【語論紛紛】使用復活卡！當代語言復振小故事（台文版）
2021/10/17閱讀時間約 11 分鐘
主要作者：王浚耀
本篇使用白話字以及教育部推薦用字書寫。
本篇使用白話字以及教育部推薦用字書寫。
為語言獻上活力——本篇簡介
你可能bat聽過倚險ê動植物會使復育，毋koh你敢知beh消失去ê語言mā會當復活？咱chit-má所講ê語言，有當時背後koh有真濟變遷故事。無論是語言演變 [1]，抑是語言轉移 [2]，攏佇這个世界ê各種所在bat發生過。以咱台灣做例，就是日語kah華語ê先後影響所致ê本土語言式微；佇外國，嘛有像希伯來語、Basque語、Māori語這類ê例。目前世界上平均每兩个禮拜就有一門語言死去 [3]，對咱ê文化多樣性造成bē少衝擊。敢講面對語言ê死亡，kan-na會當目睭金金看著伊斷氣？猶太人、Basque人kah Māori人用實際行動做hō͘你看——只要有心、團結，就有機會kā狀況反輾轉。
按神聖而罕得行向日常而廣泛：希伯來語復振
猶太人佇過去ê兩千年當中，四散tòa佇世界各地，mā因為按呢，in主要佇猶太社群內底講猶太人ê鄉土語（例如Yiddish語）和使用當地語言kah外界來往。欠缺共通語言能力ê情形，致使無kâng地區ê猶太人無法度互相溝通。想像一下，假使有兩个分別佇日本kah美國大漢ê台灣人，in攏無學過台灣本土語言抑是華語，致使溝通無蓋順利，相信你mā會感覺是真礙虐ê代誌。
嚴格來講，希伯來語無算完全死去，是佇日常生活內底消失，因為猶太男性有保留學習、使用希伯來書面語ê傳統，類似歐洲人閱讀拉丁文kah華人閱讀文言文。毋koh猶太人彼陣差不多無kā希伯來語用作日常溝通語言，主要用佇宗教場合，是神聖ê語言，亦因此較欠完整ê希伯來語言能力。
張學謙ê研究指出了希伯來語對長睏 [4] 當中起身ê因素：共通語需求ê產生，加上彼當時歐洲民族主義ê影響，主張「一个國家，一个語言」，hō͘猶太人開始佇Yiddish語kah希伯來語兩个之間選擇，beh揀出一个未來共用ê語言。為著獨立建國ê理想，有一寡猶太人kā希伯來語看做in意識歸屬、愛國ê象徵——按連結過去光榮ê歷史、連結民族ê「靈魂」kah強化社會文化以及政治獨立性這三點來看，希伯來語實現chia--ê功能會較贏Yiddish語。猶太建國主義者kā Yiddish語定義做過去ê象徵，若hō͘人想起來，就會想著以早被迫流落各地、受著迫害kah苦難ê心酸，是粗魯ê語言，bē使用佇科學kah教育；顛倒，希伯來語就hŏng看做猶太人ê文學kah民族語言，會使hō͘人淡化恥辱ê過往。
猶太建國主義者後來koh進一步喝出一个口號：
「新ê猶太人等於講希伯來語ê人。」
這款kā語言kah認同縛做伙ê口號，落尾形成強大ê號召力，hō͘希伯來語成做民族統一、政治動員ê標記，一步一步行向日常化、普遍化ê穩當路途。
講著希伯來語復振ê故事，定定會提著一位代表人物——Eliezer Ben-Yehuda。伊按家己厝內開始執行希伯來語復興，有真濟驚人做法。例如，伊為著hō͘囡仔一个完全希伯來語ê環境，無允准囡仔kah別个囡仔sńg；連厝內貓、狗mā分別飼一公一母，就是為了hō͘囡仔掌握希伯來文ê性別概念。甚至聽講佇囡仔佇beh出世進前，koh堅持愛kā產婆上希伯來語課才會使接生。這種做法看起來有一寡極端兼譀古，毋過伊的確是近代第一个kan-na用希伯來語飼囝ê人，佇歷史上留落一个深刻ê記號。
但是，咱mā愛了解，個人英雄主義並無法度完成語言復振工作，伊背後koh是有足濟人合力推sak，kā這款大工程做hō͘了。除了Ben-Yehuda，koh較濟為著希伯來語恬恬phah拚ê，是學校教師這个群體。規條復興ê路是慢慢仔leh進行，先對學校教育起頭，後來漸漸行出校園，最後湠 [5] 到整個猶太人社區。第一批接收著希伯來語教育ê囡仔隨著不斷學習、大漢，hō͘希伯來語成做第二語言，了後佇全希伯來語ê環境之下培養後一代，達成了產生「以希伯來語作第一語言ê囡仔」這个目標。
