若mā無啥仝款矣，但是導演傅榆suah感覺著足大ê遺憾kap無力。

　　這塊紀錄片ê tempo小可仔節無好，有時陣觀眾會無法度專心，m̄-koh這塊片確實是親像其他看過ê人講ê，上精彩、上重要ê部分毋是teh這兩个hőng記錄ê主角，顛倒是上尾仔訪問in ê時哭出來ê導演。頭前所有ê記錄kap期待，予伊落尾ê艱苦心情變kah足好理解。伊講，佇318運動結束ê時陣，伊無法度理解有一寡人對決定beh結束ê、佇議場內底ê人ê憤怒kap失望，尾仔伊發現這就是伊這馬ê感覺，因為伊對家己無信心，所致伊kā向望攏khǹg teh陳為廷kap蔡博藝身軀頂，但是這六冬發生真濟代誌，做一个記錄ê人，伊suah m̄知影台灣到底有變koh khah好無？Mā m̄知影家己到底koh 會當做啥物？這塊紀錄片ê結論，有真深ê無奈。

　　但是，若有機會，我想beh kā傅榆導演講，in 兩人做ê代誌m̄是啥攏無改變tio̍h，上無，我就是uì 2014年了後開始有機會行去路lih，去ka̋ng講罷免、講公投、講性別kap婚姻平權，甚至是講建國，mā是因為我行向政治一步，才會發覺我竟然離我ê爸母話遐爾仔遠，才會決心beh kā我ê爸母話khioh轉來。 　　Khah早我學電影，老師講有一種電影號做公路電影，主角佇故事內底發展一段旅行，然後因為發生一寡代誌來轉變、佇心理方面出現變化，故事結束ê時陣，雖然外口看起來無啥無仝款，m̄-koh 主角確實是改變矣。 　　我想，2014年3月，真正有參與ê人，可能就親像公路電影內底ê人仝款，雖罔別人無一定看會出來咱到底發生啥物變化，m̄-koh佇阮ê心內，對這片土地ê愛kap理解，確實是kap 318運動進前ê家己，無啥仝款矣。

若有kah意我ê文章，tsiah麻煩替我揤♥、追蹤我ê口座 你若有teh使用Line，mā會當買我畫ê貼圖，予台文kap你ê生活koh khah倚！