耞聲遠逐蟬聲亂

我攏想講，燕麥一定是進口的，想袂到阿伯講，這咱台灣的，佇雲林，彼北港溪的溪埔，遐的塗較潤（lūn）。

阿伯講伊攏家己去辦貨，透早四點出發，中正交流道起去到嘉義交流道落來，差不多拄好一點鐘，駛百一。嘉義落去到新港廟，閣過，北港廟，對北港廟後面一條路直直去，到元長土庫仔，五點外的溪埔猶攏白茫茫規片看無啥有。

燕麥一年一收，阿伯講攏十一二月的時，農曆。按呢有影就是透早會規片白茫茫，佮阮屏東的紅豆仔田 若是有落雺的早起相仝。

這毋免澍藥仔，掠壺摃的，攏人工採收。真罕得會當聽著「掠壺（lia̍h-ô͘）」，主詞無明，我臆，是割起來摃麥仔粒的時，直接共摃予落佇掠壺底。

我特別佮意燕麥，煮飯定會摻一寡，顛倒毋捌咧煮五穀米，可能是看著五穀米就會想著粉鳥仔飼料，也是較愛孤味的，一擺摻一項就好。

敢真正是北港溪溪埔的燕麥？咱已經真慣勢「遠方」，總--是離咱遮近的，煞會懷疑是夢。