教育之力：Basque語復振
佇西班牙kah法國交界ê所在，有一个迒 [6] 過兩國，號做 ”Basque” ê地區。Basque語是一个孤立語言，也就是講，伊kah目前其他已經分類了ê語言攏毋是親情（若講有親屬關係ê例，其中之一是英語kah德語，攏屬於German語族）。歐洲大多數語言屬印歐語系，Basque語ê存在顯得非常特別。毋過，其實Basque語佇Franco獨裁統治時期被禁止佇公共場合使用，一直到1970年代尾才解除，chit-má kah西班牙語kâng款是西班牙Basque自治區（Basque Autonomous Community，簡稱BAC）ê官方語言（法國彼pêng對Basque較無leh重視）。
較特別ê是，雙語教育佇Basque地區並毋是新現象——19世紀尾ê時，一寡學校已經有雙語甚至三語教育模式，到後來才hō͘ Franco政權禁止。1960年代，一寡家長kah教師成功爭取重開用Basque語教冊ê私立學校，一開始官方猶毋承認，但是後來遐ê學生濟kah無法度忽視，致使政府落尾愛接受。1982年，Basque得著官方語言地位了後，對應ê三種語言教學模式mā產生ah，分別號做A、B kah D模式 [7]：
A模式：全西班牙語教學，Basque語是必修第二語言，一禮拜上四到五點鐘。
B模式：Basque語kah西班牙語透濫做教學語言，各佔大約一半。
D模式：全Basque語教學，西班牙語是必修第二語言，一禮拜上四到五點鐘。
家長會使為囡仔揀beh去tó一个模式ê學校，每一種模式佇公立kah私立學校攏有提供，但是會因為某一个所在ê學生對某種模式較無興趣，致使部份地區選擇較有限。根據統計數據，BAC中小學攏是用D模式上濟，A模式上少，顯示Basque語教學上蓋吸引學生，就算部份學生是以西班牙語做母語，mā會揀D模式學校。是按怎D模式hiah-nī有吸引力neh？Che背後其實有bē少原因。有一寡家長是因為家庭內底出現Basque語流失，想beh kā Basque語環境恢復；有一寡家長是認為既然佇Basque生活，入鄉隨俗，應該愛hō͘囡仔學Basque語ê機會；koh有人是因為頭路有相關要求這種較現實ê因素，所以選擇Basque語為主ê學校。
隨著英語這款國際語言ê影響力持續增加，BAC ê本土語言發展mā開始tú著全球化、多語化、移民所紮來ê挑戰。2012年ê研究指出，BAC ê大學開始增加以英語授課ê課程，有可能成做Basque語發展過程ê新挑戰。至於後來敢有對現有語言造成啥物款ê具體影響，咱就等待進一步研究，chhōa逐家繼續探索。
現在進行式：台灣本土語言佇教育上ê復振
Kā目光斡 [8] 轉來咱這pêng。解嚴到今三十四年，咱ê本土語言教育按頂年代國小鄉土母語課程起頭，總算teh-beh佇明年hō͘本土語文正式行入中等教育階段。目前版本ê本土語言課綱總綱規定，本土語言/台灣手語佇國中一、二年是逐禮拜一節ê必修課程，三年改做選修；高中階段是列做部定2學分課程，學校會使另外依照學生需求，規劃4學分選修。
因應beh開始上路ê中學本土語文課程，chit-má各大學佇leh培育相關教育師資，以及hō͘現有支援教師補上學分班，補充教育專業智識，佇未來成做正式ê本土語言老師。教材ê部份，目前猶原較欠缺，需要各方盡緊編寫出版，完成上尾一哩 (mai) 工程。
做伙行落去——goán ê觀點
各種自然語言，在來無所謂原罪，但是因為文化變遷、族群衝突、政治打壓等因素，造成了今日語言發展失平棒ê狀況。其他國家ê經驗當然是非常寶貴，毋koh逐國攏有無仝款ê歷史脈絡，翻頭來看咱台灣ê時需要較想hō͘清楚。
希伯來語是上蓋成功ê復振案例之一，但是當時ê背景是孤一个民族ê團結所引chhōa ê語言連結，kah台灣幾个族群做伙生活佇kâng一國內ê狀況有差別。所以咱beh號召語言運動ê時需要koh較斟酌，聯合各族群ê力量做伙phah拚，鬥陣復原健康ê語言生態。
