作者：王俞雯
文字編輯：林紀甄、林佳瑩
翻譯者：林紀甄、林佳瑩（本篇以台語白話字書寫）
科技因為時代ê演進愈來愈發達，國家和國家之間ê聯絡變kah真方便，予台灣成做一个融合多元民族ê社會。最近這幾冬，台灣社會kah經濟穩定，koh有包容多元民族ê風氣，予真濟外籍人士選擇來台灣揣頭路，抑是透過婚姻ê方式來台灣發展，變做這塊土地上懸ê新住民。根據移民署ê統計[1]，新住民到今已經佔台灣總人數ê 2.4%。另外，對內政部ê資料[2]內底會當估算，新住民二代人數有40外萬，in已經是台灣民族當中真重要ê一部份。這寡人對家己ê身分有啥物款ê看法和體會leh？本期「走揣」總共訪問五位新住民二代，其中四位ê母親是越南籍，一位是中國籍。阮會透過受訪者分享ê故事，chhōa逐家熟識你毋知影ê新二代。
和伊ê親密接觸
應該ài按怎說明一个新二代成長ê過程？ 兩个無仝國家ê交織(kau-chit)kah接觸會產生啥物款ê經歷？可能是奇幻，可能親像戲劇，mā有可能真平凡，紲--落來予阮來看新二代ê生活到底是啥款……。
新二代ê母親離鄉背井來到台灣，in欲融入台灣社會ê第一个問題tio̍h是語言。不管是想欲kah別人接觸、擴展家己ê交友圈，抑是行入家庭，kap配偶(phòe-ngó͘ ) ê家庭建立密實(ba̍t-cha̍t) ê連結，語言一定是in頭一个必須ài拍破ê壁。這寡新住民tú到台灣ê時所面對到ê語言困境，對囡仔ê角度來看會是啥款leh？
「從小，媽媽就跟著我們上輔導班。」真濟新二代lóng有仝款ê經驗。母親就像紅嬰仔，tī啥物都毋知ê時陣去體會另一塊土地ê一切。這幾冬，雖然有真濟地方政府為tio̍h予新住民khah緊融入台灣社會，設立專門ê語言課程。毋過，根據筆者bat接觸過ê新住民來kóng，真少有人去參加這種課程，五位受訪者ê母親內底，mā干焦有一位上過。為啥物明明有學語言ê資源，soah無法度推廣出去leh？in tī學語言ê時koh有拄著啥物困難？其中一部分ê原因阮會tī後壁討論。
因為無參加課程，有一寡新住民tio̍h用非常「台灣味」ê方式來學語言。小文ê母親是對中國來--ê，小文kā阮講，雖然母親會曉講華語，毋過父親ê家庭tī台灣khah庄腳ê所在生活，厝裡koh是leh做買賣生意，平常時溝通kah應對人客lóng是以台語為主，母親一開始感覺這是真大ê挑戰。後來，母親聽姊妹ê建議，透過「八點檔」來學台語。所以tī小文細漢ê時陣，《愛》、《娘家》、《夜市人生》這寡電視劇就親像眠床邊ê故事，母親看一擺tio̍h對伊講一擺，伊tio̍h ná聽母親無啥輾轉ê台語，ná進入夢鄉。
雖然講台灣ê語言無啥物困難，毋過對其他對越南來ê母親來講，文字絕對是比對話koh khah麻煩ê問題。阿華kah阿賢tio̍h有相像ê困擾，in leh用通訊軟體kah母親聯絡ê時，因為母親看無漢字，所以干焦會當用通電話ê方式，毋過總是有無法度講電話ê狀況，這个時陣tio̍h只會當盡量發揮「sticker」ê功能。其實除了語言以外，新二代tī母親身上mā看到kah台灣無仝ê文化。
新二代自細漢接收兩个無仝國家ê文化，會當直接感受到兩爿ê差異(chha-ī)。舉家庭結構做例，傳統越南家庭是查某人來hōaⁿ家，台灣傳統是查埔人來做一家之主。Tī訪談當中，筆者mā發現越南kap台灣ê價值觀有一寡出入。阿豪認為台灣人往往「延遲享受」，習慣艱苦頭，快活尾；越南人ê觀念是隨時把握機會，享受chit-má有ê幸福，阿豪ê阿嬤認為食穿無欠tio̍h是in希望ê生活，無親像台灣大部分家長要求囡仔ài一直追求koh khah懸ê成就，越南阿嬤ê想法是「有夠」tio̍h好。這兩種價值觀源自各國家特殊ê文化歷史脈絡，雖然有真大的差異，毋過並無好䆀。
母親適應台灣社會kah學習ê過程，是新二代成長經驗內底真特別ê景象。新二代開始進一步去了解母親原生國家文化ê時，兩種無仝文化ê衝擊和融合，予in ê心和母親倚作伙。這是兩个文化ê對話，mā是in和母親ê親密接觸。
彼寡刻薄ê閒話
