【開講讀者投稿】：少年KＥ〈我是台灣ê陣頭囡仔〉（全羅版）

Góa sī tīn-thâu gín-á,góa tùi ka-kī ê sin-hūn kám-kak kiau-ngō͘.

Tâi-oân ê sìn-gióng bûn-hòa sī chin phó͘-phià, kui-nî-thàng-thiⁿ sì-kè lóng ū biō-hōe thang khòaⁿ. Tī biō-hōe lāi-té, tīn-thâu sī siōng kài tiōng-iàu ê kak-sek. Sui-liân i ê tiōng-iàu-sèng chin koân, m̄-ko siā-hōe tùi-gún tīn-thâu-lâng ê ìn-siōng iû-oân lóng-sī ｢Tīn-thâu gín-á tiō sī pháiⁿ-gín-á｣ ê chit-chióng khòaⁿ-hoat. Tī Tâi-oân khak-si̍t ū chin-chē ê kiong-biō kap tīn-thâu sī iû ū o͘-tō pòe-kéng ê lâng lâi koán-sū, m̄-ko che pèng-bô tāi-piáu lāng tīn-thâu--ê lóng sī pháiⁿ-gín-á. Chim-chiok lâi khì se̍k-sāi lán chit-má tng sî-kiâⁿ ê tīn-thâu bûn-hòa ē-tàng hoat-kak-tò tòe khah-chá í-keng lóng bô-siòng-kâng. Tâi-oân ê tīn-thâu khoaⁿ-khoaⁿ-á piàn-chó sī Tâi-oân jîn-bîn bûn-hòa ê siōng-teng chi-it, má-sī siōng-ê-tàng tāi-piáu Tâi-oân chiⁿ-sîn ê bûn-hòa-chu-sán.

Góa làng-tīn-thâu sui-liân chiah cha̍p-gōa-nî, m̄-ko tīn-thâu gín-á ê chit-ê miâ chá-tiō i-kēng sī góa tùi jîn-seng ê kái-sòe, má-sī góa siōng-tōa-ê kiau-ngō. Chū gín-á-sî, ta̍k-lé-pài siōng-kî-thāi ê tiō-sī ē-sái lâi-khì tong-tong-chhai sūn-sòa thàn chi̍t-kóa só͘-hùi. Kng-khí ang-á,phah-tio̍h lô-kó͘, iōng-chīn só͘-ū khùi-la̍t khì piáu-ián, m̄-nā-sī ūi-tio̍h ho̍k-bū sîn-bêng,koh-khah iàu-kín ê sī ài chng-hó ka-kī ê kak-sek. Sûi-tio̍h nî-hòe ta̍uh-ta̍uh-á chēng-ka,hit-kóa ang-á chá-tiō í-keng chhēn-bē-lo̍k. Sui-liân bô-hoat-tō͘ koh kè-sio̍k lāng ang-á, m̄-ko tīn-thâu ê chióng-lūi ū pah-pah-khoán, góa thê-seng ka-kī ê lêng-le̍k, piàn-chó sī kng-tio̍k kiō-tan tá-tio̍k kha-pō͘ thè sîn-bêng chò kha-la̍t ê kiō-hu. In-ūi kng-kiō ê koan-hē, gún ê keng-kah-thâu tiāⁿ-tiāⁿ lóng-sī chéng-oaiⁿ-oaiⁿ bé-su ke-kui-á kâng-khoán, m̄-ko tùi gún tīn-thâu-lâng lâi-kóng,che-sī siōng hēng-hok ê tāi-chì, má-sī chú-kong hō͘ gún siōng tiⁿ-bit ê hū-tam, kèng-ka-sī lán tīn-thâu-lâng siōng-tin-kùi ê khăng-páng.

Lāng-tīn-thâu sī góa siōng-ài chò ê tāi-chì, má-sī góa chit-sì-lâng bô-khó-lêng pàng- sak ê hèng-chhù. Tīn-thâu,biō-hōe tiō chhin-chhiūⁿ sī góa sìⁿ-miā ê chi̍t-pō͘ -hūn, in- ūi tī lāi-té cháu-thiàu, góa-ê siⁿ-oa̍h ū chiâⁿ-chē kap pat-lâng bô-sio-kâng ê thé-giām, sīm-chì góa ē-hiáu-kóng Tâi-gí, ē-hiáu án-chóaⁿ khì hâm pa̍t-lâng pôaⁿ-nóa iā-sī tiàm chit-ê khoân-kéng-tiong o̍h--tio̍h--ê. Jīn-chin lâi kóng,góa ē soán-te̍k lâi-kàu Tâi-bûn-hē ū chin-tōa-pō͘-hūn ê goân-in sī in-ūi biō-hōe tùi góa ê éng-hióng. Biō-hōe, tīn-thâu pôe-phōaⁿ tio̍h góa chiong-kūn beh jī-cha̍p-tang, i kà góa tiō-ài jīn-bat-tio̍h lán Tâi-oân-lâng ka-kī ê Tâi-oân-bûn-hòa iā kó͘-lē góa ài kè-sio̍k tī biō-hōe-kài lāi-tóe phah-piàⁿ, sīm-chì sī hō͘ góa ū chi̍t-ê ē-sái oân-choân pàng-khin-sang bián-khì hoan-ló seng-oa̍h ap-le̍k ê só͘-chai.

