【開講讀者投稿】：娘花〈好命〉

投稿人：娘花 ／投稿類型：文學創作

你若欲作一個查某人 心肝就愛 kek-hō͘-hiông 𪜶殺人放火你就當作搬戲 𪜶花言巧語你就目睭 peh 金 惦惦上好 橫直除了𪜶想欲拗你的跤[註 1] 查某人的心聲啥人愛聽

佮伊仝款 發現逐擺聽著的我愛你 芳袂過伊家己放的臭屁 目一个 nih,著煞煞去

佮伊仝款 咬一支薰 Cha̍k 出來的鮮血攏點作胭脂 佮伊仝款 Ùi 出生著知影 淚若無媠,攏是討債

佮伊仝款 家己看破 莫閣去相信彼寡剝削者 講啥物道理公平 講你偌好命 tú 偌好命 講你眾人吃,眾人騎,沒人疼[註 2] 是叫做好命

---

【析與後話】

這首詩，寫佇看了《悲情城市》kah《無言的山丘》兩齣電影以後。這兩齣攏是台語電影的經典作品,透過語言的使用、角色生命的刻畫，來顯現著台灣被壓迫的殖民歷史，族群之間複雜的支配/倚賴關係。毋過除了族群關係，筆者上注意的閣有其中的性別、階級敘事。深入來看，會發見著壓迫是一層一層的，日本人/外省人/福佬人/客家人；好額人/散赤人、掌權者/無力者；查埔人/查某人、好查某/歹查某/趁食查某......親像後殖民女性主義所講，身份定定是雙重、多重而且流動的，凡勢一個族群有伊的性格利毋過因為個體經驗、生命處境必然的無相仝，又閣 kā 共同體愈分愈幼，到最後敢真正有共同體的存在?筆者猶無答案。

佇這首詩內面，筆者將這個「查某人」當作一個盧卡奇講的「典型人物」[註 3]，伊同時象徵著族群、性別、階級關係中的受壓迫者、無力者，欠缺話語權，所有伊會當控制的，干焦是伊家己面對世界 kah 命運的方式爾爾。第一段是佇講面對戰爭、鬥爭、欺騙、剝削，伊的能動性全部限制佇內在精神世界，唯一革命的可能，是 kah 世界畫清界線，若欲活落來，情緒就愛留佇家己身軀頂，佇有可能的空間用身體經驗創造屬於家己的故事。

第二段 kah 第四段咧表達，有權者的告白 kah 苦勸，攏是僥蟶[註 4]的話術，因為「想欲拗你的跤」，所以用好聽話騙你認命，予你相信講𪜶予你的小寡好空攏是恩賜，soah 感恩敬佩、歡喜受人剝削。查某人看破的是恩客的手腳，嘛是歷史中所有壓迫者的歹心行[註 5]。

第三段中，「cha̍k 出來 ê 鮮血攏點作胭脂」想欲表達的是，台灣人、台灣查某、台灣的底層百姓,受著苦毒凌遲，毋過這寡苦難嘛予𪜶成作迷人的存在。因為苦難，𪜶的生活方式、性命的型態，soah 如此不可取代,如此美麗莊嚴、引人入勝。「淚若無媠攏是討債」，嘛是和頂一句做對話、質疑，質疑受害者敢一定愛可憐清白、符合想像？譬如講白色恐怖時代的紅色政治犯，敢就是有罪、有錯，毋值得平反?歷史內面，有太濟造神而且扁平化的描說，只為著將受害者刻劃作予人同情、敬佩的故事主角，有閣較濟無符合期待、欠缺戲劇性的人，淹死佇歷史的大河中，無人知影。

---

註 1:「拗跤」,做愛的一種說法。

註 2:「眾人吃,眾人騎,沒人疼」,出自侯孝賢《悲情城市》台詞。

註 3:「典型人物」在盧卡奇的概念中,是文學中既特殊又普遍的極端存在,透過他的

行動,能有效反映出社會關係,成為某種縮影。

註 4:「僥蟶」,善變。

註 5:「歹心行」,劣根性、居心不良。