一直有leh關注新住民議題ê學者夏曉鵑，tī〈從「外籍新娘」到「新住民」走了多久？〉[3]內底寫tio̍h，新住民往過lóng予人看做是「低劣他者」，而且「外籍新娘」這个稱呼背後其實是隱含歧視。為tio̍h改善這个問題，夏曉鵑tī機緣之下，推sak婦女新知基金會主辦「『請教我﹍』讓新移民女性說自己徵文活動」。後來沓沓仔有新住民協會真拍拚leh推動正名運動，一直到2012年，移民署署長tī新住民座談會表示，了後會將外籍配偶稱呼做「新住民」。
過去，新住民定定會受著各種眼光，台灣人對新住民ê存在koh tiâu tī負面ê刻板印象和不實ê指控內底。阿豪對這件代誌有真深ê體會，伊kā阮分享，台灣ê親人無希望母親學台灣語言，因為過去台灣媒體ê報導kah厝邊隔壁ê想法，lóng對新住民學語言有khah䆀ê印象，阿豪ê親人tio̍h認為，若是母親學華語tio̍h會學䆀--khì，甚至會綴(tòe)人走。阿豪ê母親tī無形中，予這款印象來束縛，變做這个家庭ê附屬品，連阿豪表示想欲學母親原生國家語言ê時，厝裡人雖然無反對，soah表現出毋免學退步國家語言ê態度。
不會有人願意看自己的母親被人輕視，但是輕視她的人卻又是我的親人，這種矛盾的心理，在心中也成了一個疙瘩。
「買來--ê」、「會綴人走」甚至是「退步國家」，這寡長期貼tī新住民身上ê負面印象，mā tī新二代大漢ê過程中造成影響。小文除了自細漢聽家己ê母親hŏng叫「大陸妹」，koh因為父母年歲差真濟，tio̍h有阿叔阿伯講父親是leh「飼兩个查某囝」，這種話tī阿文ê心內產生真大ê排斥(pâi-thek)伊soah無能為力。
除了台灣社會對新住民ê負面印象，這款歧視往往會延續到新二代身上。阿豪tio̍h ba̍t 予學校老師嫌講「發展遲緩」；穿越南傳統服裝去學校，老師soah恥笑「像狗戴ê帽仔」。阿賢自細漢mā hŏng認為新二代khah戇，無法度綴tio̍h其他同學ê程度。李美賢、闕河嘉ê研究指出，tī 2005到2007這个期間，媒體對新二代使用ê「顯著詞彙」大部分是kah「問題」、「輔導」相關，tī這個時期新二代定定予人連結遲緩兒議題，社會kā in建構做特別需要協助輔導ê對象[4]。
看見東南亞ê時刻
近年來，隨著台灣政府推sak新南向政策，開始相連紲推行以新住民為對象ê計畫，人才ê交流是這个計畫ê重心之一，主要以培養新住民ê囝兒做主要方向，予社會漸漸看tio̍h新住民二代ê優勢，in mā成做新南向政策內底主力ê人才。
四位母親是越南籍ê受訪者lóng對這个機會有真明顯ê感受。阿豪就有參加移民署主辦ê「新住民海外培力計畫」ê經驗，透過這个計畫，他轉去到母親ê故鄉開始研究越南文化，發現越南tī殖民脈絡內底和咖啡產業ê連結，使越南人ê生活中有真深ê咖啡文化，差不多逐頓lóng會啉tio̍h咖啡。政府推動新住民計畫毋但培養南向ê人才，mā予新二代重新認捌tio̍h母親ê原生國家，有得tio̍h正面ê效果。
受訪者mā有講tio̍h東南亞國家近幾冬真快速ê成長和改變。阿豪表示，參加海外培力計畫ê時，發現越南已經kah家己以前看tio̍h ê無仝--ah，有ê城市愈來愈發展；阿華mā講， 甚至伊感覺越南tī一寡方面比台灣進步真濟，會使看tio̍h東南亞國家沓沓仔lóng leh 起行；另外一位受訪者阿嘉講，厝裡人mā因為感受tio̍h新南向政策ê商機，非常贊成阿嘉學越南語。
雖然台灣chit-má真看重新住民二代人才ê培養，以前予人看做真退步ê國家mā受tio̍h重視,但是阿豪講tio̍h，台灣應該開始對新住民做「轉型正義」。夏曉鵑mā tī《新二代留聲機》專欄講tio̍h：「2002年被教育部擔憂『人口素質』的國小入學生，2016年當他們20歲成年時，卻突然被視為人才、『新南向種子』。」[5]這予伊感覺真莫名其妙。新住民和新二代所受著ê輕視和偏見袂使tio̍h按呢hŏng掩khàm，過去貼tī in身軀頂ê歹印象，mā應該受著正義ê彌補，無論是新住民友善機制抑是新南向政策，lóng應該更加尊重新住民和新二代ê主體性。
走揣認同和歸屬