Tīn-thâu tī Tâi-oân í-keng ū chiūⁿ-pah-nî ê le̍k-sú, i ê chûn-chāi ē-tàng kóng-sī Tâi-oân-lâng tùi ka-ki-ê seng-oa̍h, chong-kàu-sìn-gióng ê piáu-hiān kap khiân-sêng. Tīn-thâu ê sán-sêng kap jîn-bîn ê seng-oa̍h ū chiok bi̍t-chhiat ê koan-hē. Iōng Tâi-oân sióng thoân-thóng ê ｢Tak-gû-tîn｣chò-lē,chioh-tio̍h nn̄g-chiah gû kap lông-bîn chi-kan ê sio-tak, piáu-ta̍t chhut kòe-khì lông-bîn pàng-gû chia̍h-chháu hō͘-siong sio-cheⁿ tè-pôaⁿ ê chōng-hóng. In chin-si̍t-chāi leh ián-chhut chit-chióng kó͘-chá lông-chhoan ê bô͘-iūⁿ, hō͘ āu-tāi ê Tâi-oân-lâng ē-sái khòaⁿ-tio̍h Tâi-oân lông-gia̍p-sî-tāi ê seng-oa̍h. Tīn-thâu tiō chhin-chhiūⁿ-sī chi̍t-pún ū-sìⁿ-miā ê le̍k-sú pho̍k-á kâng-khoán, i kì-lo̍k-tio̍h Tâi-oân tī bô-kâng sî-kî ê jîn-bîn, in-ê seng-oa̍h-chêng-hêng í-kip in tùi sìn-gióng ê khiân-sêng. Chi̍t-tiûⁿ biō-hōe ná-sī ài nāu-jia̍t, tīn-thâu sī choa̍t-tùi bōe-sái làu-kau khì. I m̄-nā tāi-piáu tio̍h hit-keng kiong-biō ê lêng-le̍k, kèng-ka sī hoán-èng chhut lán Tâi-oân tīn-thâu-bûn-hòa ê tē-ūi.

｢Iōng tîn-thâu khì khòaⁿ Tâi-oân｣sī góa it-ti̍t í-lâi khòaⁿ-thāi lán Tâi-oân ê hong-sek, iā-sī góa siūⁿ-beh thui-sak hō͘ koh-khah-chē lâng chai-iáⁿ ê koan-liām. Tiàm lán Tâi-oân sióng-kài hēng-hok ê tiō-sī tīn-thâu ê chûn-chāi, biō-hōe ê kí-hêng lóng-sī chin bîn-chú chū-iû. Seng-oa̍h tī Tâi-oân chi̍t-phiàn thó͘-tē, ū chiâⁿ-chē bô-kâng ê kak-tō͘ ē-sái khì se̍k -sāi lán Tâi-oân. Tn̂g-kî í-lâi,tīn-thâu biō-hōe bûn-hòa tī ta̍k-ke ê sim-ba̍k-tiong kan-na bô-hoat-tō͘ tòng-chò sī tāi-piáu lán Tâi-oân ê bûn-hòa chi-it. M̄-ko chim-chiok khì-khòaⁿ, tī biō-hōe tong-tiong tāi-pō͘-hūn sú-iōng ê gí-giân lóng-sī lán ê bó-gí：Tâi-gí, jî-chhiáⁿ chiâⁿ-chē-ê tīn-thâu piáu-ián lóng-sī sióng-ē-tàng tài-piáu-tio̍h lán Tâi-oân só͘-pah-nî í-lâi ê siā-hōe-seng-oa̍h.

Tâi-oân ê tek-sek sǹg-bōe-chheng, tān-sī sin-ûi chiàⁿ-káng-ê tīn-thâu-gín-á, góa chin hi-bāng ta̍k-ke ē-sái chiong tīn-thâu biō-hōe bûn-hòa tòng-chò sī lán Tâi-oân ê chi̍t-hūn-chú. Tâi-oân ê tīn-thâu-bûn-hòa sī to̍k-it-bû-jī ê, i só͘ tián-hiān chhut-lâi ê m̄-nā-sī Tâi-oân-lâng tùi seng-oa̍h ê kái-soeh, kèng-ka sī piáu-hiān chhut Tâi-oân-lâng siōng te̍k-pia̍t ê só͘-chāi.

Góa sī seng-oa̍h tī Tâi-oân ê tīn-thâu gín-á.

【寫流成河】為刊登讀者投稿的專門欄位。作為本期《開講Khai-káng》的壓軸系列，為的就是鼓勵台文系學生嘗試寫作——我們認為，持續書寫不僅能夠精鍊筆鋒，更是梳理思維與觀點的必要途徑。 《開講 Khai-káng》期許你我在這條思想與對話的長河中，能透過文字留下清晰可見的刻痕，讓河的路徑不只是靜靜流過，而有粼粼波光。

【寫流成河】是專門刊登讀者投稿ê欄位。這个專區成做每期《開講 Khai-káng》ê煞尾，是為著鼓勵台文系ê學生來寫作——阮認為，不斷ê書寫m̄-nā會當磨練文筆，koh是整理思維kah觀點ê必要途徑。 《開講 Khai-káng》期待大家tī這條思考kah對話ê溪流內底，會當用文字刻下一痕koh一痕ê記錄，予溪水毋若是恬恬leh流落去，koh閃爍著淡薄波光。