BAC教育體制mā是真值得咱參考ê對象，毋koh實際執行當中猶原愛考慮師資、教材等等教育資源ê分配敢有公平。毋但按呢，重新hō͘本土語言得著公共性、專業性mā是一項挑戰——BAC ê B模式學校一般是佇數學kah讀寫chia--ê科目揀用西班牙語，顯示佇特定科目內底，主流語言koh是佔較優勢ê位置（可能是資料量等因素造成）。照目前ê總綱來看，本土語文無論佇教學時數抑是必修安排方面，攏和華語文、英語文有明顯差距，需要koh kā改進。以台灣現狀來講，chit-má所達成ê，kan-na有接近BAC ê A模式這款政策。咱向望本土語文會使佇各種領域繼續發揚，未來行向雙語/多語混合以及浸水式教學ê理想環境。
過去幾十年甚至幾百年ê錯誤、失誤，來到現代得著修正，是難能可貴ê代誌。希望日後佇學生、教師、家長、各界專業人士等等ê骨力推廣之下，咱ê本土語言會當徛踮kâng一片土地頂懸ê舞台，漸入佳境。
註解
[1] 語言演變 (Language change)：一門語言內底所產生ê語言上ê轉變，例如語序、發音等。
[2] 語言轉移 (Language shift)：一門語言佇非語言層面上ê轉變，通常是指hō͘另外一門語言取代，成做某一个族群ê常用語言。
[3] Rymer, R. (2021, May 3). Vanishing voices. Magazine. Retrieved September 26, 2021, from https://www.nationalgeographic.com/magazine/article/vanishing-languages.
[4] 長睏，讀作tn̂g-khùn。中文意思：沉睡。
[5] 湠，讀作thòaⁿ (thuànn)。中文意思：擴散。
[6] 迒，讀作hāⁿ (hānn)。中文意思：跨越。
[7] Mài kā我問是按怎B後壁接D，我mā毋知。¯\_(ツ)_/¯
[8] 斡，讀作oat (uat)。中文意思：轉彎。
[2] 語言轉移 (Language shift)：一門語言佇非語言層面上ê轉變，通常是指hō͘另外一門語言取代，成做某一个族群ê常用語言。
[3] Rymer, R. (2021, May 3). Vanishing voices. Magazine. Retrieved September 26, 2021, from https://www.nationalgeographic.com/magazine/article/vanishing-languages.
[4] 長睏，讀作tn̂g-khùn。中文意思：沉睡。
[5] 湠，讀作thòaⁿ (thuànn)。中文意思：擴散。
[6] 迒，讀作hāⁿ (hānn)。中文意思：跨越。
[7] Mài kā我問是按怎B後壁接D，我mā毋知。¯\_(ツ)_/¯
[8] 斡，讀作oat (uat)。中文意思：轉彎。
參考資料
- 張學謙（2011）。〈如何喚醒沉睡中的語言？希伯來語復振的經驗〉。《台灣國際研究季刊》，7 (4)，127-153。
- Cenoz, J. (2008). Achievements and challenges in bilingual and multilingual education in the Basque Country. AILA Review, 21, 13–30. https://doi.org/10.1075/aila.21.03cen
- Cenoz, J. (2012). Bilingual educational policy in higher education in the Basque Country. Language, Culture and Curriculum, 25(1), 41–55. https://doi.org/10.1080/07908318.2011.653057
留言0
查看全部