新二代tī現今社會中定定是隱形(ún-hêng)ê存在，咱身軀邊可能lóng會有一兩个新二代ê朋友，毋過定定是tī開講ê時才發現原來伊是新二代，in可能完全無機會接觸tio̍h母親原生國家ê文化，也袂主動提起家己是新住民囝兒ê這个身份，對家己母親ê原生國家不管是生理抑是心理上ê距離lóng是遙遠--ê，對in來講彼是一个生份ê國家，致使in對新二代這个身分無啥物感覺。阿華就有講著，干焦tī國小老師欲登記母親國籍ê時，才感受tio̍h家己ê特殊身份，一直到大漢了後，政府舉辦真濟有關新二代ê推廣活動，予伊有khah濟接觸母親原生國家ê機會，才對這个身份產生新ê體會。
其中，小文ê經歷真特別，tī伊成長ê過程中，bat有一段時間tòa tī母親ê原生國家。後來，伊慢慢發現兩地文化無仝ê所在，生活習慣mā無相仝。Tī中國ê時，伊感覺台灣更加予伊有歸屬感，這時ê小文對母親ê國家是非常排斥--ê，感覺家己無法度變做遐ê一份子。毋過，轉來台灣了後，koh不時懷念過去tī中國ê點點滴滴，才知影家己對彼个所在毋是完全無認同感。小文表示，伊bat感覺真迷惘，思考家己到底屬於佗位？
一直到有一工，伊看tio̍h一句話——「有幸福的地方就是家鄉」。雄雄kā伊點醒，啥人講家鄉干焦會使有一个leh？只要會使感受著溫暖、歸屬感ê所在就會使成做家鄉。
阿豪mā tī訪談中分享一个有關越南家人ê故事。伊ê外媽tī伊準備欲離開越南ê時kā伊叫--ê，牽起伊ê手，kā家己指頭仔頂ê手指pak落來，掛tī伊ê指頭仔頂，提醒阿豪以後一定ài koh轉來，伊相信這kha手指會kā伊chhōa轉來越南，予伊會記得tī越南，伊猶閣有一个厝。
新二代這个身份tī無仝人ê身軀頂會有無仝ê解說。對毋bat去過母親原生國家ê新二代來講，in tī台灣出世、tī台灣大漢，「新二代」只是一个a-í-nó͘-khò͘[6] ê身份。毋過mā有人像小文仝款，bat對家己ê身份迷惘，tī兩个家鄉ê歸屬感中搝拆[7]。猶koh有真濟新二代只是猶無機會去了解另外一个家鄉，去感受另外彼頭ê溫暖。
新二代 ê Ｎ種模樣
透過新二代ê目睭，阮看tio̍h身為新住民ê母親tī社會頂ê搝拆和困境，不管是語言抑是文化，lóng是需要克服ê挑戰；阮看tio̍h社會對新住民和新二代觀感ê轉變，對負面印象到新南向政策ê人才培養，其中ê落差真明顯；阮mā看tio̍h新二代對家己身分ê驚惶和接受。
Tī網路頂有真濟有關新二代ê文章，定定講著新二代有悲慘ê經歷，抑是咱tī無了解新二代ê時陣去看著遮ê文章，可能會認為新二代lóng bat受著社會ê凌勒(lêng-le̍k)和壓迫，但是tī訪談中阮發現，其實每一位新二代lóng有無仝款ê成長經歷，毋是逐个人lóng有因為新二代ê身份受著傷害。受訪者lóng有講著，tī生活中除了幾个長輩以外，同學、朋友之間leh鬥陣其實lóng無特別予家己感受tio̍h新二代這个身份，逐家mā袂因為新二代這个身份對家己有無仝ê看法抑是對待。
新二代ê模樣無應該予任何一篇採訪抑是報導所定義，咱所採訪ê五位新二代就展現出完全無仝款ê生活經驗，有--ê看著台灣家庭和新二代母親之間ê衝突和妥協；有--ê感受著做一个新二代ê優勢，對家己ê特別感覺驕傲；有--ê tī台灣和母親ê原生國家之間游疑不定，最後揣tio̍h屬於家己對身份ê解說……。
雖然有仝款ê身份，毋過每一位新二代lóng是無仝ê個體，in ê故事等待in家己去書寫。
[1]中華民國內政部移民署全球資訊網，110年8月外籍配偶人數與大陸-含港澳-配偶人數按證件分。
[2]中華民國內政部戶政司全球資訊網，110年8月縣市出生按身分及生母生父原屬國籍(按登記)(9701) 。
[3]夏曉鵑，〈從「外籍新娘」到「新住民」走了多久？〉，獨立評論＠天下，2018.01.31，取自 https://opinion.cw.com.tw/blog/profile/65/article/6576。
[4]李美賢、闕河嘉，〈台灣「東南亞新二代」的形象建構〉，《傳播、文化與政治》，第七期，2018.6，頁153-159。
[5]夏曉鵑，〈聽見新南向主旋律外的聲音〉，《新二代留聲機》，獨立評論＠天下，2021.06.21，取自https://opinion.cw.com.tw/blog/profile/531/article/11032。
[6]a-í-nó͘-khò͘ ：混血兒，源自日本語「あいのこ（合の子）」。
[7]搝拆（khiú-thiah）：拉扯。
