毋予我放尿，因為時間無夠（台文）

拜三欲坐高鐵，搭9:30社區開的公車出去，轉捷運，拍算買10:46的票。

來到賣票的窗仔口，我用台語講：「新竹，老人票一張。」

伊講：「10點21分」

我看壁頂的時鐘，10:13，遐早到，我欲去放尿，又閣這班車去到新竹的時間傷早，我講：「下一班。」

「自由座。」

我徛佇遐想幾若秒鐘，伊的手嘛停落來等我，我講：「好，10點21分。」

提著票，猶有５分鐘，會赴，放尿２分鐘，行路３分鐘，我行誠緊。行入便所，有人佇排隊，有一間有人佇摒掃，內底有二、三間的門開開，我想有人無愛用坐的，佇等跔的，我想欲入去門開的彼間，後壁有人講：「塗跤有水，愛細膩。」有影，塗跤攏是水，隔壁間嘛是，我放棄，出去，聽著有人佇講：「彼間的糞埽親像山遐爾懸。」毋予我放尿的意思。

我走轉來高鐵站，賰２分鐘，攄票入去，坐電扶梯行起去，車已經停佇月台邊，我入去，坐落來，倒手爿佮正手爿攏有人，想欲化妝就無利便。

車開，人攏坐落來，等頭前便所的燈變青的，我徛起來，倒手爿彼个先生的雙跤略仔勼一咧，讓我過，去便所。

原來，高鐵站的便所無人彼２間，塗跤有水，予我袂使放，是時間無夠，我緊咧走出來。本來拍算，這班若是坐無著，會使坐下班的自由座。

（2023.10.14.寫）

（請指教）

教育部臺灣閩南語常用詞辭典