咱佮家己有偌遠？

今敏个《Perfect Blue》佮《千年女優》

　　舊年開始因為武漢肺炎，足濟電影舊片新修，動畫片嘛是，予我有機會看著幾若片定定聽著攏無看過个片，其中動畫導演今敏个作品就有兩片——《Perfect Blue》佮《千年女優》。

　　講實在我誠佮意彼當時个 2D 動畫片，《Perfect Blue》是 1997 年，《千年女優》是 2001 年，雖然講毋是成本足懸，就是愛苦毒員工，彼種平个畫面，「靜畫」佮「動畫」之間个流動，有真實以外个美感　。

　　兩齣電影講古个方法嘛有淡薄仔成，主角攏是演員，共𪜶拍个片佮真實个生活摻濫做伙，演出比事實閣較真个故事，但是兩片予人看了个感覺差足濟。

　　《Perfect Blue》是咧講對偶像轉型做演員个未麻，猶閣咧躊躇家己到底愛做啥物款个藝人？伊心內个家己、捌人看著个家己、家己向望个家己、捌人期待个家己……遮呢濟無仝个未麻，予伊毋知影欲按呢較好，人講「做戲空，看戲戇」，毋但少年演員揣無家己，踮邊仔看未麻个人嘛是共家己心內想个形影囥佇未麻身軀頂，若是發現著未麻佮期待个無仝，甚至無欲承認真正个未麻，這種想法引起一捾驚人个事件，無到點半鐘个電影對頭轉到尾，予你有時為著未麻煩惱，有時閣會驚未麻，算講是我平常時較佮意个彼款故事。

　　《千年女優》較無《Perfect Blue》遐呢複雜，但是我顛倒較看無，我講會出千代子个人生故事，毋過我無法度了解是按怎愛用一世人去揣一个熟似無幾工个人？了尾千代子講伊愛个是全心咧追一个人个家己，這我會當了解，但是我猶是感覺人生有足濟通好拍拚个目標，毋免開一世人个時間佇一个人身軀頂。後來我看著今敏予人訪問講个話，伊講千代子佮彼个鎖匙男就親像伊佮伊个作品，我就雄雄了解矣，原來這就是價值觀个無仝，對阮來講，阮个作品就是一世人上重要个方向，今敏共伊換作人人會當感受个愛情，來表現過程比結果較重要一項代誌。

　　看過這兩片了後，我嘛會想欲揣這个動畫導演个其他片出來看，進前《東京 Godfathers》重修我無去看，感覺淡薄仔無彩，希望以後有機會踮 Netflix 一類个網路平台看著，按呢就較毋免踮無閒个時陣一直煩惱電影下片。